Lufta Izrael-Hamas/ Bombardohen kampet e refugjatëve në Jabalia dhe Nuseirat, të paktën 8 të vdekur! Irani pritet të sulmojë, Katari: Mendohuni

Hamasi ka thënë se çdo marrëveshje armëpushimi në Gaza duhet të përfshijë tërheqjen e plotë të forcave izraelite nga territori i trazuar. Sot (16 Gusht), në Lindjen e Mesme mbahet edhe takimi-mision i përbashkët i Ministrave të Jashtëm të Francës dhe Britanisë së Madhe.

Kurse numri i të vdekurve në gaza rritet edhe më shumë, duke i kaluar 40 mijë viktima që nga nisja e luftës, më 7 tetor 2023. Mediat dhe burime të pavarura shprehen se Irani mund të sulmojë së shpejti, por ende nuk ka një datë apo orë të saktë, edhe pse u besua se ky sulm do niste që javën e kaluar.

Izraeli nga ana tjetër duket se nuk tërhiqet, pasi ekstremistët sulmuan në Bregun Perëndimor palestinez, duke vrarë një person. Dhe jo vetëm kaq, por kësaj sipas mediave, iu shtua edhe bombardimi në kampet e refugjatëve Jabalia dhe Nuseirat, ku raportohen të paktën 8 të vdekur.

Këto sulme u dënuan ashpër edhe nga qeveria izraelite dhe faktori ndërkombëtar dhe u quajtën incidente të veçuara.

Sirena alarmi pati edhe në Izraelin verior për shkak të një sulmi të dyshuar ajror.

"Më pak se një orë më parë (16 Gusht), sirenat e sulmit ajror u aktivizuan në Izraelin verior për shkak të një infiltrimi të dyshuar të avionëve armik", raportoi agjencia “Haaretz”.

Media, 8 të vdekur në bastisjen izraelite në kampet Jabalia dhe Nuseirat

Agjencia palestineze e lajmeve “Wafa” dhe transmetuesi arab “Al Jazeera” thonë se nga mbrëmja e djeshme dhe sonte ushtria izraelite bombardoi Rripin e Gazës, duke vrarë të paktën shtatë persona në kampin e refugjatëve Jabalia dhe një tjetër në Nuseirat.

Katari i drejtohet Iranit: Përparim në Doha, mendoni nëse do të sulmoni!

Një zyrtar i lartë nga një prej vendeve ndërmjetësuese raportoi një bisedë telefonike që kryeministri i Katarit, Muhammad bin Abd al-Rahman Al Thani, pati me krerët e lidershipit iranian, në të cilën ai i informoi ata se kishte zhvillime pozitive në negociata. mes Izraelit dhe Hamasit.

“Duhet të mendoni me kujdes nëse ia vlen për ju, apo për Hezbollahun, të sulmoni Izraelin kur ka një përparim të tillë”, raporton “La Repubblica”.

Shtëpia e Bardhë: Dhuna kundër kolonëve është e papranueshme

Shtëpia e Bardhë dënoi dhunën e "papranueshme" të kolonëve izraelitë kundër palestinezëve, pasi një person u vra dhe një tjetër u plagos në një fshat të pushtuar në Bregun Perëndimor. Kështu ka bërë të ditur zëdhënësi i Këshillit të Sigurisë Kombëtare.

“Sulmet e dhunshme të kolonëve kundër civilëve palestinezë në Bregun Perëndimor janë të papranueshme dhe duhet të ndalen”, thuhej në një deklaratë për “Times of Israel”.

"Autoritetet izraelite duhet të marrin masa për të mbrojtur të gjitha komunitetet. Kjo përfshin ndërhyrjen në kohë për të ndaluar dhunën dhe për të mbajtur të gjithë autorët përgjegjës", shton zëdhënësi.

Katari konfirmon, negociatat e Dohas për Gazën rinisin sot

Zëdhënësi i Ministrisë së Jashtme të Katarit, Majed al-Ansari, konfirmoi se takimi në Doha mes ndërmjetësve për një armëpushim në Rripin e Gazës do të vazhdojë dhe do të rifillojë sot. Lajmi është bërë i ditur nga Agjencia e Lajmeve të Katarit (Qna).

“Al-Ansari i tha QNA se përpjekjet e ndërmjetësve nga Shteti i Katarit, Republika Arabe e Egjiptit dhe Shtetet e Bashkuara të Amerikës janë në vazhdim dhe se negociatorët janë të vendosur në angazhimin e tyre për të ecur përpara në përpjekjet për të arritur një armëpushim në Rrip, gjë që do të lehtësonte lirimin e pengjeve “izraelite” dhe do të lejonte hyrjen e sasisë më të madhe të mundshme të ndihmave humanitare në Gaza”, thuhet në një postim të publikuar në llogarinë X, të agjencisë së lajmeve të Katarit.

Gallant dënon dhunën e ekstremistëve në Bregun Perëndimor

Ministri izraelit i Mbrojtjes Yoav Gallant, iu bashkua dënimeve të dhunës së kolonëve në Jet, një fshat në Bregun Perëndimor, duke denoncuar "ekstremistët" që po shkatërrojnë qytetin palestinez, "ndërsa ushtarët tanë luftojnë në fronte të ndryshme për të mbrojtur Shtetin e Izraelit".

"Unë dënoj fuqishëm çdo lloj dhune dhe jap mbështetjen time të plotë për IDF, Shin Bet dhe policinë izraelite në mënyrë që ata të luajnë rolin e tyre dhe ta trajtojnë çështjen me ashpërsi”, shkruan Gallant në rrjetet sociale.

Sipas Autoritetit Palestinez, dhuna në Bregun Perëndimor ka shkaktuar një vdekje dhe një plagosje të rëndë.

Jemen: SHBA, stacioni i kontrollit Houthi është shkatërruar

Gjatë 24 orëve të fundit, forcat e Komandës Qendrore të SHBA (Uscentcom) sulmuan dhe shkatërruan një stacion kontrolli tokësor Houthi të mbështetur nga Irani, në një zonë të kontrolluar nga Houthi të Jemenit. Kështu raporton një shënim në rrjetet sociale.

“U përcaktua se ky stacion kontrolli tokësor përbënte një kërcënim të qartë dhe të menjëhershëm për forcat e SHBA-së dhe të koalicionit dhe transportin tregtar në rajon”, vazhdon deklarata.

“Ky veprim u ndërmor për të mbrojtur lirinë e lundrimit dhe për të bërë ujërat ndërkombëtare më të sigurta, për SHBA-në dhe anijet tregtare të koalicionit", vijohet më tej.

A.Q/Shqiptarja.com

TAG:
• lufta ne rripin e gazes
• Irani
• Izrael
• Hamas