Media amerikane shkrim për Evi Kokalarin: Ekstremistja e djathtë e lidhur me ish kryeministrin e turpëruar shqiptar (Sali Berisha)! Si lobonte në SHBA për të goditur Ramën

Media amerikane “The Daily Beast” i ka dedikuar një artikull të gjatë Evi Kokalarit, të njohur ndryshe si “amerikania e Berishës” për shkak të mbështetjes së gjerë që i dha pasi ish kryeministri u shpall ‘non grata’ nga SHBA. Në shkrim përmendet se si Kokalari udhëtonte vazhdimisht në Shqipëri për të marrë pjesë në aktivitetet e Berishës ndërsa mbetet mister kush i ka financuar lëvizjet e saj. Gjithashtu artikulli vë theksin se Kokalari ka lobuar në SHBA për të diskredituar Edi Ramën dhe u zotua se do të përdorte lidhjet e saj në Amerike për të goditur qeverinë shqiptare.

Kujtojmë se pak ditë më parë, Evi Kokalari zyrtarizoi krijimin e një partie të re 'Konservatorët', me të cilën dëshiron që të garojë në zgjedhjet e përgjithshme parlamentare që do të mbahen në vitin 2025.

Artikulli i plotë në “The Daily Beast”
Gruaja që republikani George Santos e quajti "mikeshën e tij më të mirë" është një republikane që mbledh fonde dhe përhap teori konspirative dhe shpenzoi vite duke promovuar një politikan shqiptar të shpallur ‘non grata’ nga SHBA për korrupsion. Veprimet e saj ngritën shqetësimet e eskpertët ligjore dhe të etikës.

Në hapësirën e dy cikleve zgjedhore, Evi Kokalari e cila ndonjëherë përdor mbiemrin e ish-bashkëshortit të saj Angelakis kaloi nga një ndërmjetës i pasurive të patundshme në Queens për një kohë të shkurtër që merrej pak me politikë dhe vijoi më pas me organizimin e eventeve për Santos dhe disa figura të tjera si ish republikani Lee Zeldin dhe drejtori i inteligjencës së Trump, Ric Grenell.

Në të njëjtën periudhë, rreth vitit 2019, në rrjete sociale tregonte se merrte pjesë në festa në Mar-a-Lago duke zhvilluar takime me Eric Trump, ish Sekretarin e Shtetit Mike Pompeo, Ilir Metën, aso kohe president i Shqipërisë dhe Yuri Kim, ambasadore e SHBA në Shqipëri. Postimet treguan se ajo vizitonte rregullisht vendin e saj në Ballkan dhe destinacione të tilla si Londra, Bahamas dhe Turks and Caicos.

Qasja e saj me politikanët amerikanë e lejoi atë të propagandonte një histori në Shtetet e Bashkuara dhe në Shqipëri që fajësonte miliarderin George Soros për sanksionet amerikane kundër ish-kryeministrit Sali Berisha, të cilin Departamenti i Shtetit e kishte shpallur persona non grata për përfshirjen e tij në korrupsion publik. Pas eventeve ku merrte pjesë bashkë me me Zeldin dhe Grenell, dy republikanët filluan t'i bënin jehonë pikave të saj duke folur për persekutimin e supozuar të Berishës dhe ajo pretendoi në internet se kishte rekrutuar anëtarë të shumtë të Kongresit për kauzën e saj anti-Soros.

Por në të njëjtën kohë që profili i saj u rrit, dhe ndërsa stili i saj i jetesës bëhej gjithnjë e më i dukshëm, të dhënat publike dhe deklaratat e saj tregojnë se shitjet e saj të vogla të pronave dhe biznesi u lëkundën.

Mediat shqiptare kanë vënë në pikëpyetje sesi ekspertja dhe aktivistja e sapoformuar financoi faturat e saj të udhëtimit dhe aktivizmin e pandërprerë, dhe pyesin veten nëse fondet kishin ardhur nga Berisha dhe mbështetësit e tij. Ekspertët për rregulloret e lobimit të SHBA shprehën të njëjtat shqetësime.

"Ky fakt sigurisht që ngriti pyetje shtesë për mua," tha Joshua Rosenstein, një avokat me firmën Sandler Reiff Lamb Rosenstein & Birkenstock.

