Lufta/ Sulm izraelit në Damask, vriten udhëheqësit e Xhihadit Islamik! Reagon presidenti iranian: Nuk do të lëmë pa përgjigje krimet e regjimit sionist! Familjarët e pengjeve protestë para shtëpisë së Netanyahut

Ebrahim Raisi

Presidenti iranian Ebrahim Raisi është zotuar të ndëshkojë Izraelin për sulmin që shkaktoi vdekjen e disa anëtarëve të Gardës Revolucionare të Iranit në Damask. 

"Republika Islamike nuk do t'i lërë pa përgjigje krimet e regjimit sionist",- tha Raisi në një deklaratë duke dënuar sulmin, transmeton transmetuesi shtetëror Irib, cituar nga Guardian .

Të afërmit e pengjeve izraelite që mbahen nga militantët e Hamasit në Gazë protestuan para shtëpisë së kryeministrit Benjamin Netanyahu të shtunën, duke kërkuar nga qeveria e tij të ndërmarrë hapa vendimtarë për të siguruar lirimin e të dashurve të tyre, ndërkohë që thellohen ndasitë mbi drejtimin e luftës brenda kabinetit izraelit.

Anëtarët e një grupi që përfaqëson familjet e pengjeve thanë se "ishin lutur për 105 ditë" dhe tani kërkojnë nga qeveria të ndërmarrë hapa të guximshëm për të liruar pengjet.

Ish-shefi i ushtrisë izraelite Gadi Eisenkot, anëtar i Kabinetit të Luftës së Izraelit, ka thënë se armëpushimi është mënyra e vetme për të siguruar lirimin e tyre, një koment që nënkupton kritika ndaj strategjisë aktuale të Izraelit për të mos hequr dorë nga lufta kundër militantëve të Hamasit deri sa ajo organizatë të shkatërrohet.

Protesta para shtëpisë së kryeministrit dhe komenti i zotit Eisenkot janë shenja të mosmarrëveshjeve në rritje në Izrael mbi drejtimin e luftës, që është në muajin e katërt.

Udhëheqja e Izraelit përballet me presione nga disa drejtime. Nga njëra anë, zoti Netanyahu përballet me anëtarët e krahut të djathtë të koalicionit të tij qeverisës që duan intensifikimin e luftën kundër Hamasit. Nga ana tjetër ai po has thirrje për përmbajtje nga aleati i vet, SHBA dhe familjet e pengjeve, të cilët kanë frikë se përshkallëzimi i aktivitetit ushtarak rrezikon më tej jetën e pengjeve.

Udhëheqësi izraelit ka thënë se synon "fitoren e plotë" ndaj Hamasit, por nuk ka thënë se si do ta arrijë atë. Kritikët e kanë akuzuar atë se nuk po lejon hapjen e një debati në nivel kabineti për një skenar të pasluftës për Gazën. Ata thonë se Netanyahu po e zvarrit një gjë të tillë për të parandaluar përplasje brenda koalicionit të tij.

Biden dhe Netanyahu, qëndrime të ndryshme për një shtet të ardhshëm palestinez

Kryeministri iNetanyahu u duk të shtunën se doli kundër deklaratave të presidentit amerikan Joe Biden për një shtet palestinez pas përfundimit të luftës kundër Hamasit në Gaza.

Zoti Biden tha të premten se kishte folur në një telefonatë me zotin Netanyahu për zgjidhjet e mundshme për krijimin e një shteti të pavarur palestinez, duke sugjeruar se një alternativë mund të ishte një qeveri e çmilitarizuar.

"Në bisedën e tij me Presidentin Biden, kryeministri Netanyahu përsëriti qëndrimin e tij se pasi Hamasi të shkatërrohet, Izraeli duhet të ruajë kontrollin e sigurisë mbi Gazën për t’u siguruar që Gaza të mos përbëjë më kërcënim për Izraelin, gjë që bie ndesh me kërkesën për sovranitetin palestinez", thuhet në një deklaratë nga zyra e kryeministrit izraelit.

E pyetur të sqarojë nëse zoti Netanyahu është kundër çdo lloj alternative për një shtet palestinez, zyra e tij nuk u përgjigj menjëherë.

Telefonata mes dy udhëheqësve ishte e para prej gati një muaji, tha Shtëpia e Bardhë.

I pyetur nëse një zgjidhje me dy shtete ishte "e pamundur" ndërsa kryeministri Netanyahu është në pushtet, presidenti Biden tha: "Jo, nuk është".

Presidenti u tha gazetarëve të mbledhur në Shtëpinë e Bardhë se ai beson se "ka disa lloje zgjidhjesh me dy shtete" dhe se zoti Netanyahu mund të jetë i hapur për një prej tyre.

