Niveli i transparencës, në çfarëdo lloj gjykimi dhe jo vetëm për personazhe publikë, duhet të afrohet me standartin e vendosur nga Gjykata Europiane e Drejtësisë e cila transmeton live nëpërmjet kanalit të saj TV seancat gjyqësore që zhvillohen pranë saj.

Palët, Avokatia, Prokuroria dhe Gjykata nuk kanë përse të kenë dyshime nga aplikimi i një standarti të tillë, dhënia e drejtësisë është shërbim që i jepet jo vetëm rastit konkret por edhe parandalimit të përsëritjes së rasteve të tjera.

Sidomos në gjykimet penale të themelit të çështjes, ku është mbyllur hetimi, kërkesa për transmetimin e seancës live (në kanale zyrtare të çertifikuara mbi sigurinë) është e drejtë dhe ska asnjë arsye përse të refuzohet. Ka mekanizma teknikë që lejojnë mostransmetimin e figurës për momente të caktuara proceduriale.

Refuzimi i këtyre kërkesave pa arsyetim të logjikshëm e bën procesin të brishtë dhe i jep frymë paragjykimit ndaj një sistemi të tërë, fillojmë të kuptojmë që transparenca është element i rëndësishëm komunikimi që jep edhe panoramën e saktë të nivelit të palëve dhe vetë gjykatës dhe çon në forcimin e një sistemi drejtësie që aplikon vetëm ligjin.