E njohur gjatë misionit të saj si Nënë Tereza e Kalkutës dhe e vlerësuar me çmimin Nobel të Paqes, gruaja më e thjeshtë dhe më madhështore e botës shenjtërohet vetëm 19 vjet pas vdekjes.
Të dielën në orën 10.30, Papa do të kryesojë, në Sheshin e Shën Pjetrit, Meshën e Shenjtërimit të Nënë Terezës së Kalkutës. E jo më larg se të hënën, më 5 shtator, do të kujtohet edhe kalimi i saj në Shtëpinë e Atit Qiellor.
Nënë Tereza u shpall e Lume nga Papa i shenjtë Gjon Pali II në vitin 2003, vetëm pesë vjet pas vdekjes. Ishte Papa Françesku ai, që propozoi dhe ngulmoi shpalljen e Shenjtërimit të saj. Shenjtërimi i saj po kremtohet nga mbarë bota.
Mesha ne në Bazilikën e Shën Pjetrit, në Vatikan do të mbahet në disa gjuhë dhe së fundi, në gjuhën e Shën Terezës, në shqip, do të thuhet lutja që Zoti t’i mbushë barinj e besimtarë me Shpirtin e vet, për ta shuar etjen e Jezusit në vëllezërit:
“Ji ti drita ime!” e na porosit: “Tani ju takon ju ta rrezatoni dritën e Krishtit! Kështu do të vijoj lutja me fjalët e Krishtit në shqip.
Në mbarë botën, e jo vetëm në Kishë, jetohet me gëzim pritja për shenjtërimin e Nënë Terezës.
Të pranishëm nesër në Vatikan në shenjtërimin e Nënë Terezës do të jenë edhe krerët më të lartë të shtetit shqiptar.
Presidenti Bujar Nishani, Zonja e Parë, Kryeministri Edi Rama kreu i Kuvendit Ilir Meta dhe kreu i PD, Basha janë nisur drejt selisë së shenjtë. Në Vatikan do të jenë edhe drejtuesit e besimeve fetare në Shqipëri.
Në vigjiljen e shenjtërimit të Nënë Terezës po festohet edhe ne Kalkutë. Ndërsa në Shqipëri do të ketë një varg aktivitesh, ku Teatri i Operas, Baletit do të jap një koncert me tema dhe frymë kishtare, i cili do të mbahet në orën 09.30 në mëngjes në sheshin Nënë Tereza.
Shenjtërimi i Nënë Terezës është një moment historik për komunitetin shqiptaro-amerikan në Nju Jork. Ata do të mblidhen në ora 4 të mëngjesit në Nju Jork për të ndjekur live transmentimin nga Vatikan.
d.b/shqiptarja.com
![](https://www.shqiptarja.com/template/img/sh_logo1.png)