Mitsotakis: Në Greqi po vaksinohen për COVID-19 rreth 5 mijë qytetarë në ditë

GREQIA- Kryeministri i Greqisë, Kyriakos Mitsotakis ditën e sotme ka deklaruar se në vend po vaksinohen për COVID-19 5 mijë qytetarë në ditë.

Ai shtoi se nëse vaksinimi masiv i qytetarëve do të vazhdojë me këto ritme intensive, situata epidemiologjike në vend do përmirësohet.

“Ne vaksinojmë rreth 5 mijë qytetarë në ditë dhe jam i sigurt se në këto ritme do ti përmbahemi planifikimit, siç është përcaktuar nga Komiteti i Vaksinimit. Më datë 20 janar do të fillojë vaksinimi i qytetarëve mbi 85 vjeç dhe më 11 janar do të hape platforma për takimet”, tha Mitsotakis.

 “Kemi muaj të vështirë përpara, ne e dimë atë mirë. Do të duhet kohë për të vaksinuar një përqindje të konsiderueshme të popullatës sonë. Dhe gjithashtu e dimë që derisa të ndodhë kjo do të duhet të ndjekim masat me shumë kujdes, siç na theksojnë ekspertët ", shtoi kryeministri.

Vaksinimi në Greqi ka nisur më datë 27 dhjetor, ndërkohë deri më sot janë vaksinuar 16,365 qytetarë.

Numri total i infektimeve në vend ka shkuar 141453, ndërkohë që numri i viktimave është 5051, në të gjithë vendin që nga fillimi i pandemisë duke përfshirë edhe përditësimet e ditës së sotme.

Në përpjekje për të vënë nën kontroll valën e re të infeksioneve qeveria Greke ashpërsoi masat anti-COVID. Zëdhënësi i qeverisë Stelios Petsas në një konferencë për mediat më datë 2 janar theksoi se situata epidemiologjike në vend është përmirësuar ndjeshëm, megjithatë rastet e reja ende mbesin në nivele të larta.

J.GJ./Shqiptarja.com

TAG:
• greqia
• Kyriakos Mitsotakis
• Koronavirus
• Vaksina Covid
• masat anticovid