Lufta/ 8 mijë të vdekur në Rripin e Gazës! Përplasje mes ushtarëve izraelitë dhe palestinezë! Biden bisedë telefonike me Netanyahun: Mbroni civilët në Gaza

Ushtria izraelite ka deklaruar se disa prej raketave të rëna të territotin e saj janë lëshuar nga brenda territorit të Sirisë.

"Janë identifikuar lëshimet e raketave nga Siria në drejtim të territorit izraelit. Raketat ranë në një zonë të pabanuar. Ushtarët po përgjigjen me zjarr drejt origjinës së lëshimeve."-bën me dije ushtria izraelite, transmeton La Repubblica.

Objektet pranë spitalit Al Quds në Rripin e Gazës u goditën nga një raketë.

Shoqata Palestineze e Gjysmëhënës së Kuqe ka postuar në X (i njohur më parë si Twitter), pamjet që tregojnë brendësinë e spitalit Al-Quds në Gazën veriore.

Njerëzit mund të shihen duke mbuluar gojën dhe hundën brenda ndërtesës, e cila është e mbushur me tym.

Presidenti i Shteteve të Bashkuara, Joe Biden ka zhvilluar një bisedë telefonike me kryeministrin izraelit Benjamin Netanyahu. Kjo është biseda e tyre e parë që kur ka nisur lufta.

Sipas raportimeve të mediave të huaja, Biden ka theksuar nevojën që Izraeli të mbrojë qytetarët e vet nga terrorizmi në një mënyrë të tillë që mbron civilët, tha Shtëpia e Bardhë.

Biden gjithashtu theksoi nevojën për të rritur menjëherë fluksin e ndihmës humanitare "për të përmbushur nevojat e civilëve në Gaza".

Shtëpia e Bardhë bëri me dije se është zhvilluar telefonata, por nuk dha shumë detaje. Administrata e Presidentit amerikan, Biden është vendosur gjithnjë e më shumë nën trysni për ta bërë të qartë se mbështetja e palëkundur ndaj Izraelit, nuk do të thotë miratim për të gjitha veprimet e aleatit të Shteteve të Bashkuara në enklavën e varfër bregdetare.

Më herët në disa intervista për televizionet amerikane, këshilltari i Sigurisë Kombëtare të Shtëpisë së Bardhë, Jake Sullivan, tha se Izraeli ka përgjegjësinë të mbrojë jetët e njerëzve të pafajshëm në Gaza.

Marwan Jilani, drejtor i përgjithshëm i Gjysmëhënës së Kuqe Palestineze, tha për BBC se objektet pranë spitalit Al Quds në Gaza u goditën nga një raketë.

“Një raketë ra disa metra larg, duke dëmtuar dritaret dhe duke i detyruar njerëzit të ndërtesës të zhvendoseshin në një tjetër, tha ai.

Federata Ndërkombëtare e Shoqatave të Kryqit të Kuq dhe Gjysmëhënës së Kuqe (organizata ombrellë e Gjysmëhënës së Kuqe Palestineze) tha në një deklaratë se punonjësit shëndetësorë në spital raportojnë 'sulme të dhunshme dhe granatime shumë afër spitalit'.

Mjekët dhe Gjysmëhëna e Kuqe Palestineze që punojnë në spital thanë më herët të dielën se ushtria izraelite u tha të evakuoheshin menjëherë.

Megjithatë, Gjysmëhëna e Kuqe tha se brenda spitalit po trajtohen 400 pacientë dhe se zhvendosja e tyre do të ishte e pamundur.

Organizata thotë se ka pacientë në njësitë e kujdesit intensiv dhe foshnja në inkubatorë dhe lëvizja e tyre është e pamundur.

Rreth 14,000 civilë mendohet gjithashtu se janë strehuar në spital dhe mjediset e tij. Zona përreth spitalit është goditur nga sulmet ajrore gjatë gjithë ditës.

