SHBA - Ministrat e Jashtëm të Ballkanit Perëndimor, kanë zhvilluar në Nju Jork takimin e radhës. Në këtë takim Bushati u takua me homologët e Bosnjë-Hercegovinës, Maqedonisë, Serbisë, Kosovës dhe Malit të Zi.
 
Ky takim u krye në kuadër të nismës për “Bashkëpunim të Përforcuar në Kuadër të Procesit të Stabilizim – Asociimit” (Enhanced Cooperation within the Stabilization and Association Process) dhe pason takimin e mbajtur më 10 korrik në Kotorr të Malit të Zi.
 
Ministri i Punëve të Jashtme Ditmir Bushati,  mori pjesë në takimin e ministrave të Punëve të Jashtme të gjashtë  vendeve  të rajonit, Shqipërisë, Bosnje-Hercegovinës, Maqedonisë, Serbisë, Kosovës dhe Malit të Zi,  që u  zhvillua në Nju Jork.
 
 Përveç ministrave të jashtëm të vendeve të Ballkanit Perëndimor, në këtë takim morën pjesë  Komisioneri për Zgjerimin, Stefan Fule dhe Ministrja e Punëve të Jashtme të Italisë, Federica Mogherini, e cila do të drejtojë politikën e jashtme të BE-së.
 
Fokusi i takimit ishte bashkëpunimi i vendeve të rajonit në fushën e infrastrukturës dhe atë të energjisë në vazhdën e Konferencës së Berlinit. Nëpërmjet këtyre takimeve jo formale synohet krijimi i një mekanizmi koordinimi për gjashtë vendet e rajonit të përfshira në Procesin e Stabilizim Asociimit.
 
Redaksia Online
(a.h/shqiptarja.com)