Lufta/ UNRWA: Pa fonde, mund të mbyllim dyert deri në fund të muajit! Politike: Biden drejt sanksioneve kundër izraelitëve që sulmuan palestinezët në Bregun Perëndimor të pushtuar

Philippe Lazzarini

Agjencia e OKB-së për Palestinezët mund të mbyllë aktivitetet e saj në Gaza dhe në të gjithë rajonin nëse vendet donatore vazhdojnë vendimin e tyre për të pezulluar financimin e tyre, ka shkruar numri një i UNWRA , Philippe Lazzarini, në rrjetet sociale.

"Disa vende donatore kanë pezulluar 440 milionë dollarë financime për UNWRA - shkruan Lazzarini - ndërkohë lufta në Gaza vazhdon pa pushim. Në një kohë kur Gjykata Ndërkombëtare e Drejtësisë kërkon ndihmë më të madhe humanitare, është koha për të forcuar, jo për të dobësuar UNWRA. Ne jemi organizata më e madhe humanitare në një nga krizat humanitare më serioze dhe komplekse në botë. Unë i bashkohem thirrjes së Sekretarit të Përgjithshëm të OKB-së, Antonio Guterres, për të rifilluar financimin për agjencinë. Nëse financimi mbetet i pezulluar - shton ai – me shumë mundësi do të detyrohemi të mbyllim operacionet tona deri në fund të shkurtit jo vetëm në Gaza por në të gjithë rajonin”.

Jonathan Crickx

"Shumica e njerëzve të rinj të zhvendosur kanë vetëm 1.5/2 litra ujë në dispozicion në ditë. Për të pirë, gatim dhe larë. Ndonjëherë vetëm një banjë për 500-700 njerëz."

Këtë e tha Jonathan Crickx, Shefi i Komunikimeve për UNICEF-in në Palestinë.

Joe Biden

Presidenti i Shteteve të Bashkuara, Joe Biden, ka vendosur sanksione ndaj katër kolonëve izraelitë, të akuzuar për sulme ndaj palestinezëve në Bregun e uzurpuar Perëndimor.

Ai e nënshkroi një urdhër ekzekutiv të enjten, duke thënë se dhuna ka arritur në “shkallë të patolerueshme”.

Ata kolonë izraelitë ishin përfshirë në veprime të dhunës, si dhe kërcënime dhe tentime për ta shkatërruar apo uzurpuar pronën palestineze, sipas urdhrit, raporton Associated Press.

Urdhri i Bidenit nënkupton sanksione financiare dhe regjim vizash për individët të cilët i sulmojnë apo i frikësojnë palestinezët, apo ua uzurpojnë pronat atyre, tha të enjten këshilltari për Siguri Kombëtare i Shteteve të Bashkuara, Jake Sullivan.

“Vendimi i sotëm synon promovimi ne paqes dhe sigurisë për izraelitët dhe palestinezët njëlloj”, tha Sullivan.

Dhuna në Bregun Perëndimor është rritur prej se Hamasi – grupi palestinez i shpallur terrorist nga SHBA dhe BE – e sulmoi Izraelin më 7 tetor.

Urdhri i Bidenit është hap i rrallë kundër aleatit më të madh të SHBA-së në Lindje e Mesme, Izraelit, për të cilin Bideni thotë se ka të drejtë ta mbrojë veten. Por, presidenti demokrat i ka bërë trysni kryeministrit izraelit, Benjamin Netanyahu, të tregojë më shumë vetëpërmbajtje në operacionet ushtarake që kanë për qëllim shkatërrimin e Hamasit.

Autoritetet palestineze thonë se disa palestinezë janë vrarë, ndërsa grupet për të drejtat e njeriut thonë se kolonët kanë djegur vetura dhe i kanë sulmuar disa komunitete të vogla beduine, duke i detyruar të evakuohen.

“Kjo dhunë përbën rrezik të madh ndaj paqes, sigurisë dhe stabilitetit në Bregun Perëndimor, në Izrael dhe në rajonin e Lindjes së Mesme, si dhe i kërcënon interesat e sigurisë kombëtare dhe politikave të jashtme të Shteteve të Bashkuara”, tha Sullivan.

Në urdhër thuhet se dhuna nga kolonët i minon synimet e politikës së jashtme amerikane, “përfshirë zbatueshmërinë e zgjidhjes me dy shtete”.

