LSI: Ndryshimet e Kodit Zgjedhor
të mos bëhen në minutat e fundit

TIRANË - LSI kërkon që ndryshimet në Kodin Zgjedhor të mos kryhen në minutën e fundit. Kjo parti është e gatshme të reflektojë ndaj shqetësimeve të ngritura nga OSBE – ODHIR. Kreu i Grupit Parlamentar të LSI-së, Petrit Vasili dhe deputeti Luan Rama zhvilluan një takim me drejtuesin e misionit ndërkombëtar, Odri Glover pas të cilit ftuan partitë politike të ulen në tryezë për të diskutuar rreth përmirësimit të kuadrit ligjor.

“Ne propozuam, dhe këtë sigurisht mund ta bëjmë publik, fillimin, jo vetëm sa më parë të punës, por edhe vendosjes së afateve të qarta, se kur të gjitha këto ndryshime duhen realizuar për t’i dhënë fund një herë e përgjithmonë logjikës së ndryshimeve të minutës së fundit, të cilat si të tilla nuk mund të reflektohen drejtpërsëdrejti në cilësinë e procesit zgjedhor, dhe na bëjnë që në mënyrë të përsëritur të riciklojmë e të përsërisim të njëjtat problematika negative”, tha Vasili.

“Veprimi në kushte emergjence dhe shmangia nga thelbi i këtyre rekomandimeve nuk do të bëjë gjë tjetër, vetëm, sa do të prodhojë të njëjtat probleme. Prandaj edhe z. Vasili insistoi, dhe ne e theksuam në takimin me znj. Glover, që është shumë e rëndësishme të nisë puna menjëherë paralelisht me reformat e tjera, që reforma në drejtësi apo procesi i dekriminalizimit të mos e sfumojë vëmendjen për reflektimin e këtyre rekomandimeve të OSBE-ODIHR-it”, tha Rama.

Kryetari i grupit parlamentar të LSI, Petrit Vasili i është përgjigjur interesimit të medieve në lidhje me hetimin e CEZ. Sipas tij, këtë nuk e ndaj askush, por nuk duhet ngutje për qëllimet politike. “Tani një çështje e madhe e mbartur në kohë me shumë implikime kërkon kohë, kërkon dhe nacionalitetin që të zbardhet siç duhet. Asnjë zbardhje e ngutur për qëllime taktike politike nuk i shërben as shqiptarëve, as çështjes”, u shpreh ai.

Redaksia Online
(f.s/shqiptarja.com)

TAG:
• OSBE
• OSBE-ODIHR