Deputeti çek: Turbulencat para negociatave s'janë fatlume, kthehuni në Kuvend! Balla: Jo pushtet me dhunë

Kryetari i Grupit Parlamentar të Partisë Socialiste, Taulant Balla zhvilloi një takim me një grup deputetësh, anëtarë të Komisionit për Çështjet Europiane në Dhomën e Deputetëve të Parlamentit të Çekisë. Duke folur për vendimin e djegies së mandateve nga ana e deputetëve të opozitës, Balla tha se ky është një hap i pamenduar mire.

“Si në çdo vend demokratik marrja e pushtetit me dhunë apo përpjekjet për delegjitimimin e proceseve demokratike është e papranueshme dhe e pa tolerueshme. Asnjë parti politike në Shqipëri nuk ka të drejtë të dëmtojë perspektivën europiane të Shqipërisë dhe se mandatet parlamentare përfaqësojnë vullnetin e popullit. Dorëzimi apo dorëheqja prej tyre është injorimi i vullnetit të popullit”deklaroi Balla.

Duke komentuar vendimin e opozitës, Benešík deklaroi se fusha e betejës e një deputeti të opozitës është Parlamenti. “Nga këndvështrimi Europian dua të them se një turbulencë politike në një situatë të tillë kur jeni përpara hapjes së bisedimeve për integrimin europian nuk është fatlume. Puna e opozitës është që të zëvendësojë partinë që është në fuqi, por mjetet që duhet të zgjedhin duhet të jenë kushtetuese dhe në kuadër të ligjit. Kjo është një e drejtë që askush nuk mund t'ja marrë opozitës, por dhe si deputet i opozitës dua të them se fusha e betejës e një deputeti të opozitës është Parlamenti' tha ai.

TAG:
• taulant balla
• djegia e mandateve
• Ondrej Benešík