Ushtria izraelite (IDF) ka përditësuar numrin e pengjeve në Rripin e Gazës pas sulmit të nisur nga Hamasi më 7 tetor në jug të Izraelit. Njoftimi është bërë nga zëdhënësi izraelit i IDF, Daniel Hagari, i cili tha se në duart e Hamasit janë 239 pengje.

Ai tha se në mesin e pengjeve ka punëtorë të huaj dhe se numri nuk përfshin katër pengjet tashmë të liruar, përkatësisht Judith dhe Natalie Ra'anan, si dhe Yocheved Lifshitz dhe Nurit Cooper.

Ministria e Shëndetësisë në Gazën e udhëhequr nga Hamasi tha se numri i palestinezëve të vrarë që kur nisi lufta me Izraelin më 7 tetor ka kaluar shifrën prej 8.000.

Kjo ministri tha të dielën se numri i palestinezëve të vrarë ka arritur në 8.005, përfshirë mbi 3.300 të mitur dhe mbi 2.000 gra.

Sipas disa raportimeve, mësohet se së fundmi ka patur përleshje të dhunshme midis ushtarëve izraelitë dhe palestinezëve të armatosur në veri të Rripit të Gazës, pranë vendkalimit Erez me shtetin hebre. Sipas të njëjtit burim, ushtarët dolën nga një tunel disa qindra metra i gjatë nga kufiri i afërt me Izraelin dhe u përplasën me ushtarët izraelitë. Bëhet me dije se shumë luftëtarë palestinezë janë vrarë. Izraeli nuk ka dalë akoma nuk ka dalë një sqarim zyrtar për rastin në fjalë, transmeton La Repubblika.

Presidenti i Francës Emmanuel Macron

Presidenti i Francës Emmanuel Macron ka ripërsëritur thirrjen për armëpushim në Gaza.

Macron bën me dije se Franca ka dërguar rreth 17 ton ndihma humanitare. Sasia galopante me ndihma humanitare ndodhet në Egjipt dhe duhet të shpallet armëpushim mes palëve për t’iu shpërndarë civilëve në Gaza.

“Përsëris thirrjen time për një armëpushim humanitar për të mbrojtur popullin e Gazës. 17 ton ngarkesë humanitare kanë mbërritur nga Franca në Egjipt. Ne vazhdojmë përpjekjet tona nga ajri dhe deti. Në solidaritet së bashku, së bashku me Egjiptin dhe Gjysmëhënën e Kuqe".-ka deklaruar Macron, trasmenton La Repubblika.

SHBA i ka bërë thirrje Izraelit të rikthejë komunikimet në Gaza. Këtë e raporton Wall Street Journal, sipas të cilës amerikanët i kanë thënë qartë Izraelit se nterneti dhe valët telefonike duhet të rikthehen, trasmeton La Repubblica.                        

Izraeli vazhdon varrosjen e njerëzve të vrarë më 7 tetor, nga sulmet me raketa të Hamasit, ku 1400 njerëz u vranë dhe 230 të tjerë u morën peng.

Agjencia e Kombeve të Bashkuara për refugjatët palestinezë tha se mijëra persona kanë hyrë me forcë në depo të ndihmës në Gazë për të marrë ushqime dhe “gjësende të tjera elementare për mbijetesë”.

Thomas White, drejtor i agjencisë në Gazë, tha më 29 tetor se kjo hyrje në depotë e ushqimeve “është një shenjë shqetësuese se rendi civil ka filluar të prishet” pas tre javësh luftë mes Izraelit dhe Hamasit.

Agjencia, që njihet si UNRWA, ofron shërbime bazike për qindra mijëra persona në Gazë. Shkollat që udhëhiqen nga kjo agjenci në mbarë Rripin e Gazës janë shndërruar në strehimore për palestinezët e zhvendosur nga konflikti.

