Pasi çmimi i naftës arriti në 224 lekë/ litri, Konfindustria i bën sërish thirrje qeverisë ndërhyrje të menjëhershme në politikat fiskale dhe rregullatore të tregut të karburanteve. Konfindustria ngre alarmin se shtrenjtimi i naftës pritet të krijojë inflacion me të paktën 6% dhe një rënie të PPB deri në 3%, duke shtuar rrezikun për recesion ekonomik.

“Vlerësimet e modelit ekonomik shqiptar tregojnë, që rritja me 30% e çmimit të derisotëm të karburanteve krijon inflacion me të paktën 6% dhe një rënie të PPB me 2,8-3%. Sa më sipër krijon qartësisht rrezikun për kalimin në recesion ekonomik gjatë periudhës 2026 në vazhdim”, thuhet në deklaratë.

Konfindustria kërkon uljen e menjëhershme të barrës fiskale mbi karburantet dhe taksat e automjeteve, duke theksuar se Shqipëria mbetet i vetmi vend në rajon pa masa lehtësuese konkrete. Në deklaratë, thuhet se ulja e akcizës kur çmimi i naftës të kalojë 220 lekë/litri është një masë e pamjaftueshme.

“Shqipëria është shteti i vetëm në rajon, që nuk ka ndërmarrë asnjë masë të prekshme lehtësuese për krizën e karburanteve. Ndërhyrja me ulje 20% të vlerës së akcizës vetëm, kur çmimi i naftës do të arrijë në 220 lekë/litër është i pamjaftueshëm dhe i pakuptimtë”, thuhet në deklaratë.

Sipas Konfindustrisë, diferenca e lartë e çmimeve me vendet e rajonit rrezikon falimentimin e industrive dhe prodhimit vendas.

“Thellimi i diferencës në kostot e karburanteve me shtetet konkurrente tregtare të Rajonit e më gjerë në kushtet e krizës, shton ndjeshëm rrezikun e falimentimeve për industritë, prodhimin vendor, bizneset si dhe goditje inflacioniste të shumëfishtë për qytetarët”, vijon deklarata.

Konfindustria propozon që Bordi i Transparencës të shndërrohet në Ent Rregulltor të Karburanteve, një institucion i përhershëm kundër spekulimeve në treg. Konfindustria mbështet propozimin për krijimin e një operatori me kapital shtetëror në tregun me shumicë dhe pakicë të karburanteve.