'Maskaradë e krijuar qëllimisht', Rama reagon sërish për vrasjen e Egli Progës: Nuk ka kontradiktë, vetëdorëzimi i autorit ndodhi si pasojë e punës së policisë

Kryeministri Rama ka reaguar sërish lidhur me vrasjen e Egli Progës në Pogradec, duke iu drejtuar atyre që sipas tij përhapën keqinformim dhe dezinformim.

Rama i referohet atyre që shpallën se në deklaratat e policisë sot kishte kontradiktë, pasi më herët u raportua se autori i vrasjes Denis Meçe u vetëdorëzua, ndërsa më pas policia thotë se u kap falë punës së policisë. Rama shprehet se Denis Meçe u vetëdorëzua falë punës së policisë dhe jo si akti vullnetar i një vrasësi.

Kryeministri e quan si maskaradë, dezinformimin sipas tij edhe lidhur me mos gjendjen e urgjencës në kohë në vendngjarje. Urgjenca, vijon më tej Rama, i ka të regjistruara sekondat e thirrjeve përkatëse, për të parë se kur është përgjigjur dhe kur ka mbërritur në vendin e ngjarjes në Pogradec.

Reagimi i Ramës në X: 

'Ata që kanë krijuar çorbën e pistë kundër policisë dhe urgjencës tani flasin për deklarata kontradiktore të shtetit apo për vetëdorëzim të autorit, ndërkohë që s’ka pasur asnjë deklaratë kontradiktore apo a thua se vetëdorëzimi brenda pak orësh i autorit dhe arrestimi i tij, janë gjëra kontradiktore, kur në fakt vetëdorëzimi sikundër e tregon qartë e gjithë dinamika e reagimit përkatës është rezultat i punës së policisë e jo një akt vullnetar nga hiçi i vrasësit! 

Ky është rasti tipik i një maskarade të krijuar qëllimisht dhe si provë e maskaradës mjafton vetëm fakti se askush nga nxitësit dhe komentatorët e maskaradës nuk iu referua asnjë çast komunikatës së Policisë Vendore të Korçës, po së bashku iu referuan dizinformimeve e keqinformimeve të njëri-tjetrit për të helmuar sa më shumë opinionin publik. 

Prandaj nuk do as mend e as kalem për të kuptuar se dalja publike e niveleve më të larta të Policisë së Shtetit dhe të Urgjencës Kombëtare, as nuk do të kishte pse të ndoshte nëse burimet e dizinformimit e të keqinformimit do t’i ishin referuar fakteve dhe jo sajesave të njëri-tjetrit. 

Dhe faktet janë në dosjet e të dyja institucioneve, madje Urgjenca Kombëtare i ka në një regjistër digjital minutat e sekondat e thirrjeve përkatëse, mu si një pasqyrë kokëfortë për të parë realitetin e të gjithë reagimit shtetëror dhe dallimin e tij me filmin e neveritshëm të të njëjtëve sharlatanë të paudhë që maskaradat i kanë profesion në politikë e në media.', shkruan Rama në X.

Lajmi ne perditesim...

G.K/Shqiptarja.com

TAG:
• edi rama
• vrasja e egli proges
• pogradec