Lufta në Ukrainë/ Pentagoni: SHBA është gati të mbrojë territorin e NATO-s! Biden: Putini është kasap

‘SHBA nuk do të dërgojë trupa në Ukrainë’, këtë e përsëriti ditën e sotme, zëdhënësi i DASH, Matthew MIller.

Zyrtari i Departamentit Amerikan të Shtetit u pyet nga gazetarët lidhur me hipotezën e ngritur nga presidenti francez Emmanuel Macron për dërgimin e trupave të NATO-s në Ukrainë për të luftuar ndaj Rusisë.

Tensionet janë në rritje, teksa Rusia ka akuzuar për sulmin terrorist në Moskë edhe përfshirjen e SHBA-së së bashku me Britaninë e Madhe.

Sipas të dhënave të fundit, numri i viktimave nga sulmi terrorist në Moskë, ka shkuar në 140.

Agjencia Ria Novosti raporton se 84 prej tyre janë identifikuar, ndërsa mbeten ende 56 trupa të vdekur për t’i identifikuar. Mes viktimave janë 5 të mitur të moshës 9 deri në 16 vjeç.

Komiteti Hetues ka marrë gjithsej 143 ankesa nga familjet e të dyshuarve të vrarë. Për këtë arsye ende nuk dihet asgjë për 3 persona, madje as nëse ishin me të vërtetë në sallën e koncerteve.

Kreu i shërbimit të brendshëm të inteligjencës ruse Alexander Bortnikov ka akuzuar Ukrainën për trajnimin e militantëve islamikë në Lindjen e Mesme. Sipas Bortnikov, kjo dëshmohet nga numri i madh i të huajve që luftojnë me forcat e Kievit.

 “Ata janë nacionalistë, mercenarë, islamikë që vendi i sjell për të luftuar kundër Rusisë”, shtoi ai, pa iu referuar drejtpërdrejt 4 të arrestuarve për sulmin në Moskë, por nënvizoi se përfaqësuesit ukrainas vizituan bazat terroriste në Lindjen e Mesme.

Ndërkohë parlamenti rus ka bërë thirrje për një hetim mbi financimin, organizimin dhe kryerjen e akteve terroriste në Rusi nga Shtetet e Bashkuara dhe vendet e tjera perëndimore. 

Sipas mediave ndërkombëtare, numri i të vdekurve nga sulmi i Moskës është rritur në 140, pas vdekjes në spital të një prej tre të plagosurve rëndë. Ndërkaq, ende janë 360 të plagosur mes të cilëve edhe shumë fëmijë.

Pas akuzave se Shtetet e Bashkuara kanë bashkëpunuar me Ukrainën për sulmin e Moskës, Uashingtoni thotë se është i gatshëm të mbrojë vendet e NATO-s.

“Nëse një aleat do të sulmohej, ne sigurisht nuk do të dëshironim që kjo të ndodhte, por ne do të mbrojmë çdo pëllëmbë të NATO-s", tha një zyrtare e Pentagonit. Ndërkohë, NATO po e konsideron edhe rrëzimin e raketave ruse nëse ato i afrohen kufirit.

Kreu i inteligjencës ukrainase, ka bërë me dije se ka nisur një fushatë të gjerë për eliminimin e qytetarëve ukrainas që bashkëpunojnë me Rusinë.