Bideni i ka përsëritur thirrjet për një shtet të pavarur palestinez, i cili do të ekzistonte përkrah Izraelit. Ai ka thënë se gjetja e një mënyre për ta arritur sovranitetin palestinez, sapo të mbarojë lufta mes Izraelit dhe Hamasit, është thelbësore për ndërtimin e paqes së qëndrueshme.

Netanyahu, megjithatë, e ka hedhur poshtë një ide të tillë gjatë karrierës së tij politike dhe u ka thënë zyrtarëve amerikanë se e kundërshton çfarëdo plani të pasluftës, i cili përfshin themelimin e një shteti palestinez.

Izraeli e uzurpoi Bregun Perëndimor në luftën e Lindjes së Mesme më 1967, bashkë me Rripin e Gazës dhe Jerusalemin lindor.

Palestinezët i kërkojnë këto territore për një shtet të pavarur që shpresojnë ta kenë./ REL

Foto nga Gaza pas bombardimeve izraelite

Ministrat e kabinetit të luftës të Izraelit po shqyrtojnë kufizimin e sasisë së ndihmës që arrin në Gaza. Këtë e raporton kanali izraelit Channel 12. 

Sipas transmetuesit, Benny Gantz, gjenerali i qendrës në pension i ushtrisë, i cili iu bashkua qeverisë emergjente të formuar nga kryeministri Benjamin Netanyahu pas 7 tetorit, dhe Gadi Eisenkot, ish-shefi i shtabit të ushtrisë izraelite dhe vëzhgues i kabinetit të luftës, sugjeruan kufizimin e përkohshëm të ndihmës për dobësojnë Hamasin.

Dy politikanët e partisë së Unitetit Kombëtar e bënë propozimin në takimet e kësaj jave, raporton Channel 12, pasi morën një raport nga Shërbimi i Sigurisë së Brendshme të Izraelit se deri në 66% e ndihmës që hynte në Gaza është devijuar nga Hamasi. 

Për momentin nuk është marrë asnjë vendim përfundimtar për këtë çështje, specifikoi transmetuesi izraelit.

Kufomat në Gaza

Një varr masiv me trupat në dekompozim të dhjetëra të burgosurve palestinezë të lidhur me sy dhe pranga është gjetur në Gaza dhe autoritetet palestineze kanë bërë thirrje për një hetim ndërkombëtar. 

Kjo është raportuar nga Al Jazeera online, sipas së cilës të paktën 30 trupa u gjetën në "qese të zeza plastike" pranë shkollës Hamad, në veri të Gazës. 

Dëshmitarët i thanë stacionit televiziv të Katarit se personat e gjetur ishin lidhur me sytë, torturuar dhe vrarë përpara se të vendoseshin në çanta. 

"Ndërsa po pastronim, hasëm në një grumbull rrënojash në oborrin e shkollës. U tronditëm kur zbuluam se dhjetëra kufoma ishin varrosur nën këtë grumbull. Kur i hapëm çantat, i gjetëm trupat tashmë të dekompozuar. Ata ishin të lidhur me sy, këmbë dhe duar të lidhura", tha një dëshmitar. 

Korrespondenti i Al Jazeera, Tareq Abu Azzoum, duke raportuar nga Rafah, në jug të Gazës, tha se "gjendja e këtyre trupave varion nga dekompozuar rëndë në mbetjet e thjeshta skeletore; duke e bërë të vështirë identifikimin e tyre". 

Megjithatë, ai shtoi, se "njerëzit vazhdojnë të vijnë në vend, duke kërkuar përgjigje në këtë vend të tragjedisë".

Foto nga Gaza

Mbi 27 mijë palestinezë janë vrarë në Gaza që nga 7 tetori. Në numrin më të fundit të siguruar nga Ministria e Shëndetësisë e Gazës, e drejtuar nga Hamasi, 27,019 palestinezë janë vrarë që nga fillimi i konfliktit, ndërsa 66,139 të tjerë janë plagosur. 

Kështu raporton Al Jazeera.

Më herët, kryeministri i Izraelit, Benjamin Netanyahu këmbënguli se një marrëveshje me Hamasin për të siguruar lirimin e më shumë se 100 pengjeve që ende mbahen në Gaza nuk do të vijë “me asnjë çmim”, pasi protestat e përhapura vazhdojnë në Izrael.

