MPJ: Greqia ngriu paktin
detar, do nisim negociata të reja

TIRANE- Ministri i Jashtëm Edmond Panariti deklaron se mes Greqisë dhe Shqipërisë do të nisin negociata të reja për demilitimin e kufijve detarë.

Deklarata është bërë nga ministri Panariti gjatë një prononcimi për gazetarët menjëherë pas takimit të asamblesë parlamentare të OSBE-së. Panariti shtoi se ky qëndrim i është bërë i qartë dhe ministrit të Jashtëm grek Avramopulos, gjatë vizitës zyrtare që u zhvillua më 3 tetor në Athinë.

“Pozicioni i Shqipërisë është i qartë. Do adresohet nën frymën e Kushtetutës dhe marrëveshjeve ndërkombëtare. Pas vendimit të Gjykatës Kushtetutës për ne nuk ekziston marëveshje për detin. Duhet të punojmë së bashku për të krijuar kushtet për të nisur negociatat për një marrëveshje të re. Kjo marrëveshje nuk duhet të kontestohet nga asnjëra palë për të qenë e qëndrueshme.”- tha Panariti.

Duke iu referuar bisedës për këtë çështje me homologun grek Avramopulos, Panariti tha se ai "respektoi qëndrimin tim".

"Vura re me kënaqësi se dhe shteti grek nuk ka avancuar me ratifikimin e marrëveshjes së vjetër dhe se ajo është e ngrirë dhe nga pala greke, gjë që më bën të shpresoj se tashmë edhe shteti grek do të afrohet ose do të jetë kompatibël në përputhje me qëndrimin shqiptar për adresimin e kësaj çështje shumë të rëndësishme", u shpreh më tej kreu i diplomacisë shqiptare.

Lidhur me abrogimin nga pala greke të ligjit të "luftës me Shqipërinë', ministri shqiptar tha se ky është një absurditet për të cilin janë të ndërgjegjshëm dhe autoritetet në Greqi.

GREQIA DO ABROGOJE LIGJIN E LUFTES
"Kjo nuk është një kërkesë e re. Unë besoj se ky është një absurditet, për të cilin besoj se dhe pala greke është plotësisht e ndërgjegjshme, që kemi të bëjmë me një absurditet të pastër, përderisa të dy vendet tona janë aleatë në NATO. Mbajtja e një ligji të tillë është tërësisht jashtë kohe, një absurd i pastër në kohët e sotme dhe besoj se pala greke do të ketë vullnetin për ta abroguar atë", u shpreh Panariti.

Ministri i Jashtëm e konsideroi si "shumë të rëndësishme dhe produktive" vizitën në Athinë, e cila "projekton drejt së ardhmes marrëdhëniet mes Greqisë dhe Shqipërisë në frymën e dialogut, komunikimit të sinqertë dhe adresimit të problemeve, pa asnjë lloj kompleksi e paragjykimi"
(sg/shqiptarja.com)

TAG:
• OSBE