Zoti Netanyahu nuk ka refuzuar drejtpërdrejt dhe qartë krijimin e një shteti palestinez. Por të enjten ai tha se në çdo zgjidhje në të ardhmen e parashikueshme “Izraeli duhet të ketë kontrollin e sigurisë mbi të gjithë territorin në perëndim të lumit Jordan. Ky është një kusht i domosdoshëm. Kjo bie ndesh me parimin e sovranitetit, por nuk kemi ç’të bëjmë."

Bisedimet e paqes të mbështetura nga SHBA drejt së ashtuquajturës "zgjidhje me dy shtete", dështuan një dekadë më parë.

Të enjten, zëdhënësi i Departamentit të Shtetit të SHBA, Matthew Miller tha se nuk kishte asnjë mënyrë për të zgjidhur sfidat afatgjata të sigurisë të Izraelit dhe sfidat afatshkurtra të rindërtimit të Gazës pa krijimin e një shteti palestinez. Zoti Miller tha se Izraeli kishte një mundësi tani pasi vendet në rajon janë të gatshme për të ofruar garanci sigurie për Izraelin./ VOA

Foto nga Gaza pas bombardimeve izraelite

Sulmet ajrore dhe bombardimet izraelite që synojnë shtëpi dhe ndërtesa banimi kanë zhvendosur rreth 123,538 palestinezë në Gaza, sipas agjencisë së ndihmës humanitare të OKB-së.

Shumë nga ata që janë detyruar të largohen nga shtëpitë e tyre janë strehuar në rreth 64 shkolla në enklavën bregdetare, tha Zyra e OKB-së për Koordinimin e Çështjeve Humanitare.

Gjithsej 159 njësi banimi janë shkatërruar ndërsa 1,210 kanë pësuar dëme të rënda.

Foto ilustruese

Disa linja ajrore në Azi kanë anuluar fluturimet e tyre për në Izrael duke përmendur situatën e sigurisë në vend.

Hainan Airlines, e vetmja linjë ajrore kineze që fluturon midis Kinës dhe Izraelit, anuloi fluturimet midis Shangait dhe Tel Aviv të hënën, ndërsa Cathay Pacific gjithashtu anuloi fluturimin midis Hong Kong dhe Tel Aviv të martën.

Korean Air anuloi fluturimin midis qytetit port të Incheon dhe Tel Aviv të hënën dhe tha se ende nuk është marrë një vendim për fluturimet e ardhshme.

Foto nga familjarët e pengjeve duke protestuar për lirimin e tyre

Dhjetra familje pengjesh protestuan gjatë natës jashtë shtëpisë së kryeministrit izraelit, Benjamin Netanyahu, në Cezare për të kërkuar një marrëveshje për të shpëtuar jetën e të dashurve të tyre dhe për të protestuar ndaj mosveprimit të qeverisë. Kështu raporton gazeta Times of Israel. 

“Kanë mbaruar ditët e hirit në të cilat ju tërhoqët zvarrë”, thuhet në deklaratën e Forumit të familjeve të pengjeve që i kanë kërkuar me ngulm kryeministrit të dalë për të folur. 

“Kemi 105 ditë që ju lutemi dhe tani ju kërkojmë të ndaloni ekzekutimet e pengjeve. Demostroni lidershipin tuaj dhe bëni një lëvizje të guximshme që do të çojë përpara planin që ne e dimë se është në tryezë. Nuk ka të bëjë me lirimin e pengjeve, ka të bëjë me shpëtimin e jetëve", thuhet në deklaratë.

Familjet e pengjeve po i kërkojnë Netanyahut një konferencë ndërkombëtare me Katarin, Egjiptin dhe SHBA- në që do t'i lejojë të gjithë të ulen rreth një tavoline dhe të gjejnë një mënyrë për t'i sjellë pengjet në shtëpi.

Foto nga Vendngjarja në Damask

Ndër pesë vdekjet e shkaktuara nga bastisja në Damask që i atribuohen Izraelit, ishin dy këshilltarë të lartë të Gardës Revolucionare të Teheranit. Kjo është raportuar nga gazeta izraelite Haaretz, duke cituar burime iraniane. 

Sipas burimeve të tjera të cituara nga SkyNews Arabia, në mesin e viktimave të bombardimit ishte edhe një nga drejtuesit e Xhihadit Islamik Palestinez (Pij), Akram Al-Ajouri. 

Burime të tjera tregojnë se sekretari i përgjithshëm i grupit terrorist, Ziad Nakhla, ishte gjithashtu i përfshirë në bastisje, për të cilin fajësohej Izraeli. 