Matthew Miller

Shtetet e Bashkuara vazhdojnë të mbështesin krijimin e një shteti të pavarur palestinez dhe “nuk ka pasur asnjë ndryshim politikash” nga administrata në lidhje me këtë qëllim, tha të mërkurën zëdhënësi i Departamentit të Shtetit, Matthew Miller, pasi publikimit të një artikulli që sugjeronte një ndryshim.

“Ne e kemi bërë mjaft të qartë publikisht se mbështesim krijimin e një shteti të pavarur palestinez. Kjo ka qenë politika e Shteteve të Bashkuara për disa kohë. Ka qenë politika e kësaj administrate. Ju e keni parë Sekretarin të flasë për këtë publikisht”, tha Miller në një konferencë të Departamentit të Shtetit.

Miller shtoi se SHBA po ndjek zhvillimin e shtetit të pavarur palestinez “me garanci reale sigurie për Izraelin”, duke thënë se administrata e Biden besonte se ishte mënyra më e mirë për të garantuar paqen dhe sigurinë për Izraelin, palestinezët dhe rajonin më të gjerë, raporton New York Post.

Ai po ashtu vuri në dukje se Departamenti i Shtetit po shikonte se si të krijonte një shtet të pavarur palestinez dhe po vlerësonte “çdo numër opsionesh” si pjesë e planifikimit të tij për të gjetur se cilat do të ishin efektive dhe do të funksiononin më mirë.

Ndërsa ai refuzoi të detajojë punën e brendshme, ai tha se SHBA po vlerëson një sërë opsionesh të cilat do t’i diskutojnë me partnerët në Lindjen e Mesme dhe brenda qeverisë amerikane, por shtoi se nuk ka pasur ndryshim të politikës.

Foto nga Gaza

Më shumë se gjysma e ndërtesave në Rripin e Gazës janë dëmtuar ose shkatërruar plotësisht dhe enklava e vogël palestineze tani është e pabanueshme pas gati katër muajsh të luftës së Izraelit kundër Hamasit, tha OKB. Do të duhen dhjetëra miliarda dollarë për ta bërë enklavën sërish të banueshme.

Në një raport nga Konferenca e Kombeve të Bashkuara për Tregtinë dhe Zhvillimin, studiuesit e Agjencisë vlerësuan shkallën e shkatërrimit bazuar kryesisht në fotot satelitore me rezolucion të lartë, duke krahasuar imazhet e para 7 tetorit me ato pas pasi Izraeli filloi të godiste pa pushim Rripin e Gazës.

Mbledhja e të dhënave për raportin u ndal në fund të nëntorit, rreth dy muaj pas shpërthimit të konfliktit. Deri atëherë, 37,379 ndërtesa, ose 18% e totalit në Rripin e Gazës, ishin dëmtuar ose shkatërruar nga operacioni ushtarak. Që atëherë, fotografitë satelitore tregojnë se shkatërrimi është dyfishuar.

“Të dhënat e reja tregojnë se 50% e strukturave të ndërtesave në Rripin e Gazës janë (dëmtuar ose) shkatërruar (plotësisht). Rripi i Gazës aktualisht është i pabanueshëm”, tha Rami Alaze, një ekonomist i CNUCED i specializuar në ndihmën për palestinezët.

Ushtarët izraelitë

Ushtria izraelite po vazhdon operacionet në Gaza, veçanërisht në Khan Yunis, në jug. Këtë e bëri të ditur zëdhënësi ushtarak sipas të cilit në atë vend u shkatërrua "një pozicion lëshimi i raketave me rreze të gjatë". 

"Brigada e Parashutave vrau shumë njerëz të armatosur gjatë luftimeve të ngushta dhe u kryen bastisje të synuara ndaj Hamasit në zonë", tha zëdhënësi ushtarak.

IDF gjithashtu operoi në veri dhe në qendër të Rripit kundër milicëve të fraksionit islamik, duke bastisur "vendet e grupit terrorist".

Benjamin Netanyahu

Kryeministri i Izraelit, Benjamin Netanyahu, këmbëngul se një marrëveshje me Hamasin për të siguruar lirimin e më shumë se 100 pengjeve që ende mbahen në Gaza nuk do të vijë “me asnjë çmim”, pasi protestat e përhapura vazhdojnë në Izrael.

“Ne po punojmë për të arritur një kornizë shtesë për lirimin e robërve tanë, por theksoj: jo me çdo kusht. Unë kam vija të kuqe, mes tyre, ne nuk do ta përfundojmë luftën, nuk do të heqim IDF nga brezi dhe nuk do të çlirojmë mijëra terroristë”, tha ai mbrëmjen e së dielës (28 Janar), raporton CNN.

