Ministri Bushati në Ministerialin e OSBE-së, takim me Sekretarin e Përgjithshëm, Lamberto Zannier  

Gjatë punimeve te Sesionit të 69-të të Asamblesë së Përgjithshme të OKB-së, Ministri i Punëve të Jashtme, Ditmir Bushati, mori pjesë në takimin ministror me temë "Adresimi i krizës së sigurisë evropiane: Rruga përpara dhe roli i OSBE-së", i cili u organizua nën kujdesin e Presidentit, njëkohësisht Ministër i Punëve të Jashtme i Konfederatës Zvicerane, Didier Burkhalter, në cilësinë e Kryetarit të radhës së OSBE-së.

Organizimi i këtij takimi kishte në fokus trajtimin e sfidave me të cilat përballet OSBE-ja në strukturën e sigurisë evropiane, të ndikuara nga kriza në Ukraine, dhe përmirësimi i kapaciteteve të organizatës për përmbushjen e rolit dhe mandatit te saj. Ministrat e Punëve të Jashtme të shteteve pjesëmarrëse të OSBE-së shkëmbyen pikëpamje mbi konsolidimin e sigurisë evropiane, si një projekt i përbashkët i cili ka nevojë për një vullnet politik të fortë dhe real.

Në fjalën e tij, Ministri Bushati vlerësoi rolin e spikatur të OSBE-së në përpjekjet ndërkombëtare për të sjellë paqe dhe stabilitet në Ukrainë, duke sjellë në vëmendje kontributin e Shqipërisë. "OSBE-ja duhet të mbetet një forum për bashkëpunim dhe dialog politik ndërmjet shteteve, një ombrellë nën të cilën mund të rrinë bashke lindja dhe perëndimi", u shpreh Ministri Bushati.

Ministri Bushati merr pjesë në Ministerialin e OSBE-së me temë "Adresimi i krizës së sigurisë evropiane: Rruga përpara dhe roli i OSBE-së"
Ministri Bushati zhvilloi gjithashtu një takim me Sekretarin e Përgjithshëm të OSBE-së,  Lamberto Zannier.

Pjesëmarrja aktive e Shqipërisë në Organizatë dhe gatishmëria për të ndihmuar më tej edhe në reformën e OSBE-së, duke dëshmuar për aftësitë e saj, ishin pjesë e bisedimeve.

Gjatë këtij takimi, Ministri Bushati trajtoi gjendjen e bashkëkombësve tanë në vendet e rajonit, duke kërkuar vëmendjen e OSBE-së në përmirësimin e të drejtave të tyre në vendet ku ata jetojnë, si dhe kërkoi një afrim me të madh të Kosovës me organizatën.

Zannieri shprehu interesin për forcimin e bashkëpunimit mes vendeve të rajonit në fushat e sigurisë dhe luftën ndaj terrorizmit ndërkombëtar. /ATSH/
 
 
 

TAG:
• OSBE