Meta 'shuplakë' Lulzim Bashës: Sikur të kishe çerekun e 85%, do kishe arritur fitore reale dhe institucionale!

TIRANË- Presidenti Ilir Meta i ka dhënë një përgjigje të drejtpërdrejtë pretendimeve të kryedemokratit Lulzim Basha dhe pjesës tjetër të opozitës që thotë se me 30 qershor fituan 85% të zgjedhësve që nuk morën pjesë në zgjedhje. Meta thotë se sikur të kishte vetëm 1/4 të 85% do kishte arritur një fitore reale.

Ai thumbon edhe mazhorancës për rezultatin e 30 qershorit duke thënë se shpalli fitore nga zgjedhjet e njëanshme dhe të paligjshme.

Kreu i shtetit shprehet se 'fitorje' të tilla penalizojnë të ardhmen e vendit pasi jo vetëm garanton një disfatë për çeljen e negociatave por cenon edhe të drejtat e qytetarëve shqiptarë

"Fitoret e thella që gëzojnë liderët dhe pasojat e rënda që penalizojnë Shqipërinë dhe shqiptarët

E kam fjalën për fitoren "e vërtetë" të mazhorancës aktuale, që në zgjedhjet e saj të njëanshme dhe të paligjshme, shpalli fitoren në 100% të bashkive të Shqipërisë, si edhe të këshillave bashkiakë.

Por edhe entuziazmi i liderëve të opozites se ata fituan 85% është mbresëlënës, duke harruar se sikur opozita të ishte regjistruar në kohë para shfuqizimit të 30 qershorit si datë e zgjedhjeve do t'i mjaftonte të kishte për vete, jo më shumë se 1/4 e 85% për të arritur një fitore reale dhe institucionale në shumicën dërrmuese të njësive vendore.

"Fitorje" të tilla penalizojnë rëndë të ardhmen e vendit, pasi jo vetëm garantojnë një disfatë në 18 tetor për çeljen e negociatave në mënyrë te sigurtë, por lenë pa mbrojtje nga të drejtat e tyre të gjithë qytetarët shqiptarë, të cilët jetën e tyre të përditshme e kanë aq të lidhur me shërbimet e pushtetit vendor.

Ndērkohë asgjesimi i llogaridhënies së pushtetit vendor (pas atij qendror), i shërben vetëm pakicës që nuk njeh rotacion dhe të përzgjedhurve të saj për të administruar çdo pushtet, pasuri dhe pronë publike, në mënyrë arrogante dhe të pakontrolluar.

Viktimat e këtyre "fitorjeve" janë të gjithë qytetarët shqiptarë pa dalllime partiake.

Për integrimin as bëhet fjalë por mbetet vetëm të shpresojmë të mos na ndeshkojnë në institucionet aktuale, që merren me mbrojtjen e autonomisë vendore, demokracisë vendore dhe të drejtat e njeriut", shkruan Meta.

/b.ha./Shqiptarja.com

TAG:
• Ilir Meta
• zgjedhjet lokale 2019