Rosenstein, si të gjitha autoritetet ligjore të konsultuara me median “The Daily Beast” për këtë histori, theksoi se pyetja thelbësore është nëse Kokalari kishte përmbushur kriteret për t'u konsideruar si agjente e një drejtori të huaj sipas Aktit federal të Regjistrimit të Agjentëve të Huaj. E rëndësishme për këtë është nëse Kokalari është kompensuar ndonjëherë për punën e saj dhe nëse ka vepruar nën drejtimin apo kontrollin e një aktori tjetër të huaj.

“Nëse ajo fluturon nga SHBA dhe Shqipëri dhe kthehet këtu për të lobuar në emër të Berishës, dhe nëse paguhet nga ai ose partia e tij, ose drejtohet prej tij, ajo duhet të regjistrohet,” tha James Thurber, profesor në Universitetin Amerikan, i cili ka shkruar gjerësisht për lobimin e huaj.

Thurber, si ekspertë të tjerë, theksoi gjuhën e gjerë të statutit dhe zbatimin e pabarabartë historik. "Ajo është duke notuar në një zonë gri", tha ai. Në bisedë me “The Daily Beast”, Kokalari hodhi dyshime mbi saktësinë dhe integritetin e mediave shqiptare dhe këmbënguli se ajo nuk ka pranuar kurrë asnjë formë kompensimi, honorari apo rimbursimi për asnjë nga deklaratat e saj në mbrojtje të Berishës. Megjithatë, ajo nuk pranoi të jepte detaje se si i pagoi udhëtimet për të marrë pjesë në aktivitetet e tij.

“Nuk kam asgjë për të raportuar në Departamentin e Drejtësisë. Nëse mendoni se përfshirja ime në politikë në Amerikë ka të bëjë me Shqipërinë, po e humbisni mendjen,” tha ajo.

Santos nuk iu përgjigj pyetjeve për këtë histori dhe Kokalari pohoi se ajo e ndërpreu lidhjen e tyre në vitin 2021.

Transformimi i papritur i Evi Kokalarit

Ajo që dihet është se përfshirja e Kokalarit në politikën e SHBA-së është një fenomen i kohëve të fundit. Ajo dha kontributin e saj të parë politik në fushatën e rizgjedhjes së Presidentit të atëhershëm Donald Trump në shtator 2019. Më pas, filloi të lobojë për interesat federale dhe republikane të Nju Jorkut dhe faqet e saj në mediat sociale papritmas u gjallëruan me konservatorë dhe video nga ngjarje pro-Trump.

Brenda pak më shumë se një viti, Kokalari jo vetëm po merrte pjesë në ngjarje të tilla, por edhe i organizonte ato. Këto përfshinin një anije pro-Trump në Loëer Manhattan më 11 shtator që i dha asaj një paraqitje në podcastin e Ëar Room të Steve Bannon, mbledhjet e fondeve për Santos dhe Zeldin, një panel me Bannon dhe vetëm javë para zgjedhjeve një mbledhje fondesh për fushatën e Trump me liderët shqiptaro-amerikanë të zonës së Detroitit me Grenell.

Por shpërthimi i papritur i Kokalarit në aktivizëm, udhëtimet dhe përfshirja politike përkoi me kohë të dëshpëruara për tregun e pasurive të paluajtshme të qytetit të Nju Jorkut dhe për biznesin e Kokalarit, Golden Key Realty për shkak të pandemisë së Covid-19 dhe bllokimeve që rezultuan.

“Turizmi në Nju Jork ka vdekur, ndërtesat e zyrave janë mbyllur. Është e vështirë të mbijetosh në këtë pikë,” tha ajo për International Business Times atë gusht. Disa muaj më parë, “Golden Key Realty” kishte siguruar një hua të Programit të Mbrojtjes së Paycheck prej 40,000 dollarë që të kapërcejë krizën. Në fillim të vitit 2021, Kokalari mori një hua prej 20,833 dollarësh përmes programit në emrin e saj.

Kokalari pranoi për “The Daily Beast” se ajo nuk i ka përditësuar listat në faqen e internetit të biznesit të saj në gati tre vjet që nga fillimi i pandemisë. Ajo duket se ka ndërmjetësuar për herë të fundit një shitje të madhe prone në janar 2019. StreetEasy, një nga shërbimet më të mëdha dhe më të njohura të listimit të pasurive të paluajtshme në Nju Jork, tregon se “Golden Key” u mor me tre apartamente me qira në vitin 2022, më e shtrenjta prej të cilave jepej me qira për 2,000 dollarë në muaj dhe faqja nuk tregon transaksione të tjera që nga viti 2017. Listimet e saj në Zillow janë edhe më të vjetra se kaq.

