Nga Shqipëria, Kosova e Maqedonia erdhën zëra shumë të mirë, që krijuan skuadra të forta e që i vunë jo pak në vështirësi katër trajnerët.
Por pas sitës së tyre të imët, javën e kaluar ishin votat e publikut që dhanë verdiktin: në gjysmëfinale kaluan Tiri Gjoci dhe Lorenc Hasrama nga skuadra e Sidritit, Elbunit Krasniqi nga skuadra e Gencit, Ina Torba nga skuadra e Almës, duke lënë për herë të parë një trajner pa konkurrentë në një gjysmëfinale, risk që i takoi Jonida Maliqit.
Po cilët janë katër zërat më të mirë të mbetur?
![konkurrentet](http://www.shqiptarja.com/foto/223276.jpg)
![konkurrentet](http://www.shqiptarja.com/foto/223277.jpg)
![konkurrentet](http://www.shqiptarja.com/foto/223278.jpg)
![konkurrentet](http://www.shqiptarja.com/foto/223279.jpg)
Elbunit Krasniqi
Djali shtatlartë me flokë të gjata, që për momentin ka braktisur auditorët e Fakultetit të Mjekësisë në Prishtinë, për të rendur pas pasionit të tij të fortë, muzikës, është kthyer në personazh. Jo vetëm për shkak të zërit e stilit të tij që aq shumë ia kanë preferuar, por edhe për shkak të natyrës. Krejt i qetë e i shtruar, ai ka kaluar me durim e këmbëngulje të fortë faza shumë të vështira, është përballur me konkurrentë e zëra shumë të mirë, për të arritur më në fund deri afër finales. 22-vjeçari ka surprizuar publikun, sidomos atë të Kosovës, që nuk e kishte njohur kurrë më parë, por edhe veten e të afërmit. Sepse ai është djali që nuk e ka shfaqur kurrë zërin e tij, veçse në shtëpi. U desh një “Voice” e pak guxim që Elbuniti të vinte si një dhuratë për Genc Salihun.
Ina Torba
Ajo nuk ka shumë ndryshim nga moshatarët e saj. E lindur në Dibër dhe e zhvendosur në Tiranë, 24-vjeçarja Ina Torba është studente për inxhineri ndërtimi, por edhe punon në një call center dhe ka pasion muzikën. Deri këtu është krejt e ngjashme me shumë të rinj të moshës së saj, që ëndërrojnë një profesion dhe kanë pasionet e tyre. Vetëm se ndryshe nga shumë prej tyre, ajo ka një zë aq të fuqishëm sa e ngre skenën peshë. E ka treguar këtë që në audicionet e fshehura, duke shkaktuar një luftë të vërtetë mes trajnerësh, që donin ta rrëmbenin kush e kush më parë, e deri një javë më parë, duke rrëmbyer votat e publikut në një duel aspak të lehtë me Ernesën, një tjetër zë shumë i fuqishëm. Ina është e vetmja konkurrente që përfaqëson skuadrën e Alma Bektashit.
Tiri Gjoci
Tiri, ndryshe nga shumë konkurrentë të druajtur që pritën me ankth shtypjen e butonëve të famshëm, nuk i kishte emocionet e herës së parë. Sepse skenën e ka provuar kaq e kaq herë. Prej vitesh ka një grup të tijin muzikor, ka marrë pjesë në shumë koncerte e festivale dhe studion në Akademinë e Arteve për Muzikologji. Por i duhej një tjetër njohje, më e fuqishme dhe më e menjëhershme, për veten dhe për grupin e tij. Ndaj edhe garoi si i barabarët mes të barabartëve, duke sfiduar gjithë rivalët një e nga një, e duke arritur deri në fund si një nga dy përfaqësuesit e skuadrës së Sidrit Bejlerit. 22-vjeçari nga Kavaja ka bërë rrugë të gjatë drejt njohjes. Dhe ja ku është afër fundit të një aventure të vërtetë, duke shpresuar finale e madhe.
Lorenc Hasrama
Është vetëm 18 vjeç, por në pozita krejt të njëjta me tre konkurrentët e tjerë, që i kanë kaluar të njëzetat. Pasi ka arritur i sigurt deri në këtë fazë, tanimë lufton për finalen, duke shfrytëzuar mirë armët e tij më të forta: eksperiencën e deritanishme me grupin e tij muzikor, zërin e veçantë që aq shumë ia kanë vlerësuar, lirshmërinë dhe aftësinë për të zotëruar emocionet që sapo shkel në skenë. Nuk është rastësisht në atë skenë. Prindërit e kanë drejtuar që në fillim fare drejt muzikës. Ai studion në Liceun Artistik për violë dhe pak nga pak është duke krijuar profilin e tij artistik. Ka edhe një fazë të fundit për të arritur aty ku do. Të paktën tani për tani. Sepse Lorenci është djalë me ambicie të forta.
Redaksia Online
Shqiptarja.com
![](https://www.shqiptarja.com/template/img/sh_logo1.png)