E marrin peng dhe e kërcënojnë me thikë, kambisti grabitet në Durrës! I marrin 1 mln lekë, arrestohet 63-vjeçari në kërkim bashkëpunëtori i tij

DURRËS- Një kambist është marrë peng në Durrës dhe është kërcënuar me thikë, ndërkohë që i janë grabitur rreth 1 mln lekë. Dy persona e kanë marrë në makinë kambistin për ta çuar në shtëpinë e tyre ku dhe i është thënë se do të këmbente një shumë të madhe monetare. Ngrja ka ndodhur pak ditë më parë.  Siç njofton policia, S.H, 58-vjeç banues në Durrës, i cili në mënyrë të kundërligjshme, ushtronte aktivitetin e këmbimit valutor, ka kallëzuar dy persona, se e kanë marrë peng në një makinë dhe e kanë kërcënuar me thikë duke i vjedhur një shumë parash e më pas janë larguar.

Pas këtij kallëzimi, policia e Durrësit, ka arrestuar Vladimir Rusin, 63 vjeç, banues në Durrës, për veprën penale “Vjedhja me dhunë", kryer në bashkëpunim, ndërsa është shpallur në kërkim bashkëpunëtori i tij.

Nga hetimet paraprake të kryera për këtë rast, rezulton se 63-vjeçari, së bashku bashkëpunëtorin e tij, kanë marrë S. H., në automjetin që drejtohej nga Vladimir Rusi, dhe duke e kanosur atë, me mjet prerës (thikë), i kanë marrë shumën 1 000 000 lekë dhe më pas janë larguar.

Automjeti që u përdor për kryerjen e kësaj vjedhjeje, u sekuestrua në cilësinë e provës materiale. Materialet procedurale i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme. Ndërkohë që nën hetim është edhe vete kambisti pasi e kryente këtë aktivitet në mënyrë të paligjshme. 

M.Q./K.T./Shqiptarja.com

TAG:
• Durres
• Vladimir RusI
• vjedhje