Kokalari këmbënguli se ajo ishte përfshirë në transaksione të tjera pronash, megjithëse refuzoi të jepte data apo adresa. Burimet e industrisë i thanë “Daily Beast” se kishte pak prova të aktivitetit të firmës së saj dhe Bordi i Pasurive të Paluajtshme të Nju Jorkut, një grup tregtar tha se e anuloi anëtarësimin e saj në qershor 2021 për mospagesë të detyrimeve. Organizata nuk iu përgjigj pyetjeve se sa kohë kishte qenë neglizhente.

Aktivitetet politike të Kokalarit u përshkallëzuan disi pasi kompania e saj ngeci. Një version i arkivuar i llogarisë së saj në Tëitter nga fundi i vitit 2020 tregon se ajo përfaqësoi veten si anëtare e komitetit të financave të Komitetit të Fitores së Trump, përpjekjes së përbashkët për mbledhjen e fondeve të Komitetit Kombëtar Republikan dhe ofertës së presidentit të atëhershëm për rizgjedhje. Një person i njohur me komitetin, megjithatë, i tha “Daily Beast” se kjo nuk ishte e vërtetë dhe Kokalari nuk kishte asnjë përfshirje në entitetin e përbashkët, megjithëse ajo bëri paketë kontributesh për fushatën e duhur. Kokalari nuk pranoi të komentonte kur u pyet për këtë mospërputhje.

Humbja e Trumpit në zgjedhjet e vitit 2020 dhe gënjeshtrat e tij të mëvonshme për mashtrimin zgjedhor, i dhanë asaj një shans për të filluar lidhjen e çështjeve amerikane me ato në Shqipëri. Më 19 nëntor 2020, ajo u shfaq në One America Neës, ku një spikere e prezantoi atë si një person "që e njihte komunizmin dhe socializmin dhe se si funksionon dhe nuk punonte kundër kapitalizmit".

Në këtë dalje publike, Kokalari aludoi në mënyrë të paqartë për një sërë lidhjesh të supozuara midis Dominion Voting Systems, Fondacionit Clinton dhe familjes Soros, të cilat ajo pretendonte se kishin një ndikim të keq si në Shqipëri ashtu edhe në SHBA.

“Kur sheh shtete të dobëta si ato, ky është këndi i përsosur i lojërave për George Soros,” tha ajo, përpara se të përsëriste pretendimet për një komplot midis Dominion dhe kompanisë tjetër të teknologjisë së votimit Smartmatic. “Në vitin 2016, pikërisht përpara zgjedhjeve në 2016, Hillary Clinton ishte aq e sigurt se do të fitonte. Arsyeja e vetme që ajo ishte e sigurt se do të fitonte, është sepse ata e dinin që Dominion dhe softueri, Smartech-Smartmatic ekzistonte, dhe kështu do të merrnin zgjedhjet”, tha Kokalari.

Trampolina e Sorosit

Këto komente përfunduan më vonë në ankesën për shpifje që Smartmatic ngriti kundër OANN, por firma nuk e përmendi Kokalarin si palë në padi. Ajo përshkroi më tej pikëpamjet e saj për Sorosin dhe atdheun e saj në një artikull të shkurtër në uebsajtin e ekstremit të djathtë “Revolver” më 30 nëntor. Në artikull, ajo pretendonte se ishte miqësuar me kryeministrin shqiptar Edi Rama dhe një operativ të Sorosit në Paris pas kolapsit të diktaturës komuniste të vendit në vitet 1990.

Duke ofruar atë që ajo e përshkroi si një "përrallë paralajmëruese", Kokalari e karakterizoi në mënyrë fantastike financierin me origjinë hungareze si " strategun" që kishte projektuar një pushtim të gjykatave shqiptare, lëvizjen në Shtetet e Bashkuara dhe manipulimin e supozuar të zgjedhjeve të vitit 2020.

