‘Ultras Guerrils’: Partizani,
jo një qendër rehabilitimi

Klubi i kuq shkarkoi trajnerin Sulejman Starova nga drejtimi, pas barazimit 1-1 me Teutën. Sot ka ardhur edhe reagimi i tifo-grupit më të madh e të organizuar të Partizanit, “Ultras Guerrils”, që e konsideron largimin e “Bobit” të vonuar, por, në të njëjtën kohë, kanë disa pyetje për drejtuesit.

Ja statusi i plotë:
“Me gjithë mbështetjen pa kushte në shkallët e stadiumit, njëkohësisht e kemi bërë të qartë me çdo mënyrë qëndrimin tonë në lidhje me drejtimin dhe menaxhimin e këtij sezoni të Partizanit, që është jashtë çdo objektivi.

Dje u shkarkua një trajner, që duhej të ishte larguar me kohë. Por, nga ana tjetër, përgjegjësi konkrete nuk merr askush. Kush përgjigjet për dështimet në merkato?

Kush e paguan Çanin 20 mijë euro për të luajtur një ndeshje me Kuçovën? Kush përgjigjet për italianët, që vijnë për turizëm? Kush përgjigjet për boshatisjen e stadiumit? Kush përgjigjet për keqmenaxhimin?

Të gjitha këtyre pikëpyetjeve duhet t’iu jepni përgjigje me seriozitet, duke vepruar. Duke ia nisur fillimisht nga përgjegjësit e merkatos katastrofë, Moxhit dhe Preitit. Partizani nuk mund të bëhet qendër rehabilitimi për plakushë të rrjedhur, që vijnë e na shesin mend me përralla, dhe sjellin një tufë lojtarësh skarco të mbipaguar.

Nga ne kërkohet seriozitet dhe hedhja e themelit të një klubi të qëndrueshëm për të ardhmen e jo klub me mungesë strategjie e vizioni, gabime këto që klubit tonë i kanë kushtuar shumë.

Gjithashtu, na informoni pak ku kanë mbetur punimet për stadiumin dhe kompleksin e ri? Kur do të përfundohet shtëpia e famshme?”

d.b/shqiptarja.com