Lufta ndaj korrupsionit, Komisioni
Integrimit miraton projekt-ligjin

TIRANË - Komisioni i Integrimit në Kuvend, ka nisur diskutimi për projektligjin antikorrupsion. Në komision ishin të pranishëm edhe drejtues të Ministrisë së Drejtësisë, të cilët kanë kërkuar nga deputetët që të miratohet ky projektligj, pasi bën që lufta ndaj korrupsionit të rritet.

Sipas Ministrisë së Drejtësisë, ndryshimet e bëra më parë në Kodin e Procedurës Penale nuk kanë dhënë rezulatet e pritura. “Objektivi ynë është lufta kundër korrupsionit dhe ndryshimet e para të bëra në Kodin e Procedurës Penale apo ligjet e tjera nuk kanë dhënë rezultate”, kanë bërë të ditur përfaqësuesit e Ministrisë së Drejtësisë.

Sipas këtyre të fundit, në Progres Raportin e KE-së, kërkohet përforcimi i masave dhe një luftë më e madhe ndaj këtij fenomeni. Ministria e Drejtësisë ka kërkuar ndryshimin e procedurave penale për parandalimin e krimit te organizuar.

“Një përqasje e Kushtetutes me kufizimin e imuniteteve, progres-raporti i 2013, rithekeson nevojën e forcimit të masave ndaj korrupsionit”, kanë deklaruar përfaqësuesit e Ministrisë së Drejtësisë.
 
Gjatë diskutimeve në komision, deputeti socialist, Gramoz Ruçi ka kërkuar që struktura e sektorëve që luftojnë këtë fenomen të mos ndryshojë. “Të ruhet struktura hetimore jo vetëm në bazë por edhe në qendër”, ka thënë Ruçi.

Ndërsa deputeti tjetër, socialist, Ben Blushi ka kërkuar marrjen parasysh të vërejtjeve të OSBE dhe ambasadës amerikane në lidhje me këtë projektligj. Ndërsa përfaqësuesit e OSBE-së, kanë deklaruar se, Krimet e Rënda nuk janë njësi e specializuar kundër korrupsionit.

Komisioni i Integrimit Europian e ka votuar draftin që parashikon masat parandaluese kundër pasurisë së vënë në mënyrë të paligjshme, si një mënyrë për të luftuar korrupsionin.

Por kundër këtij drafti ishin përfaqësuesit e opozitës. Projektligji ka kaluar me 6 votat pro të anetarëve të PS dhe dy kundër të Majlinda Bregut dhe Jorida Tabakut.

Ky kundërshtimi përkthyer në votë ka lidhje me faktin se drafti i paraqitur nga përfaqësuesi i Ministrisë së Drejtësisë, nuk merrte në konsideratë sugjerimet e bëra nga SHBA dhe OSBE.

Redaksia online
(ac/shqiptarja.com)

TAG:
• gramoz ruçi
• OSBE