Në kompleksin rezidencial të prekur, me sa duket po zhvillohej një samit midis Pasdaran dhe aleatëve të tyre anti-izraelitë në rajon.

Joe Biden

Presidenti amerikan, Joe Biden, ka biseduar me kryeministrin izraelit Benjamin Netanyahu për zgjidhjet e mundshme që do të çonin në krijimin e një shteti të pavarur për palestinezët, duke vënë në dukje se jo të gjitha vendet kanë ushtritë e tyre.

Pasi u pyet nga gazetarët Biden mohoi që të jetë e pamundur zgjidhja me dy shtete me Netanyahu ende në detyrë.

Presidenti tha kryeministri izraelit nuk ishte kundër të gjitha zgjidhjeve me dy shtete, duke shtuar se disa anëtarë të Kombeve të Bashkuara nuk kanë forca ushtarake.

Biden dhe Netanyahu diskutuan përpjekjet për të siguruar pengjet e mbetura të mbajtura nga Hamasi, dhe zhvendosjen e Izraelit në operacione më të “shënjestruara” në Gaza për të lejuar më shumë ndihmë humanitare, tha Shtëpia e Bardhë.

Foto nga Gaza pas bombardimeve izraelite

Të paktën 24.927 palestinezë janë vrarë dhe 62.388 janë plagosur në sulmet izraelite në Rripin e Gazës që nga 7 tetori, njoftoi sot Ministria e Shëndetësisë në Gaza.

Gjithashtu në 24 orët e fundit janë vrarë rreth 165 palestinezë dhe 280 janë plagosur.

Ndërkohë, presidenti amerikan Joe Biden i pyetur nëse do të konsideronte kushtëzimin e ndihmës për Izraelin për shkak të refuzimit të Netanyahu për të krijuar një shtet palestinez, pas bisedës së tyre telefonike sot, Biden tha se mund të arrihej diçka.

Erdogan dhe Benjamin Netanyahu

Nuk ka më besim ndaj Perëndimit, i cili nuk ka ndërmarrë asnjë hap për të parandaluar krizën në Gaza, tha presidenti turk Tajip Erdogan.

Organizatat, detyrat e të cilave përfshijnë sigurimin e sigurisë globale kanë dështuar, një shembull i të cilave është konflikti midis Izraelit dhe Palestinës, sipas tij.

“Nuk ka më besim ndaj vendeve perëndimore që kanë dështuar në provën për çështjen e Gazës. Fytyrat e tyre fashiste janë ekspozuar. Ata nuk kanë bërë asnjë hap të vetëm për të parandaluar dhunën. Organizatat e ngarkuara me sigurinë globale, ashtu si në Irak. Bosnja, Siria dhe Somalia, kanë pësuar një fiasko. Ata janë kufizuar në shikimin kot të akteve të gjenocidit dhe barbarizmit të kryera kundër popullit të Palestinës nga ‘Fuehreri i Kohëve Moderne’, Kryeministri izraelit Benjamin Netanyahu”, tha Erdogan.

Po ashtu, Erdogan tha se Turqia po bën përpjekje të mëdha për hir të përfundimit të konflikteve të ndryshme. Në veçanti, ai kujtoi bisedimet e Stambollit për një zgjidhje në Ukrainë në mars 2022.

Joe Biden

Presidenti i Shteteve të Bashkuara, Joe Biden, zhvilloi një bisedë telefonike me kryeministrin e Izraelit, Benjamin Netanyahu për “situatën në Izrael dhe në Gazë”, njoftoi Shtëpia e Bardhë të premten.

Detajet e bisedës mes dy liderëve nuk janë publikuar, por Shtëpia e Bardhë ka thënë se do të jap më shumë detaje më vonë, raporton Reuters.

Bisedimet u raportua se u zhvilluan pasi zyrtarët e Komitetit Ndërkombëtar të Gjysmëhënës së Kuqe raportuan “sulme intensive nga dronët izraelitë në spitalin Al-Amal” në Khan Yunis, një qytet në pjesën jugore të Rripit të Gazës.

Izraeli këtë javë nisi sulme të reja në qytetin për të cilin thotë se është një bazë për luftëtarët e Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian.

Izraeli nisi ofensivën pas sulmit të paprecedent të Hamasit në jug të Izraelit më 7 tetor, kur luftëtarët e grupit vranë 1.200 persona dhe morën peng afër 250 të tjerë. Afër 130 pengje Izraeli beson se ende janë nën robërimin e Hamasit. Lufta ka rritur tensionet në mbarë rajonin, duke kërcënuar nxitjen e konflikteve të tjera.