Mediat greke: Lazarati i nxori 
Derviçanit inatin e Serbisë

Sekretari i Përgjithshëm i MPJ shqiptare Qirjako Qirko priti dje Ambasadorin e Greqisë në Tiranë, Rokanas, me kërkesë të këtij të fundit, që e informoi atë mbi një incident të ndodhur në fshatin Dervician, mbas ndeshjes së futbollit Serbi-Shqipëri, ku një grup i vogël të rinjsh kanë lëshuar parrulla dhe i kanë shkaktuar dëme materiale një automjeti. Duke e dënuar këtë incident dhe duke e quajtur atë një rast të veçantë që nuk mund të ndikojë në frymën e bashkëjetesës shekullore midis shqiptarëve dhe minoritarëve, Sekretari i Përgjithshëm i MPJ i bëri të ditur Ambasadorit grek reagimin e shpejtë dhe efikas të policisë së shtetit, që vuri para përgjegjësisë ligjore personat përgjegjës.

Ai informoi se autoritetet e pushtetit vendor dhe të policisë së Qarkut të Gjirokastrës kanë marrë kontakte me banorët dhe kryeplakun e fshatit, që pohuan se ngjarja në fjalë ishte një rast i veçantë e se gjendja në fshat është e qetë. Ambasadorit grek iu kërkua që ky rast sporadik të mos ketë ndikim negativ në marrëdhëniet tona dypalëshe, mbasi përkatësia euroatlantike e dy vendeve tona përjashton çdo fenomen negativ që cënon vlerat e përbashkëta. Ndërkohë që kanë reaguar menjëherë mediat greke që e kanë përcjellë këtë lajm. Sulm provokues në Derviçan, i kanë quajtur mediat greke festimet që janë zhvilluar në këtë fshat, mbrëmjen e 14 tetorit, pas incidenteve në ndeshjen mes ekipit kombëtar shqiptar dhe Serbisë në Beograd.

“Këto nuk ishin festime por një sulm provokues kundër anëtarëve të minoritetit kombëtar grek në Shqipëri, ku u demonstrua “civilizimi evropian” dhe nacionalizmi i shqiptarëve”, shkruajnë mediat greke. “Në mënyrë të veçantë, banorët e Lazaratit, fshati i famshëm për kultivimin e hashashit, pasi kanë krijuar një rradhë të gjatë me automjete kanë hyrë në Derviçan nën thirrjet “Do ju djegim, të krishterë”, duke ju kujtuar atyre se çfarë ndodhi në Stamboll më 1955, dhe me parulla kundër Greqisë dhe helenizmit”, thuhet në mediat greke.


Shkrimi u botua në Shqiptarja.com (print) në 18 Tetor 2014

Redaksia Online
(d.a/shqiptarja.com)  
 

TAG:
• lazarat