Pasi një turmë palestinezësh bastisi magazinat e UNRWA-s në Deir el-Balah (në jug të qytetit të Gazës ), policia e Hamasit ndërhyri dhe bëri arrestime të shumta. ANSA thotë policia ka arritur të rikuperojë një pjesë të madhe të sasive të grabitura. Me këtë lëvizje furrtarët, të cilët kishin kërcënuar se do të mbyllnin bizneset e tyre pasi ishin viktima të episodeve të dhunës, siguruan se nesër do të prodhojnë bukë për popullatën me kusht që policia t'i garantojë mbrojtjen.

Nga përleshjet midis ushtrisë izraelite dhe banorëve në Bregun Perëndimor sot, gjithsej pesë palestinezë u vranë.

Lajmi është bërë i ditur nga agjencia palestineze e lajmeve Ëafa.

Incidentet më të rënda ndodhën në kampin e refugjatëve Askar (Nablus) dhe në Tubas. Në kampin e refugjatëve në Deheishe (Bethlehem) një i ri u godit nga një plumb i qëlluar nga ushtria, ndërsa ishte në çatinë e shtëpisë së tij.

Trupi i tij u zbulua vetëm më vonë. Tensioni i ri ndihet në Bregun Perëndimor për shkak të luftës së vazhdueshme në Gaza.

Në Rripin verior të Gazës, ushtarët izrealitë dhe militantë të Hamasit janë përplasur me njëri tjetrin.

 “Operacionet në terren në veri të Rripit të Gazës" vazhdojnë, ku pati përleshje me persona të armatosur të Hamasit që kishin qëlluar ndaj trupave izraelite”, shkruan ushtria izaelite.

Forcat e Mbrojtjes së Izraelit kanë deklaruar se kanë goditur më shumë se 450 objektiva gjatë ditës së kaluar, duke përfshirë qendrat e komandës, pikat e vëzhgimit dhe vendet e lëshimit të raketave, ndërsa Izraeli zgjeroi operacionin e tij në Gaza. Sot janë publikuar pamje me momenet e sulmeve të objektivave të Hamasit.

Pas lëshimit të raketave të shumta nga Libani drejt zonës Har Dov, ushtria izraelite si kundërpërgjigje po godet tani vendin e origjinës nga i cili u lëshuan raketat. Këtë e ka bërë të ditur zëdhënësi i ushtrisë izraelite.

Ushtria izraelite dhe grupi Hezbollah në Liban, që ka mbështetjen e Iranit, kanë këmbyer zjarr në baza ditore, që kur nisi konflikti midis Izraelit dhe grupit militant palestinez, Hamas, në Rripin e Gazës.

Numri i njerëzve të vrarë në Gaza është rritur. Hamasi deklaron se mbi 8 mijë persona janë vrarë. Sipas ministrisë së shëndetësisë së Gazës “Rreth 3,342 fëmijë janë në mesin e atyre që kanë vdekur që nga 7 tetori”.

Bombardimet në rripin e Gazës nuk ndalen, ndërsa banesat, spitalet dhe objekte të ndryshme kanë marrë pamjet e një rrënoje. Nga sulmet u shkatërruan një numër i lartë banesash.

Në fotot e mëposhtme shihen grumbuj sendesh, rrënojash dhe armaturë të mbetura nga shpërthimet, njerëz të vdekur e të bllokuar nën rrënoja e të tjerë të plagosur rëndë.

Mijëra protestues pro-palestinezë dolën dje në rrugët e Bruklinit, Nju Jork, SHBA, për të protestuar kundër bombardimeve të Izraelit të Rripit të Gazës.

Një protestë masive kundër luftës së Izraelit kundër Hamasit në Gaza u organizua gjithashtu nga një organizatë hebraike e Nju Jorkut të premten në Stacionin Qendror të Manhatanit, ku qindra njerëz u arrestuan nga policia.