“Rama shumë jo i dashur i Shqipërisë do të qëndrojë në pushtet për aq kohë sa të ruajë marrëdhënien e tij komode me George Soros”, pohoi ajo. “Nëse i lëmë zgjedhjet të shkojnë dhe ia dorëzojmë Joe Biden-it, ne e dimë se ku po shkon kjo, zgjedhjet amerikane do të kenë të njëjtin legjitimitet si ato në Ballkan, dhe Biden ose kukulla e ardhshme e Sorosit do të qëndrojnë në pushtet për një kohë të pacaktuar”, vijoi Kokalari.

Absurde dhe të paargumentuara sado që të ishin këto pretendime, e çuan fazën tjetër të karrierës së saj politike. Në biografinë e saj në artikullin Revolver, e përshkroi veten si "themeluesja e Emigrantëve për Trump" - që do të vazhdonte të reklamonte në vitin e ardhshëm, duke shtuar më vonë krijimin e një komiteti të veprimit politik "Emigrantët për Lirinë".

Asnjëra prej këtyre organizatave nuk është regjistruar në Komisionin Federal të Zgjedhjeve ose nuk ka një faqe interneti ose prani tjetër në internet. Kokalari këmbënguli se ajo i formoi grupet, por më vonë i braktisi ato, megjithëse nuk ka prova të disponueshme publikisht që e vërtetojnë këtë.

Viti i ardhshëm do t'i jepte asaj gjithashtu mundësitë për të shfrytëzuar lidhjet e reja politike amerikane për të kultivuar marrëdhënie me elitën shqiptare dhe për të promovuar teoritë konspirative të lidhura me Sorosin në dy kontinente.

Ekspertë të shumtë për Shqipërinë, me të cilët “The Daily Beast” u konsultua për këtë histori, ranë dakord se Amerika gëzon mbështetje dhe admirim të jashtëzakonshëm në shtetin e vogël ballkanik dhe se aksesi ndaj figurave politike amerikane mund të shndërrohet në sasi të mëdha kapitali politik atje. Për të njëjtën arsye, mungesa e aleatëve në SHBA mund të skualifikojë praktikisht një politikan shqiptar nga mbajtja e pushtetit.

“Asnjë vend nuk është më i rëndësishëm për Shqipërinë se Shtetet e Bashkuara dhe SHBA-ja nuk ka mik më të mirë në mbarë botën se shqiptarët,” tha David L. Phillips nga Instituti për Studimin e të Drejtave të Njeriut të Universitetit të Kolumbias, një ekspert për Ballkanin. “Shqipëria nuk dëshiron të bëjë asgjë që do të prishë marrëdhëniet me Uashingtonin”.

Lidhja me Berishën

Në maj të vitit 2021, Sekretari i Shtetit Anthony Blinken e ndaloi Sali Berishën, ish-kryeministrin shqiptar dhe gjithë familjen e tij të hynte në Shtetet e Bashkuara duke përmendur “keqpërdorimin e fondeve publike nga Berisha dhe ndërhyrjen në proceset publike”. Ishte një goditje shkatërruese për ambiciet e Berishës për të rimarrë drejtimin e vendit që ai drejtoi midis 2005 dhe 2013, dhe kërcënoi madje se do të nënvlerësonte përpjekjen e tij për të rifilluar kryesimin e PD. Në shtator të atij viti, pasardhësi i Berishës si kryetar i partisë, Lulzim Basha e përjashtoi atë nga grupi i saj në parlamentin e vendit.

Sipas Fred Abrahams, autor i një libri për Shqipërinë dhe profesor i ftuar në Kolegjin Bard në Berlin, ka pak dyshime për fajin e Berishës. “Korrupsioni është aq i përhapur në vend sa është universal dhe i pashmangshëm.” Por koha, argumentoi ai, “pasqyronte një përpjekje të SHBA-së dhe Bashkimit Evropian për të forcuar dhe rinovuar Partinë Demokratike Shqiptare duke e ndihmuar atë të largonte Berishën, i cili ka dominuar organizatën që nga formimi i saj në vitet 1990.”

“Akuzat ndaj Berishës erdhën në një moment kur Partia Demokratike po përpiqej të kalonte përtej Berishës në lidershipin e ri, dhe BE-ja dhe qeveritë e SHBA-së e mbështetën këtë,” shpjegoi Abrahams. “Ata donin një opozitë të qëndrueshme, konkurruese dhe nuk mendonin se Berisha mund të ishte i tillë.”

