Mes 18 ambasadorëve të të drejtave
të njeriut dhe portreti i Nënë Terezës

ITALI- Portreti i Nënë Terezës, do të jetë mes 18-të portreteve të Marcello Reboani, në ekspozitën e tij personale, "Ladies for Human Rights" , që do të hapet në Leçe të Italisë nga data 25 – 26 tetor, në Muzeun “Must”, të kryeqendrës së Salentos, që ështe edhe një ndër më të rëndësishmit. Marcello Reboani është mjeshtër i realizimit të veprave të tij me një miks materialesh, si: dru, alumin, plastikë, dhe realizon piktura-skulptura të stilit neo-pop.

Kjo ekspozitë, ka si qëllim të tërheqë vëmendjen për të drejtat e femrës dhe i dedikohet kurajës dhe altruizimit të femrave dhe realizohet në bashkëpunim me Qendrën për drejtësi dhe për të drejtat njerëzore.

Vizituesit e kësaj ekspozite, do të kenë mundësi të admirojnë 18 portrete të femrave të mrekullueshme, të cilat janë impenjuar në fushata humanitare, secila në mënyrën e saj.
Secila prej këtyre femrave, është e denjë për t`u kurorëzuar si ambasadore e të drejtave njerëzore, në këtë ekspozitë.

Portreti i Nënë Terezës, e cilësuar si nëna e gjithë botës, është e natyrshme që nuk mund të mungonte mes portreteve të femrave që kanë bërë shumë për njerëzimin.

Portrete të tjerë, janë të yllit të Kinematografisë Hollivudiane Elizabeth Taylor, mbretëreshës së Jordanisë, Rania, Aung San Suu Kyi, Çmimi Nobel për Paqen në vitin 1992.

Gjithashtu edhe këngëtarja Annie Lennox, shkrimtarja Isabel Allende, aktorja Audrey Hepburn, Lady Diana Spencer, e shumë të tjera, të cilat kanë arritur të japin shembullin e mirë për të gjithë njerëzit në botë. Gjithashtu, mes këtyre emrave të femrave kaq të njohura në të gjithë botën, gjendet edhe emri i një gjenerate të re, siç është Malala Yousafzai, studentja pakistaneze dhe kandidatja më e re për Çmimin Nobel për Paqen.

Redaksia Online
(e.s/shqiptarja.com)