Mblidhen në Matera të Italisë ministrat e Jashtëm të G20, diskutojnë përgjigjen globale ndaj pandemisë

Ministrat e Jashtëm të G20 dhe Ministrat e Zhvillimit u takuan fizikisht të martën në Itali për herë të parë pas dy viteve.

Ky samit në Itali, e cila mban presidencën e G20 është fokusuar në tri çështje, njerëzit, planeti dhe prosperiteti.

Por, në rrethanat aktuale shumica e çështjeve do të shihen përmes prizmit të strategjive pandemike dhe globale.

 “Pandemia e ka theksuar nevojën për një përgjigje ndërkombëtare ndaj urgjencave që i kalojnë kufijtë kombëtarë”, deklaroi në takim ministri i Jashtëm i Italisë, Luigi Di Maio.

Ministri i Jashtëm gjerman Heiko Maas tha se ai do të hapte diskutimin në lidhje me mënyrën se si Kina dhe Rusia kishin ofruar vaksinat e tyre për të rritur influencën e tyre në disa vende.

" Kjo nuk ka të bëjë me arritjen e avantazheve gjeostrategjike afatshkurtra," tha ai para takimit.

Sekretari amerikan i Shtetit Antony Blinken përsëriti rëndësinë e dërgimit të vaksinave në vendet e varfëra qën kanë vështirësi në sigurimin e tyre.

Ai tha se kriza shëndetësore kishte përkeqësuar pabarazinë ekonomike në të gjithë botën dhe G20 do të vazhdojë të ndihmojë vendet me të ardhura të ulëta të adresojnë "krizat e tyre të borxhit".

Italia, e cila tani e ka presidencën e përkohshme të Grupit G20, ka deklaruar se vëmendje e veçantë do t’i kushtohet Afrikës, me theks në zhvillimin e qëndrueshëm.

Shtetet anëtare të G20-ës përbëjnë mbi 80 për qind të prodhimit botëror, 75 për qind të tregtisë botërore dhe 60 për qind të popullsisë së planetit. Në Itali po marrin pjesë fizikisht në takim kryediplomatët e Shteteve të Bashkuara, Britanisë së Madhe, Gjermanisë, Francës, Japonisë dhe Indisë.

Ministrat e jashtëm të Kinës, Brazilit dhe Australisë vendosën që në takim të marrin pjesë në mënyrë virtuale, ndërsa Rusia e Koreja Jugore dërguan zëvendësministra.

TAG:
• itali
• G20
• samiti G 20