Por Kokalari, e cili tashmë kishte mbështetur Berishën në mediat shqiptare, filloi menjëherë të shtynte idenë se familja Soros qëndronte pas lëvizjes së SHBA. Zeldin shpejt i bëri jehonë kur mori në pyetje Blinken në një seancë dëgjimore të Komisionit të Punëve të Jashtme të Dhomës së Përfaqësuesve në qershor.

"Për shumë njerëz, kjo me sa duket erdhi nga hiçi," tha kongresmeni. “Ai ishte mysafir dhe aleat i Bushëve. Ai njihej gjithashtu se ishte një kundërshtar agresiv i George Soros”, tha Zeldin.

Zeldin kërkoi akses për të mësuar si erdhi vendimi për shpalljen ‘non grata’ të Berishës. Në këtë, Phillips pa ndikimin e mundshëm të Kokalarit, e cili kishte mbetur në kontakt me kongresmenin.

“Është mjaft rutinë që qytetarët amerikanë të mbledhin para për anëtarët e Dhomës dhe më pas t'u kërkojnë atyre anëtarëve të Dhomës të veprojnë në emër të çështjeve të tyre,” tha ai.

Zeldin nuk iu përgjigj thirrjeve, emaileve apo mesazheve me tekst për koment. Kokalari tha se ajo "kurrë, kurrë" nuk diskutoi çështjet shqiptare me kongresmenin e atëhershëm dhe këmbënguli se kërkesa e tij kishte ardhur nga shqetësimet e tij për Sorosin dhe Berishën përmes një pale të tretë, të cilin ajo refuzoi ta përmendte.

Por Kokalari reagoi për televizionin shqiptar për të promovuar komentet e Zeldin pas seancës, duke trumbetuar eventin që kishte mbajtur rreth një vit më parë.

“Për Berishën, ne kemi disa miq shumë të shquar në Amerikë, të cilët kanë bërë shumë për shqiptarët dhe do të vazhdojnë ta bëjnë këtë edhe në të ardhmen. Sot, gjithçka bëri ishte të na jepte një zë në Kongres”, i tha ajo prezantuesit Cim Peka natën e seancës dëgjimore.

Ajo gjithashtu pohoi në një postim në Facebook se Pompeo i kishte siguruar një takim se ai nuk kishte pasur asnjë rol në hapjen e një dosjeje për Berishën gjatë administratës Trump dhe se ai u zotua të kontaktonte Zeldin për këtë çështje. As Pompeo dhe as komiteti i tij i veprimit politik nuk iu përgjigjën kërkesave të përsëritura për koment.

Nga vjeshta, Kokalari kishte nisur një fushatë shumëkombëshe gjithëpërfshirëse duke mbrojtur shfajësimin e Berishës dhe kthimin në pushtet. Në fund të shtatorit, ajo mbajti një konferencë të përbashkët shtypi me ish-kryeministrin, ku u zotua se "do të kenë ndihmën e republikanëve amerikanë".

Në fund të shtatorit, ajo u zotua në televizionin shqiptar se do të përdorte lidhjet e saj në Amerikë për të lëkundur qeverinë në emër të Berishës.

Dhoma e jehonës së Kokalarit

Në tetor, ajo intervistoi Bannon në televizionin shqiptar. Ditë më vonë, Kokalari ndau një skenë me provokatorin e krahut të djathtë Jack Posobiec në samitin konservator "AMPFest" në Trump ‘National Doral’ në Miami, ku foli për përpjekjet e saj për të ndihmuar Berishën të rimarrë kontrollin e Partisë Demokratike Shqiptare dhe vajtoi edhe një herë me supozimet se Soros ka kapur Departamentin e Shtetit.

Vetëm disa javë më vonë, Grenell - të cilin Kokalari e kishte takuar atë qershor në një pritje kokteji ku morën pjesë donatorë republikanë të qytetit të Nju Jorkut - shkroi një artikull të titulluar "Blinken vepron si agjent i George Soros në Ballkan", duke i bërë jehonë shumë prej të njëjtave biseda të çuditshme, që kishte përmendur Kokalari. Megjithatë, Kokalari pohoi për ‘Daily Beast’ se ajo kurrë nuk e diskutoi çështjen e Berishënsdhe gjendjen e tij të vështirë me Grenell.

