Mbrojtja e fëmijëve OSBE, Italia e
Shqipëria projekt të përbashkët

Shqipëria, Italia dhe Prezenca e OSBE-së kanë nisur zbatimin e një projekti të ri për mbrojtjen e fëmijëve shqiptar nga trafikimi e shfrytëzimi i tyre.

Falë këtij projekti do të fuqizohen kapacitetet e profesionistëve që merren me mbrojtjen e fëmijëve në nivel vendor, si dhe do të mundësohen kurse të trajnimit profesional dhe krijimi i shanseve për punësimin e të rinjve.

Projekti ka për synim vendosjen e bashkërendimit të rregullt në nivel vendor për menaxhimin e asistencës për fëmijët viktima dhe viktimat të mundshme të trafikimit; zvogëlimin e rrisqeve për trafikimin dhe shfrytëzimin e fëmijëve dhe të rinjve, si dhe sigurimin e mbrojtjes dhe asistencës së përshtatshme për fëmijët viktima të trafikimit dhe shfrytëzimit.

Projekti pason punën që ka bërë më herët Prezenca e OSBE-së për trajtimin e fenomenit të punës së të miturve në Shqipëri. Prezenca e OSBE-së i mbështet autoritet qendrore dhe vendore në përvetësimin e një qasjeje shumëdisiplinore e të bazuar në të drejtat e njeriut për parandalimin e trafikimit të qenieve njerëzore dhe mbrojtjen e grupeve në rrezik, siç janë fëmijët.

Kjo nismë financohet nga qeveria italiane, me fonde të Bashkëpunimit italian për Zhvillim.

Redaksia Online
(F.T/shqiptarja.com)

TAG:
• OSBE