Çudira me drejtësinë shqiptare. Një person është arrestuar me argumentet sipas organit të akuzës, se ka përgjime telefonike që e implikojnë atë në dosjen e dërgimit të emigrantëve drejt SHBA-së, Kanadasë dhe Anglisë, në rrugë të paligjshme.

Por në fakt, 52-vjeçari Edmond Omeri, është memec, pra nuk mund të flasë. Në këto kushte, Gjykata e Apelit për Krime të Rënda, i ka hequr masën e sigurisë të arrestit shtëpiak, 52-vjeçarit, duke e lënë të lirë.

Ndaj tij është kryer një akt ekspertimi mjeko-ligjor, që është vërtetuar se nuk mund të flasë, kështu që nuk ka asnjë mundësi që ai të ketë zhvilluar biseda telefonike që ta implikojnë në kryerjen e një vepre penale. 52-vjeçari u arrestua në kuadër të operacionit policor të koduar "Rruga e gabuar" që vuri në pranga 22 persona. Prokuroria e akuzonte si pjesë të grupit që koordinonte trafikun e emigrantëve drejt SHBA, kundrejt pagesave.

Prokuroria kishte paraqitur si provë kundër tij përgjime telefonike ku pretendonte si ishte zëri i Omerit. Megjithatë, organi i akuzës u shpreh se do të vijojë hetimet, pasi ka dyshime se telefoni i Edmond Omerit të jetë përdorur nga persona të tjerë.

Për të siguruar një pasaportë të falsifikuar qytetarët e interesuar kanë paguar shuma të konsiderueshme financiare që variojnë nga 10 deri në 30 mijë dollarë.

Lexoni se si funksiononte grupi