Një ditë pasi u botua ajo pjesë, Kokalari postoi një foto të saj në Mar-a-Lago, ku republikanët e Log Cabin po mbanin galën e tyre Spirit of Lincoln, në të cilën grupi GOP LGBT i dha çmime Grenell, Kryetares së Komitetit Kombëtar Republikan Ronna McDaniel. , dhe ish-Zonja e Parë Melania Trump.

Në fillim të dhjetorit, Kokalari dhe kreu i Federatës Kombëtare Republikane të Rinj, Rick Loughery mbajtën një konferencë virtuale me Berishën. Në fillim të vitit 2022, ajo solli Loughery dhe autorin konservator Matt Palumbo - libri i të cilit mbi Sorosin 'Njeriu prapa perdes' citon artikullin e Kokalarit si një burim për ndërtimin e një narrative pro-Berisha-në Shqipëri për të bërë ngjarje të shumta mediatike dhe publike, duke përfshirë të paktën një me vetë ish-kryeministrin.

Në takimin e një prej atyre ngjarjeve, Loughery i dhuroi Kokalarit një flamur nga Kapitoli, me mirësjellje të Rep. Ron Estes (përfaqësues nga Kansas). Në një rast tjetër, grupi u takua me presidentin shqiptar Meta, një aleat i Berishës. Palumbo nuk pranoi të komentonte për këtë pjesë, ndërsa Loughery nuk iu përgjigj kontakteve të përsëritura nga The Daily Beast. Zyra e Estes nuk do të komentonte të dhënat.

Evi dhe lobimi

Muaj pas muaji, deri sa ajo dhe Berisha patën një grindje publike në fund të vitit 2022, në mediat sociale tregon se Kokalari vazhdoi me këtë ritëm të furishëm: një prani pothuajse e vazhdueshme në televizionet shqiptar si dhe takime të rregulluta me funksionarë republikanë.

Për një person të brendshëm të politikës shqiptare, i cili foli për The Daily Beast në kushte anonimiteti, për të shmangur raprezaljet publike, strategjia ishte e qartë: t'i shisje publikut shqiptar një histori që do ta bënte Berishën sërish të këndshëm, pavarësisht sanksioneve të SHBA. Ish-kryeministri kishte kaluar disa vite si një eminencë gri brenda partisë së tij, duke ruajtur një ndikim të konsiderueshëm informal, por tani donte një histori kopertine për t'i dhënë popullatës imazh të ri teksa u kthye në pozicionin e tij të vjetër zyrtar si kryetar.

“Kjo e forcoi sërish pozicionin e Berishës për t'u rikthyer. Ajo krijoi një narrativë, "tha burimi. “E gjithë narrativa e krijuar ishte se shpallja e tij ‘non grata’ nuk ishte vendim nga qeveria e SHBA, por një komplot i krahut të majtë.”

Ky rrëfim ishte i qartë në fjalimin që Kokalari bëri në Asamblenë e Brendshme të Partisë Demokratike Shqiptare, pak para se Berisha të rimarrë me sukses kryesinë.

“Besnikëria jonë i përket Amerikës dhe jo interesave të veçanta. Ne jemi zotuar të mbrojmë SHBA-në nga armiq si Soros”, tha ajo në konklavën e brendshme të partisë.

“Nëse Trump do të ishte ende në Shtëpinë e Bardhë, Berisha nuk do të ishte non grata, lufta në Ukrainë nuk do të kishte ndodhur dhe Shqipëria nuk do të ishte në këtë kaos politik”, u shpreh ajo.

Por shtypi po i kushtonte vëmendje jo vetëm fjalimeve të saj. Duke u marrë të dhënat e fluturimeve u pa se Kokalari kishte bërë të paktën nëntë udhëtime midis SHBA-së dhe Shqipërisë si pjesë e avokimit të saj për Berishën, me gjasë që kishte fatura në dhjetëra mijëra dollarë - dhe pa dyshim kishte harxhuar mijëra më shumë për faturat e ushqimit dhe hotelit. Gjithashtu diskutohet nëse në bazë të ligjit amerikan ishte regjistruar në Departamentin e Drejtësisë si dikush që lobonte në emër të interesave të huaja.

Loja e fajësimit

Në një postim në Facebook, shumë e zemëruar dhe duke fajësuar rivalë brenda Partisë Demokratike Shqiptare, Kokalari këmbënguli se ishte konsultuar me avokatin ligjor për t'u siguruar që ajo ishte në përputhje me FARA-n, por shtoi se edhe nëse ajo kishte shkelur ligjin, ia vlente për të ngritur lart Berishën.

