Vendimi i Ministres së Shëndetësisë, Manastirliu se mjekët e familjes do të ndjekin pacientët me COVID-19 që janë të karantinuar në shtëpitë e tyre, ka sjellë reagimin e ish deputetit të Partisë Demokratike, Bardh Spahia.

Spahia u shpreh se Rama nuk duhet të merret me sulmet ndaj opozitës por të kuptojë që është më mirë kur dëgjon dhe mëson dhe sipas tij, ky mësim i erdhi nga opozita me kërkesën e saj prej kohësh për të përfshirë në luftën ndaj COVID-19 dhe mjekët e familjes. Ai shkruan se nëse kjo kërkesë e opozitës do të ishte dëgjuar më herët, atëherë numri i të infektuarve do të ishte më i ulët.

"Edi Rama është edhe pa ide, edhe i papërgatitur, edhe i vjetruar, por përsëri harxhon kohë me sulme bajate politike ndaj opozitës. Partia Demokratike po luan rolin e vet konstruktiv duke mbështetur institucionet e shëndetësisë, duke bërë propozime konkrete dhe duke u ardhur në ndihmë qytetarëve. Ky rast e provon më së miri këtë: 3 javë pasi çdo ditë ekspertët e Partisë Demokratike kërkojnë që në luftën ndaj COVID-19 të përfshihen edhe mjekët e familjes, më së fundmi sot Ministrja e Shëndetësisë, njoftoi vënien në lëvizje të këtij mekanizimi.

Me mjetet e duhura të mbrojtës, mjekët e familjes ishin të domosdoshëm që në fillimet e kësaj beteje. Nëse propozimi ynë nuk do të ishte dëgjuar, mësuar dhe kopjuar, me kaq vonese, sot me shumë siguri, numri i personave të infektuar do të ishte më i ulët, numri i personave të identifikuar si të prekur dhe diagnostikuar në kohë do të ishte më i lartë dhe mund të kishim shpëtuar jetë. Edi Rama duhet ta kuptojë që është më mirë kur dëgjon, mëson dhe kopjon, sesa kur sulmon opozitën", shkruan Spahia.