Lufta/ Pas masakrës me 112 të vrarë në Gaza, Macron: Tmerr, armëpushim menjëherë! SHBA veto deklaratës në KS që dënon sulmin izraelit

Pas masakrës një ditë më parë në Rripin e Gazës, ku humbën jetën të paktën 112 civilë palestinezë teksa po merrnin ndihma, ka reaguar ashpër presidenti i Francës Emmanuel Macron i cili ka dënuar sulmin.

"Indinjatë e thellë për imazhet që vijnë nga Gaza në të cilat civilët u shënjestruan nga ushtarët izraelitë," tha ai në platformën e mediave sociale X.

"Unë shpreh dënimin tim më të fortë dhe kërkoj të vërtetën, drejtësinë dhe respektimin e ligjit ndërkombëtar", shtoi ai. "Në Gaza situata është dramatike. E gjithë popullata civile duhet të mbrohet. Duhet të vendoset menjëherë një armëpushim për të lejuar shpërndarjen e ndihmave."

Ndërkohë Shtetet e Bashkuara kanë bllokuar një deklaratë të Këshillit të Sigurimit të OKB-së që dënon Izraelin për masakrën e palestinezëve që ishin në radhë për ndihmë humanitare në Rripin e Gazës. 

Kombet arabe nuk arritën të fitonin mbështetje për tekstin e paraqitur nga Algjeria, e cila akuzoi forcat izraelite se hapën zjarr ndaj civilëve që prisnin dërgimin e ushqimit dhe ndihmave të tjera humanitare pranë qytetit të Gazës; numri i të vdekurve nga tragjedia është të paktën 112. 

Izraeli mohoi të kishte qëlluar mbi turmën dhe shpjegoi se masakra ishte shkaktuar nga turma. Riyad Mansour, ambasadori palestinez në OKB, u tha gazetarëve - pas një takimi urgjent me dyer të mbyllura të Këshillit të Sigurisë së OKB - se 14 nga 15 anëtarë të Këshillit mbështetën deklaratën e bërë nga Algjeria. 

Shtetet e Bashkuara nuk e mbështetën deklaratën dhe zëvendësambasadori i SHBA Robert Wood shpjegoi për shtypin pse: "Ne nuk i kemi të gjitha faktet në terren, ky është problemi". Diplomati pretendon se ka raporte kontradiktore dhe se Shtetet e Bashkuara po përpiqen të mbledhin të gjitha faktet, duke përfshirë "rrethanat se si vdiqën njerëzit", që është një çështje kyçe.

Ushtria izraelite ka nevojë urgjente për të paktën 7 mijë ushtarë, përveç atyre të parashikuar tashmë në draftin e ardhshëm, për të plotësuar vakancat e shkaktuara për shkak të luftës në Gaza, si dhe për të përballuar kërcënimet e reja nga Hamas dhe një sërë shtetesh aleate të grupimit palestinez.

Të paktën 30,035.palestinezë janë vrarë tani në Gaza që nga 7 tetori i vitit 2023, thotë ministria palestineze e Shëndetësisë e drejtuar nga Hamasi.

Rendit zhvillimet sipas orarit:

Të Fundit Të Parat

M.Q./K.M/Shqiptarja.com

TAG:
• lufta ne rripin e gazes