TIRANE-Një ngjarje e rëndë është shënuar pasditen e sotme në Durrës, ku pushimet u kthyen në tragjedi për një familje. Babai bashkë me vajzën u mbytën në Rrushkull. Ngjarja ka ndodhur rreth orës 18:00.

Vajza e mitur me inicialet M.B. 9-vjeçe kishte hyrë për t'u larë, por e mori dallga si pasojë e erës pasditen e sotme në Durrës. I ati 44-vjeç me inicialet Dh.B. u fut në det për të shpëtuar vajzën, por nuk arriti duke u mbytur.

Zona nuk është shumë e frekuentuar dhe nuk ka kullë vrojtimi. Thirrjes për ndihmë të bashkëshortes së 44-vjeçarit iu përgjigjën banorët e zonës në Rrushkull që ndërhynë duke e nxjerrë të gjallë vajzën dhe e dërguan me shpejtësi në spitalin e Durrësit, por disa minuta më pas fatkeqësisht ndërroi jetë.

Familja nga Tirana, prindërit me dy fëmijët dhe dy nipërit kishin shkuar për pushim ditor në zonën e Rrushkullit, që ndodhet në pjesën veriore të Durrësit, e cila është pa infrastrukturë dhe pa kullë vrojtimi.

Këtë sezon turistik janë mbytur disa pushues në vijën tonë bregdetare. Në ditët e fundit janë 4 pushuesit që janë mbytur në plazhin e Durrësit.