Rreth 30 minatorë po protestojnë që nga orët e para të mëngjesit përballë Kryeministrisë, për miratimin e statusit të tyre. Gazetari i Report Tv raporton se midis protestuesve haset prania e grupit nismëtar të statusit të minatorit; Nikoll Gjoka, Dede Marku dhe Mark Gjergji. Krahas të përmendurve, vihen re edhe përfaqësues të sindikatave dhe konfederatave.
Një pjesë e protestuesve mësohet se janë larguar për shkak të përkeqësimit të motit, ndërsa dy prej tyre janë drejtuar për në spital për shkak se iu është përkeqësuar gjendja shëndetësore. Një prej tyre u shpreh për Report Tv se ditën e nesërme do të shtohet numri i protestuesve. Sa i takon atyre që shihen të pranishëm në protestë, vihen re me pankarta nëpër duar ku shkruhet: 'Zoti kryeministër, mbaj premtimin e dhënë', 'Minatorë bashkohuni për fitore', 'Qeveritarë, nuk ju lejojmë të talleni me djersën dhe dinjitetin tonë', 'Të miratohet statusi', etj.
Më datë 16 nëntor, një grup minatorësh paralajmëruan pikërisht nga Kryeministria se më datë 26 nëntor do të nisnin protestën e tyre për miratimin e statusit të minatorit. Sipas tyre, kostoja financiare është totalisht e përballueshme për shtetin për marrjen e statusit të minatorit, gjithmonë nëse mirëmenaxhohen pasuritë nëntokësore.
Një pjesë e minatorëve që po protestojnë përpara Kryeministrisë për miratimin e statusit të minatorit
