'Mirëdita mësuese'/ Çdo të hënë në Report Tv leksionet për të ruajtur gjuhën e pastër shqipe

Shpesh na ndodh që teksa nisim të shkruajmë, të mendohemi gjatë nëse kemi gjetur fjalët e duhura dhe nëse ato janë fjalë që i përkasin gjuhës shqipe. Fjalët e huaja thuajse e kanë mbytur gjuhën tonë letrare, ndërsa të shumta janë edhe rastet kur fjalët shkruhen vazhdimisht keq. Nuk po flasim për gabime drejtshkrimore, por për fjalë të njohura në masë në mënyrën e gabuar të të shkruarit.

"Mirëdita mësuese" është një projekt bashkëpunimi i Report Tv me mësuese Anjeza Shatkun, që pritet të na vijë në ndihmë të gjithëve për pikëpyetjet që çojmë në mend, sa herë që duam të shkruajmë një gjuhë të pastër shqipe. I shërben fushës së medias, të poltikanëve, por edhe shqiptarëve përtej kufirit, të cilët kanë rastin më të mirë për të mos i humbur gjurmët e gjuhës së tyre.

Anjeza Shatku, mësuese e gjuhës dhe letërsisë shqipe, do të vijë në ekranin e Report Tv, çdo të hënë në orën 10:45 në emisionin "Rreze Dielli". "Mirëdita mësuese", e gjeni edhe në portalin Shqiptarja.com, ku do të shfaqen me video të gjitha leksionet e paraqitura prej saj.

"Mirëdita mësuese", është një risi në mediat elektronike, me dëshirën dhe vullnetin e mirë që njerëzit të flasin e të shkruajnë sa më mirë gjuhën e tyre, që siç thotë edhe Haideger "është shtëpia e qenies".

Dy pjesët e para me leksione mjaft të vlefshme për të shkruar pastër gjuhën shqipe, i gjeni duke klikuar linkun: KËTU. 

Mjafton të ndiqni këshillat e vlefshme nga mësuese Anjeza Shatku, për të hedhur një sy nga vetja, e për të parë se ku gjendeni me të shkruarin korrekt të gjuhës shqipe.

TAG:
• gjuha shqipe
• miredita mesuese
• anjeza shatku