“Nuk kam nevojë të deklaroj shpenzimet e mia të udhëtimit dhe personale në Departamentin e Drejtësisë. Injoranca juaj sesi funksionojnë gjërat në Amerikë është befasuese”, ka shkruar ajo në shqip. “Jam konsultuar me avokatët më të mirë lobues në Amerikë pikërisht për të qenë e saktë me ligjin dhe do të qëndroj e tillë deri në fund”.

“Edhe sikur të kisha thyer rregullat për të ndihmuar Sali Berishën dhe opozitën në Shqipëri në një periudhë kaq të vështirë, kjo duhej vlerësuar dhe jo denoncuar”, shtoi ajo.

Kokalari këmbënguli se ishte konsultuar me një avokat dhe ishte në përputhje të plotë me ligjin, por ajo nuk pranoi të tregonte emrin e avokatit. Disa orë pasi Daily Beast intervistoi Kokalarin, një avokat antitrust dhe biznesi nga zona e Atlantës - i cili është gjithashtu një anëtar i Shoqatës Kombëtare të Juristëve Republikanë - kontaktoi.

"Znj. Sjellja e Kokalarit është shqyrtuar dhe miratuar nga avokati i saj dhe siç ju ka përmendur ajo, ajo nuk ka marrë asnjë përfitim personal për aktivitetet e saj politike”, shkruan avokati C. Robert Barker. "Pyetjet tuaja nuk bazohen në asnjë provë."

Më tej ajo pohoi se i kishte financuar vetë të gjitha aktivitetet e saj, falë disa “investimesh në pasuri të paluajtshme”. Ajo nuk pranoi të jepte ndonjë detaj në lidhje me investime të tilla, por dokumentet publike tregojnë se ajo është bashkëpronare e një ndërtese dykatëshe në Queens me të paktën një partner, i cili ka shërbyer si zyra e brokerimit të saj. Të dhënat e tatimit në pronë të qytetit të Nju Jorkut zbulojnë se kompania me përgjegjësi të kufizuar që qëndron pas pronës ka dështuar vazhdimisht të bëjë pagesat tremujore gjatë 2021 dhe 2022.

Por Kokalari vuri në dukje mosmarrëveshjen e saj së fundmi me Berishën si dëshmi se ajo nuk ka qenë kurrë në listën e pagave të askujt.

“Nëse do të më paguanin për lobimin për Berishën apo dikë tjetër, si do të kthehesha dhe do t’ia bëja këtë djalit?” tha ajo, duke vënë në dukje se e kishte kritikuar atë në Facebook javët e fundit.

“Nuk do të kem telashe në Amerikë. Unë kam një jetë të shkëlqyer, kam një jetë të bukur, kam një jetë personale, kam një jetë biznesi, kam një jetë politike dhe kam shumë miq dhe thjesht nuk do të merrem me këtë. ”

Kokalari nuk është e vetmja shqiptaro-amerikane e përfshirë së fundmi në skandale politike në të dy anët e Atlantikut. Akuzat kundër Charles McGonigal, ish-kreut të zyrës së Byrosë Federale të Hetimit në Nju Jork, përfshijnë akuzat se ai ka marrë ryshfet nga një ish-agjent i inteligjencës shqiptare me banim në Nju Xhersi për të ndërmarrë veprime në dobi të qeverisë Rama – konkretisht, se ai hapi një hetim për një lobist të punësuar nga Lulzim Basha, mbrojtësi i Berishës i kthyer në rival në Partinë Demokratike Shqiptare.

Ndërkohë, The Daily Beast zbuloi vitin e kaluar se vëllai i një politikani shqiptar ishte thellësisht i përfshirë në kompaninë në qendër të hetimit të fundit federal ndaj Senatorit Bob Menendez (D-Neë Jersey). Vëllai me bazë në Garden State, i cili më parë ka shërbyer si sekretar i marrëdhënieve me jashtë të një partie monarkiste të skajshme në Shqipëri dhe si operator i një strofulli të paligjshme të lojërave të fatit në SHBA, kishte lobuar më parë në Uashington për të hequr sanksionet ndaj një prokurori shqiptar. *Përshtati në shqip Shqiptarja.com

/r.k./Shqiptarja.com

TAG:
• evi kokalari
• george santos
• sali berisha
• edi rama