Vetëm pak ditë më parë u shënua 25-vjetori i fitores së kampionatit të tij të parë botëror me Ferrarin dhe sot kanë dalë informacione të reja rreth gjendjes së Michael Schumacher. Këto janë kryesisht 'thashetheme' të rithëna nga Stefan L'Hermitte, një gazetar francez i 'l'Equipe', i cili është përpjekur të bashkojë gjithçka që ka arritur të mbledhë kohët e fundit, që vijnë drejtpërdrejt, ose tërthorazi, nga familja e ish-pilotit gjerman, burimi i vetëm i besueshëm mes lajmeve të shumta të rreme që kanë qarkulluar që nga ajo ditë në dhjetor 2013 kur Schumacher pësoi një aksident të rëndë në ski.

"Nuk dimë asgjë specifike", tha L'Hermitte në një intervistë radiofonike. "Nuk do të thoja se po ia del mbanë, por ndoshta po ia del pak më mirë. Lajmi i vetëm vjen nga familja e tij."

Gazetari po i referohej episodit të helmetës së nënshkruar nga shtatë herë kampioni i botës në F1 për bamirësi.

"Si ia doli ta nënshkruante? A ia mbajti dorën gruaja e tij? Nuk ka siguri, por është hera e parë që kemi një sinjal pozitiv prej tij, pothuajse një shenjë jete", tha gazetari.

Lidhur me gjendjen e tij fizike, L'Hermitte nuk dha asnjë detaj.

"Me sa duket, ai nuk po flet ende dhe nuk e kemi parë të ecë. Kemi të bëjmë me dikë që, ndoshta, ka pak ndërveprim me anëtarët e familjes, edhe nëse nuk mund të themi a priori se është mirë", mbylli ai fjalën e tij për këtë temë.