Meta-Stoudmann: Shqipëria, rol
në forcimin e stabilitetit në rajon

TIRANE - Kryetari i Kuvendit Ilir Meta në takimin me përfaqësuesin e posaçëm të OSBE për Ballkanin Perëndimor, Ambasadorin Gerard Stoudmann, theksoi se Shqipëria i kushton vëmendje të veçantë forcimit të stabilitetit dhe zhvillimit ekonomik në Evropën Juglindore. Në fjalën e tij Meta tha se vendi ynë është e gatshme të kontribojë konkretisht në funksion të thellimit të bashkëpunimit mes vendeve fqinje dhe në kuadër të perspektivës evropiane.

Kreu i Kuvendit u ndal edhe tek Kosova, ndërsa nënvizoi rëndësinë e përfshirjes më të madhe të Kosovës në forumet rajonale dhe ndërkombëtare, si një faktor me rëndësi paqen dhe sigurinë në rajonin. Meta vuri në dukje gjithashtu se Shqipëria e mbështet avancimin e dialogut mes Kosovës dhe Serbisë.

Ndërkohë nga ana e tij Ambasadori Stoudmann, i cili shoqërohej nga Ambasadori i OSBE në Tiranë Florian Raunig, vlerësoi rolin e Shqipërisë në rajon. Stoudmann shprehu gatishmërinë e Presidencës zvicerane të OSBE-së për të kontribuuar në mënyrë konkrete në mbështetje të procesit të integrimit evropian të vendeve të Ballkanit Perëndimor.

Në këtë drejtim, Ambasadori vuri në dukje vizitën e pritshme të Kryetarit të Radhës së OSBE-së, Presidentit dhe Ministrit të Punëve të Jashtme të Zvicrës, z. Didier Burkhalter.

Kryetari Meta dhe Ambasadori Stoudmann diskutuan gjithashtu edhe për zhvillimet e fundit në rajon, duke vënë në dukje rëndësinë e rritjes së mirëqenies dhe projekteve sociale dhe ekonomike për hapësirat ku banojnë shqiptarët.

Redaksia Online
(e.c/shqiptarja.com)

TAG:
• OSBE