TIRANË - Ministri i Punëve të Jashtme, Ditmir Bushati, do të marrë pjesë në Takimin e Këshillit të Atlantikut të Veriut, në nivelin e Ministrave të Punëve të Jashtme, i cili do të zhvillohet në Bruksel, në datat 1-2 prill 2014.
 
Ndër temat kryesore që pritet të diskutohen gjatë këtij takimi të rëndësishëm janë kriza në Ukrainë, marrëdhëniet NATO-Rusi, NATO-Gjeorgji,operacioni ISAF i drejtuar nga NATO në Afganistan, çështje të partneriteteve, me fokus të veçantë partnerët e Iniciativës së Bashkëpunimit të Stambollit (ICI) në kuadër të 10-vjetorit të krijimit të kësaj iniciative.
 
Ministri i Punëve të Jashtme, Ditmir Bushati, do të zhvillojë gjithashtu takime dypalëshe me homologë të vendeve anëtare dhe partnere të NATO-s. Ky ministerial përkon me 15 vjetorin e pranimit në Aleancë të Republikës Çeke, Hungarisë dhe Polonisë me 10 vjetorin e pranimit të Bullgarisë, Estonisë, Letonisë, Lituanisë, Rumanisë, Sllovakisë dhe Sllovenisë si dhe me 5 vjetorin e pranimit në NATO të Shqipërisë dhe Kroacisë.
 
Redaksia online
(ac/shqiptarja.com)