Shkodër - Edhe në qytetin e Shkodrës kanë mbërritur garat Rally “Off Road” ku marrin pjesë kryesisht pilotë nga Italia, por edhe Shqipëria. Ka qenë Kryetari i Bashkisë së Shkodrës, Lorenc Luka ai i cili në emër të bashkisë Shkodër i ka uruar mirëseardhjen ndërsa ka theksuar se këto aktivitete shërbejnë në zbulimin e perlave natyrore që gjenden në Veriun e Shqipërisë.
“Të jetë një mesazh i një bashkëpunimi dhe i një promovimi për territorin e Shkodrës. Ne ju urojmë në vazhdimësi ju të bëheni përcjellësit, të bëheni marketingu për qytetin e Shkodrës”, tha Kryetari i Bashkisë Lorenc Luka.
Ndërsa zvministri i Turizmit Kulturës Rinisë dhe Sporteve, Nikoll Lesi i ka garantuar turistët se do të kënaqen me bukuritë e natyrës së metropolit verior e sidomos në zonën e Thethit.
“Ju doni të shkelni çdo cep të Shqipërisë që është e mrekullueshme. Duan të provojnë ushqimin karakteristik shqiptar, i jashtëzakonshëm”, u shpreh zv/ministri Nikoll Lesi.
Më pas ka qenë presidenti i automobilave, Niko Leka i cili është shprehur entuziast për këtë rrugëtim nëpër vendet më të bukura të metropolit verior.
“Kjo është një etap shumë e bukur sepse përfshin qytetin e Shkodrës, që është një nga qytetet e veçanta në Shqipëri”, përfundoi Niko Leka.
Terreni i thyer malor si dhe natyra e virgjër, e bëjnë Shqipërinë një vend ideal për t’u eksploruar nga të pasionuarit e garave “Rally”. Në mitingun ndërkombëtar “Off Road”, marrin pjesë pilotë kryesisht nga Italia por edhe Shqipëria, që për 8 ditë me radhë do t’i bien përqark Shqipërisë me makinat tip fuoristradë, të përshtatura posaçërisht për terrenet malore.
(v.gj/shqiotarja.com)
![](https://www.shqiptarja.com/template/img/sh_logo1.png)