Avionët izraelitë mëngjesin e së dielës kanë kryer sulme ajrore pranë spitalit më të madh në Gazë, që është i mbushur me pacientë dhe dhjetëra mijëra palestinezë që po kërkojnë strehim, thanë banorët. Izraeli tha se militantët e Hamasit – që udhëheqin Gazën – kanë një qendër komanduese nën spital, duke mos dhënë dëshmi të tjera për këtë pretendim.

Agjencia e OKB-së për refugjatët palestinezë ka paralajmëruar për anarki në Rripin e Gazës pas plaçkitjes së dyqaneve dhe qendrave të shpërndarjes humanitare.

“Mijëra njerëz hynë në dyqane dhe qendra të shumta të shpërndarjes së UNRWA-s në Gaza qendrore dhe jugore”, thuhet në një deklaratë.

“Është një shenjë shqetësuese e rendit që po shembet për shkak të rrethimit dhe bombardimeve.

Tre palestinezë u vranë nga sulmi i ushtrisë izraelite në Bregun Perëndimor të pushtuar, kjo është bërë e ditur nga Ministria e Shëndetësisë e Autoritetit Palestinez.

Sipas ministrisë, përleshjet me ushtrinë izraelite ndodhën në Beit Rima, në rajonin Ramallah, në Tamoun dhe në kampin e refugjatëve Askar në Bregun Perëndimor verior.

Ministria tha gjithashtu se më shumë se 110 palestinezë janë vrarë në Bregun Perëndimor gjatë operacioneve të ushtrisë izraelite që nga shpërthimi i luftës në Rripin e Gazës midis Hamasit dhe Izraelit më 7 tetor, i shkaktuar nga sulmi vdekjeprurës i paprecedentë nga lëvizja palestineze në Izrael.

Hamasi thotë se është gati që të bëjë shkëmbimin e pengjeve në këmbim të të gjithë të burgosurve palestinezë në burgjet izraelite. Deklaratën e bëri Kreu i Hamasit në Rripin e Gazës, Yahya Sinëar.

“Ne jemi gatipër lirimin e të gjithë të burgosurve në burgjet e armikut sionist, në këmbim të pengjeve në duart e rezistencës”, tha ai në një deklaratë.

Presidenti i Iranit Ebrahim Raisi tha se sulmet e Izraelit kanë “kaluar vijat e kuqe, të cilat mund t’i detyrojnë të gjithë të ndërmarrin veprime”.

"Uashingtoni na kërkon të mos bëjmë asgjë, por ata vazhdojnë të japin mbështetje të gjerë për Izraelin. Shtetet e Bashkuara i kanë dërguar mesazhe forcave të mbështetura nga Irani në Lindjen e Mesme, por kanë marrë një përgjigje të qartë për terreni i betejës”, shtoi ai.

Autoritetet amerikane kanë paralajmëruar Iranin që të qëndrojë jashtë luftës Izrael-Hamas, për të parandaluar një konflikt më të gjerë rajonal.

Grupi Hezbollah, i cili ka bazën në Liban dhe i mbështetur gjithashtu nga Irani, ka shkëmbyer zjarr me Izraelin javët e fundit.

Forcat e Mbrojtjes të Izraelit thonë se avionët luftarakë kanë goditur dje rreth 450 objektiva të Hamasit në Rripin e Gazës.

Sipas IDF, objektivat përfshinin qendrat e komandës së Hamasit, pikat e vëzhgimit dhe pozicionet e lëshimit të raketave antitank.

Ushtria gjithashtu zgjeroi operacionet tokësore në Rripin e Gazës gjatë natës, me hyrjen e forcave shtesë.

Ushtria izraelite ka postuar foto duke u përgatitur për sulm tokësor në Gaza.

Kryeministri izraelit Benjamin Netanyahu tha në një fjalim televiziv të shtunën se Izraeli ka hyrë në fazën e dytë të luftës së tij me Hamasin dhe ka vendosur ushtarë dhe komandantë "në të gjithë" Rripin e Gazës.

Ai thotë se "kjo do të jetë një luftë e gjatë dhe e vështirë". "Jemi gati për pushtim tokësor".