Familjet dhe protestuesit e tjerë vazhdojnë të bëjnë thirrje për lirimin e atyre që janë ende në robëri – duke përdorur sloganin “sillini në shtëpi tani”.

Gustavo Petro dhe Benjamin Netanyahu

Presidenti i Kolumbisë, Gustavo Petro, ka propozuar krijimin e një komisioni paqeje për t’i dhënë fund dhunës midis izraelitëve dhe palestinezëve.

Petro bëri thirrje për lirimin e pengjeve që ende mbahen në Gaza, raporton CNN.

“Unë e konsideroj si prioritet të ecim shpejt drejt një ndërprerjeje të menjëhershme të armiqësive dhe të fillojmë bisedimet për lirimin e të gjithë pengjeve”, shkroi Petro në një letër të datës 29 janar drejtuar kryeministrit të Izraelit, Benjamin Netanyahu.

Propozimi i Petro vjen pasi presidenti kolumbian tha se Netanyahu i shkroi atij më 11 janar duke i kërkuar ndihmë për lirimin e pengjeve.

Foto nga ushtarët izraelitë në Gaza

Gjatë vizitës së tij në SHBA, kryeministri i Katarit foli për rolin e vendit të tij në ndërmjetësimin e një marrëveshjeje të mundshme midis Izraelit dhe Hamasit.

“Unë mendoj se ne të gjithë duhet të bashkohemi pas ndalimit të kësaj lufte, shpëtimit të atyre jetëve, shpëtimit të atyre fëmijëve dhe atyre grave që të mos vriten dhe të ndiqen dhe bombardohen nga sulmet ajrore, nga tanket, nga çdo gjë”, tha Sheikh Mohammed bin Abdulrahman bin Jassim Al Thani.

Ai shtoi se nuk ishte i sigurt se kur do të arrihet një marrëveshje, duke thënë: “Gjithçka varet nga të dyja palët”.

Kryeministri paralajmëroi gjithashtu se nëse lufta nuk përfundon së shpejti, rreziqet e një konflikti më të madh rajonal do të rriten.

Josep Borrell

"Në Këshillin e jashtëzakonshëm Evropian do të flasim gjithashtu për situatën në Lindjen e Mesme dhe Rripin e Gazës. Unë do të them se sa e rëndësishme është të vazhdojmë të mbështesim UNRWA.
Hetimi, pas akuzave të Izraelit për gjoja bashkëpunimin e punonjësve të agjencisë së OKB-së me Hamasin gjatë masakrave të 7 tetorit, kjo duhet të bëhet, por ne nuk mund ta ndëshkojmë kolektivisht popullin palestinez". 

Kështu deklaroi përfaqësuesi i lartë i BE-së, Josep Borrell, në margjinat e samitit në Bruksel. 

Ai npo ashtu tha se "agjencia nuk mund të ndalojë së punuari, përndryshe qindra mijëra njerëz do të vdesin”.

Rebelët Houthi në Jemen pretendojnë se kanë goditur një anije tregtare amerikane në Detin e Kuq. Houthi tha se ka goditur anijen KOI.

Firma e sigurisë detare Ambrey tha se një anije që operonte në jug të portit të Adenit të Jemenit kishte raportuar një shpërthim në bord, por nuk përmendi emrin e anijes.

Zëdhënësi ushtarak Houthi, Yahya Sarea, tha të mërkurën se forcat e armatosura të lëvizjes kishin vënë në shënjestër një anije tregtare amerikane të quajtur KOI. Anija, tha ai, ishte nisur për në "portet e Palestinës së pushtuar", një frazë që Houthi e përdor për të nënkuptuar Izraelin.

Jemeni, shtoi ai, "nuk do të hezitojë" të hakmerret kundër "përshkallëzimit britaniko-amerikan".

“Të gjitha anijet amerikane dhe britanike në Detin e Kuq dhe Arabik janë objektiva legjitime për Forcat e Armatosura të Jemenit për sa kohë që agresioni amerikano-britanik kundër vendit tonë vazhdon”, tha zëdhënësi Houthi.

Ndërkohë, SHBA ka kryer në Jemen duke lëshuar 10 dronë.

Lexo KËTU: SKEDA/ Kush janë rebelët Houthi dhe pse po sulmojnë anijet në Detin e Kuq?