Mbledhja e Këshillit Kombëtar, deputetët që e bojkotuan: Nuk ishte legjitime, s’u plotësua kuorumi

Deputetët e grupit të PD, që bojkotuan edhe mbledhjen e Këshillit Kombëtar, kanë dalë me një deklaratë, ku thonë se mbledhja nuk ishte legjitime, pasi nuk u plotësua kuorumi. Në deklaratë thuhet se këta deputetët do të zhvillojnë takime individuale me secilin anëtar legjitim të Këshillit Kombëtar mbi situatën në PD.

“Ne, deputetët, anëtarët e Kryesisë dhe anëtarët e Këshillit Kombëtar të Partisë Demokratike, me shqetësim kemi ndjekur aktet e njëanshme të ndjekura nga një pjesë e Kryesisë së Partisë, të cilat kanë kulmuar sot me një falsitet antistatutor, duke konsideruar një takim pakuorum, si mbledhje të Këshillit Kombëtar të PD.

LEXO EDHE:
Gazetari zë ngushtë Belind Këlliçin: Pse nuk flisni më për kompaninë ‘Qefalia’? Keni marrë gjobën? (VIDEO)

Pasi kemi marrë kopje të anëtarësisë së Këshillit Kombëtar të PD të depozituar dhe regjistruar në Zyrën e Regjistrit të Partive Politike pranë Gjykatës së Shkallës së Parë Tiranë dhe konfirmimin zyrtar të organeve përgjegjëse statutore, konstatojmë se Këshilli Kombëtar i PD ka aktualisht në detyrë 453 anëtarë nga 478 anëtarë gjithsej të dalë nga Kuvendi Kombëtar i PD datë 17 Korrik 2022.

Me përgjegjësinë për të mbrojtur interesin e demokratëve dhe Partisë Demokratike, konstatojmë se sot nuk ka patur një mbledhje legjitime të Këshillit Kombëtar të PD. Duke e konsideruar antistatutor rezultatin e takimit të sotëm, për të shmangur një tjetër ngërç në PD, për të ndalur përçarjen e mëtejshme të Partisë Demokratike, si dhe për të garantuar forcimin e Partisë Demokratike, deklarojmë se:

Duke nisur nga sot do të ndërmarrim iniciativën për të kontaktuar individualisht dhe vlerësuar vullnetin e secilit anëtar legjitim të Këshillit Kombëtar mbi situatën në Partinë Demokratike dhe do të vazhdojmë përpjekjet për forcimin e Partisë Demokratike, të bindur se aktet përçarëse, përjashtimet, njëanshmëria dhe nxitimi, nuk ndihmon në ringritjen e PD”, thuhet në deklaratën e grupit të PD.

Lajmi kryesor:

Zgjedhja e kryetarit të ri, Këshilli Kombëtar i PD ngre Komisionin Zgjedhor! Bardhi e 16 deputetë e bojkotojnë: Mbledhja ilegjitime

SI.E./Shqiptarja.com

TAG:
• PD
• PD zgjedh kryetarin e ri
• Lufta brenda PD