Ish-kryetari i PD, Lulzim Basha ka zhvilluar një takim me demokratët e degës nr 6 në Tiranë. Sipas Bashës kjo kohë reflektimi i ka shërbyer atij për të parë edhe më qartë se sistemi politik ka degraduar.

Basha thekson se sherret, akuzat, gjuha e urrejtjes nuk mund të jenë përgjigjja për sfidat e mëdha që ka vendi. Ai shprehet se më shumë se 70% të qytetarëve e kanë refuzuar këtë sistem politik.

"Mirënjohje për punën dhe sakrificat e demokratëve të Degës nr.6 në Tiranë. E pranova me kënaqësi ftesën e tyre për një bashkëbisedim të hapur mbi shqetësimet që të gjithë ne si qytetarë dhe demokratë bashkëndajmë sot. Kjo kohë reflektimi më shërbeu të shihja edhe më qartë sesi ky sistem politik ka degraduar në një shfaqje që ka në qendër hallet e pak politikanëve, jo problemet e qytetarëve. Sherret, akuzat, gjuha e urrejtjes nuk mund të jenë përgjigjja për sfidat e mëdha që ka vendi. Më shumë se 70% të qytetarëve e kanë refuzuar këtë sistem politik, që nuk ofron asnjë zgjidhje për shqetësimet e përditshme të shqiptarëve.

Kjo shumicë e heshtur kërkon një ndryshim rrënjësor në punët e vendit, një alternativë që pasqyron aspiratat e njerëzve, i dëgjon dhe fuqizon ata. Partia Demokratike mund të sjellë këtë ndryshim, në bashkëpunim të ngushtë me qytetarët dhe partnerët tanë ndërkombëtarë", shkruan Basha. 

Rendit zhvillimet sipas orarit:
Ora 20:56
FOTO-LAJM/ Doli rival i Bashës për garën e PD, Gjergj Hani pjesë në takimet e ish kryedemokratit 

Gjergji Hani është i pari kandidat për garën për kreun e PD, dhe njëherësh i pari rival i Lulzim Bashës që synon rikthimin në krye të selisë blu.  

Por pavarësisht se ‘rival’ për garën për kryetar, Gjergji Hani është shfaqur në takimet e ish kryedemokratit. 

Në fotot që vetë Basha ka shpërndarë në rrjetet sociale të takimit në degën 6, pjesëmarrës ka qenë edhe Hani.

M.Q./Shqiptarja.com