Lufta kundër COVID-19, Kroacia i dhuron Kosovës 10 mijë vaksina

Ministri i Jashtëm i Kroacisë, Gordan Grlić Radman, gjatë vizitës së tij zyrtare në Kosovë ka deklaruar se Kroacia do ta ndihmojë Kosovën me 10 mijë vaksina anti-Covid. Ministri kroat ka thënë se kjo vizitë do t’i shërbejë përmirësimit të marrëdhënieve mes të dyja vendeve.

“Kroacia dhe Kosova siç tha edhe ministrja janë vende tradicionalisht mike që kanë marrëdhënie të shkëlqyeshme mes vete. Sot kam nder që me stafin tim të jem këtu në Kosovë. Kjo vizitë do të shërbejë për intensifikimin e marrëdhënieve. Nuk duhet të harrojmë faktin se pikërisht Kroacia ishte një nga vendet e para që e ka njohur pavarësinë e Kosovës, dhe për këtë jemi shumë krenarë. Kam informuar ministren për vendimin e Kroacisë për dhurimin e 10 mijë vaksinave për luftimin e pandemisë. E di që kjo do të jetë e rëndësishme për jetën e qytetarëve të Kosovës”, u shpreh ai. 

Më 4 maj, Kosova ka rinisur fushatën e vaksinimit kundër koronavirusit, pas pranimit të 4,680 vaksinave të kompanisë Pfizer/BioNTech. Kjo është sasia e parë e 95,000 dozave që Bashkimi Evropian i ka ndarë për Kosovën, në kuadër të mbështetjes së vaksinimit në vendet e Ballkanit Perëndimor.

Kosova mbetet vendi i vetëm në Evropë që ende nuk ka arritur të nënshkruajë ndonjë kontratë për blerjen e vaksinave kundër COVID-19 dhe çdo vaksinë e siguruar deri tani, është donacion nga Bashkimi Evropian ose nga Organizata Botërore e Shëndetësisë.

TAG:
• kosova
• kosova
• kosova
• kosova
• Kroaci
• Koronavirus
• Vaksina Covid