Këshilli Kombëtar i Integrimit, Tabaku: Shqipëria e papërgatitur për negociatat! Balla: I kemi plotësuar kushtet! Mazi: Jemi gati, negociatat me metodologjinë e re

Deputeti i Partisë Demokratike, Gazmend Bardhi gjatë fjalës së tij në mbledhjen e Këshillit Kombëtar të Integrimit, tha se zgjatja e mandatit të vettingut, nuk është prioritet. Sipas Bardhit nuk krijon asnjë ngërç, pasi kushtetuta ka parashikuar zgjidhjen.

“Për fat të keq edhe pasi kemi hyrë në virin e gjashtë ka zero rezultate në raport me të dyja objektivat madhore që kishte reforma në drejtësi. Në se vazhdojmë me të njëjtën njësi matëse edhe kur të jemi në vitin e 16 do të quajmë sukses që po plotësojmë gjykatat e  apelit. Kjo ka sjell të kundërtën e asaj që prisnin qytetarët. Nuk bie dakord që të anashkalohen prioritetet e procesit të integrimit në raport me reformën në drejtësi. Siç është fjala vjen zgjatja e mandatit të vettingut, nuk është prioritet sepse nuk ka asnjë ngërç kushtetues në atë drejtim. Kushtetuta ka dëshmon zgjidhje, ishin ata që në 2018 shkurtuan gjysmë për gjysmë stafin mbështetës të organeve të vettingu-t. Asokohe opozita ngriti zërin që stafet të ishin të pajisur me burime njerëzore të mjaftueshme. Kërkesa nuk u mor në konsideratë, numri i këshilltarëve u përgjysmua.” u shpreh Bardhi.

Në mbledhjen e Këshillin të Integrimit, deputeti i Partisë Demokratike Oerd Bylykbashi u ndal te zgjedhjet e 25 prillit. Bylykbashi tha se këto zgjedhje edhe sipas raportit të OSBE-ODIHR nuk ishin as të lira as të ndershme. Sipas Bylykbashit pati një përsëritje të shkeljeve dhe se problem mbetet edhe shitblerja e votës si dhe mos ndëshkimi i saj nga SPAK.

‘Raporti më i mirë ka qenë në 2009. Është përsëritur në këtë raport shkeljet e një numri të OSBE-së. U bë kontroll mbi zgjedhësit ndërmjet të dhënave personale. Problem mbetet shitblerja e votës dhe nuk kemi dënime. Këto zgjedhje nuk ishin as të lira as të ndershme, këtë e thotë edhe OSBE-ODIHR. Është ngritur një sistem gjigand për të kontrolluar votuesit për të kontrolluar zgjedhësit. Kemi ndryshim të sistemit zgjedhor në mënyrë të njëanshme. Është detyra e shtetit të garantojë zgjedhje të lira e të ndershme, por kemi ndërhyrje sistematike të shtetit në procesin zgjedhor. Zgjedhjet e 25 prillit ishin maksimumi. SPAK-u duhet të godiste shitblerjen e votës, nuk e bëri dhe as nuk e parandaloi. Garancitë që prodhuan në mënyrë të qëllimshme dështuan.’- tha Bylykbashi.

Kryenegociatori i Shqipërisë për Integrimin, Zef Mazi tha se negociata për Shqipërinë po zhvillohen me metodologjinë e re që nëse nuk ka progres do të cilësohet regres dhe kjo mund të nis negociatat për një çështje nga fillimi. Megjithatë Mazi tha se Shqipëria është e përgatitur teknikisht dhe politikisht që kjo të mos ndodhë dhe BE të jap një datë deri në fund të vitit për konferencën ndërqeveritare.

"Është ndjekur realizmi i planit kombëtarë të integrimit. Për 2020 Shqipëria realizon 89 % të planit, për 2021 procesi është në ndjekje nga afër. Negociata do të bëhen me metodologjinë e re që do të jetë më rigoroz dhe në kohë që nuk do të ketë progres do të quhet automatikisht regres. Në këtë rast negociatat nisin nga fillimi, por ne jemi të përgatitur teknikisht dhe politikisht që kjo të mos ndodhë. Shpresoj se BE të gjet forcën e duhur tani dhe fundi i vitit të mos na gjejë duar bosh", tha Mazi

Ministrja e Jashtme, Olta Xhaçka ka e cilësuar progres raportin e 2021 si më pozitivin ndër vite, ndërsa tha se në të janë vlerësuar arritjet konkrete që ka bërë Shqipëria. Gjatë mbledhjes së Këshillit Kombëtar të Integrimit, Xhaçka tha qeveria do të vijojë me përparimin e reformave dhe mbatjen e një politike të jashtme të njëjtë me atë të BE sa i përket çështjeve madhore.

" Është raporti më pozitiv që unë mbaj mend, arritjet janë konkrete dhe rikonfirmon se Shqipëria ka përmbushur të gjitha kushtet. Ky është lajm i mirë për të gjithë ne se në fund të ditës, pavarësisht mosdakordësive mes nesh, kur vjen puna për integrimin, shumica e shqiptarëve është pro integrimit. Shqipëria dhe Maqedonia e Veriut duhet të kishin një datë për konferencën e parë ndërqeveritare si diçka e merituar kur dy vendet kanë bërë detyrat e tyre dhe si përmbushje e premtimeve të BE.   

Negociatat do të zhvillohen me metodologjinë e re dhe do të jenë më rigoroze dhe ne do të ndjekim me përpikmëri të gjitha rekomandimet e BE duke vazhduar me qasjen tone politike konstruktive dhe gjithëpërfshirëse me rajoni dhe linjëzimin e plotë të politikës së jashtme me atë të BE sa i përket çështjeve madhore", tha Xhaçka.

Nënkryetari i Këshillit Kombëtar të integrimit, Taulant Balla tha se raporti edhe një herë konfirmoi se Shqipëria i ka plotësua kushtet për mbajtjen e konferencës së parë ndërqeveritare. Balla tha se ai shpreson se kjo të ndodh para Krishtlindjeve. Ai gjithashtu ripërsëriti qëndrimin e mazhorancës për të zgjatur afatin e vettingut dhe ftoi opozitën të bashkëpunojnë për këtë proces.

"Nëse rikujtojmë raportin për 2020 KE shprehet qartë për përmbushjen e kushteve dhe shpresoj që brenda krishtlindjeve të mbahet konferenca ndërqeveritare. Pavarësisht kësaj rezultat janë të dukshme dhe vullneti i kësaj mazhoranca mbetet i palëkundur dhe nuk jemi as ne dhe as opozita që janë një shumicë e madhe mbështesë e këtij procesi. Ne si mazhorancë kemi vullnet për progresin e sundimit të ligjit. Mazhoranca do të vijojë mbështetjen zgjatjes së afateve të vetingut dhe jemi të hapur për të bashkëpunuar me opozitën", tha Balla.