‘Territori’, Moisiu dhe Meidani:
Nuk ka kohë, bëni konsensus

TIRANE- Forumi Civil 2010 i mbledhur nën drejtimin e dy ish-presidentëve Alfred Moisiu e Rexhep Meidani u shpreh dje se ndjek me vëmendje nisjen e reformës administrative–territoriale. “Keqardhje do të shkaktonte mbajtja në vazhdimësi e pozicionit refuzues nga forca politike të caktuara, sepse mosgjetja e gjuhës së përbashkët për të filluar projektin e ndarjes së re administrative-territoriale do binte ndesh me aspiratat e popullit tonë për një zhvillim sa më të shpejtë të vendit e integrimin e tij. Stopimi i ritmeve në realizimin e reformës do vinte në pikëpyetje dhe marrëveshjet konkrete të bashkëpunimit për këtë qëllim me SHBA, me Suedinë, Zvicrën e PNUD”, thuhet në deklaratë.

“Vëmë në dukje dëmin që u sjellin interesave të gjithë popullit mbyllja e partive në qarkun vicioz të interesave të veta të ngushta politike, në vend që të arrijnë sa më parë konsensusin e domosdoshëm veçanërisht për reformën administrative-terrritoriale”, thotë deklarata. Sipas tyre s’duhet harruar se fushata elektorale për zgjedhjen e organeve të pushtetit vendor, parashikuar për t’u zhvilluar në 6 mujorin e parë 2014, jo vetëm që do të ndërvarej organikisht nga miratimi dhe zbatimi i ligjit për ndarjen e re territoriale, por edhe se në këtë kuadër do të duhej të përmirësoheshin në afate kohore të ngushta disa dispozita të Kodit, sipas problemeve të lindura nga përvoja e deritanishme dhe nga rekomandimet konkrete të OSBE/ODIHR.

Forumi Civil 2010 bën thirrje për funksionimin me ritme të shpejta të komisionit, duke kujtuar përmbushjen e një detyrimi kushtetues përpara miratimit në Kuvend të projektligjit përkatës. “Duhen përjashtuar kryqëzimet politike. Detyra e kësaj tryze nuk është zgjidhja e problemeve dhe kontradiktave por t’i bëjmë thirrje atyre që e kanë për detyrë të ulen dhe të bëjnë atë që u takon”, tha Moisiu. “Duhet konsensusi i gjithanshëm qytetarë dhe politikë për ta realizuar me sukses këtë reformë”, tha Rexhep Meidani.

Ambasadori i SHBA, Aleksandër Arvizu tha se “Ky komision është e nevojshme të funksionojë, sepse është një nevojë praktike që të mund të kemi komision për zhvillimin e reformës. Qëllimi përfundimtar është ë kemi përmirësime në të gjitha ato shërbime më të përmirësura e më demokratike që do t’u ofrohen qytetarëve”, tha Arvizu.
 
Shkrimi u publikua sot (19.02.2014) në gazetën Shqiptarja.com (print)

Redaksia Online
(d.d/shqiptarja.com)

TAG:
• OSBE