POP 5

Lajmet më të lexuara të 5 minutave të fundit

Kronikë

Nazime Visha fiton lirinë
presidenti Nishani i fal dënimin
VIDEO/Nazime Visha lë qelinë

President i  Republikës Bujar Nishani fal dënimin për Nazime Vishën. Dekreti i Nishanit vjen pas kërkesës së ministrit të Drejtësisë Ylli Manjani më datë 22 shkurt. Nazima Visha ndodhej në burg për vrasjen e Fiqiri Muçës dhe ishte dënuar me 10 vite burg. Deri tani Visha kishte kryer më shumë se 1/3 e dënimit. Ajo do të lërë qelinë në orën 12.00.  VIDEO
Teksa i kishin mbetur dhe 3 vite e 9 muaj burg, Nazime Visha ka fituar lirinë. Pjesa e mbetur e dënimit është falur nga Presidenti i Republikës Bujar Nishani.

Në dekretin e tij, Nishani thotë se duke u nisur nga kërkesa e ministrit të Drejtësisë Ylli Manjani më datë 26 shkurt 2016, dekreton faljen e pjesë së mbetur të dënimit të Nazime Vishës, e cila deri më tani kishte kryer rreth 1/3 e dënimit.

 Presidenti Nishani ka arsyetuar në dekretin e tij arsyet e faljes së Vishës e cila ishte dënuar me 10 vite burg për vrasjen e Fiqiri Muçës.

“Falja është një akt human i jashtëzakonshëm mëshire, dhe jepet në rastet kur nuk ekzistojnë kriteret ndaluese, e kur dënimi i vuajtur ka arritur qëllimin edukues dhe riintegrues. Tek kërkuesja vlerësova gjithashtu pendimin e thellë, sjelljen e saj si e dënuar, arsyetimin ligjor dhe propozimin e Ministrit të Drejtësisë, si dhe çdo rrethanë tjetër të veçantë që justifikon faljen,” thuhet në dekretin e faljes së Nishanit.

Nazime Visha do të lërë qelinë në orën 12.00.

 

D E K R E T
PËR FALJE DËNIMI

Në mbështetje të nenit 92 gërma “b” dhe 93 të Kushtetutës, si dhe të neneve 11 dhe 12, të ligjit nr. 10295, datë 1.7.2010 “Për Faljen”, me propozim të Ministrit të Drejtësisë,

D e k r e t o j
Neni 1

Nazime Beqir Visha, dënuar nga Gjykata e Rrethit Gjyqësor Tiranë, me vendim nr.567, datë 08.05.2013, me 10 (dhjetë) vite burgim, për kryerjen e veprave penale “Vrasje me paramendim”, “Prodhim dhe mbajtje pa leje të armëve luftarake”, parashikuar nga nenet 78/1 e 278/2 i Kodit Penal, lënë në fuqi me vendimin nr.918, datë 18.10.2013 të Gjykatës së Apelit Tiranë,  i falet pjesa e dënimit të mbetur.

Neni 2

Ky dekret hyn në fuqi menjëherë.

Nr. Dekretit 9488   
Tiranë, më 25.03.2016
                                                             
PRESIDENTI I REPUBLIKËS
BUJAR NISHANI

Arsyetim i Dekretit Nr. 9488, datë 25 mars 2016 “Për  Falje Dënimi”

Mbështetur në përcaktimet kushtetuese, dhe ligjin nr. 10295, datë 01.07.2010 “Për Faljen”, vendosa të shqyrtoj kërkesën dhe dokumentacionin ligjor, për faljen e të dënuarës Nazime Beqir Visha, paraqitur nga Ministri i Drejtësisë, së bashku me propozimin e tij, për pranimin e kësaj kërkese ( Nr.1345/4 prot, dt.26.02.2016).
Nga dokumentacioni rezultoi se kërkuesja Nazime Beqir Visha është dënuar nga Gjykata e Rrethit Gjyqësor, Tiranë me 10 (dhjetë) vite burgim, për kryerjen e veprave penale “Vrasje me paramendim”, dhe “Prodhim dhe mbajtje pa leje të armëve luftarake”, parashikuar nga nenet 78/1 e 278/2 i Kodit Penal, lënë në fuqi nga Gjykata e Apelit Tiranë, me vendim nr.918, datë 18.10.2013.
E dënuara rezulton, gjithashtu, se ka kryer më shumë se 1/3 e dënimit të dhënë, dhe sipas akteve të Ministrit të Drejtësisë i mbetet për të vuajtur edhe 3 (tre) vite, e 9 (nëntë) muaj, e 21 (njëzetenjë) ditë burgimi (data e llogaritjes deri më 17.02.2016). Në llogaritjen e vuajtjes së dënimit janë konsideruar dhe uljet e dënimit të fituara nga paraburgimi, nga ligji  nr. 8328 , datë 16.04.1998  “Për të drejtat dhe trajtimin e të dënuarve me burgim dhe të paraburgosurve”, i ndryshuar si dhe nga ligji nr.22/2014 “Për dhënie amnistie”.
Pas shqyrtimit të dokumentacionit në ushtrimin e të drejtës së faljes, për të dënuarën  Nazime Beqir Visha, kam mbajtur parasysh kushtet dhe kriteret e ligjit nr. 10295, datë 01.07.2010 “Për faljen”, si dhe faktin sipas të cilit falja është një akt human i jashtëzakonshëm mëshire, dhe jepet në rastet kur nuk ekzistojnë kriteret ndaluese, e kur dënimi i vuajtur ka arritur qëllimin edukues dhe riintegrues. Tek kërkuesja vlerësova gjithashtu pendimin e thellë, sjelljen e saj si e dënuar, arsyetimin ligjor dhe propozimin e Ministrit të Drejtësisë, si dhe çdo rrethanë tjetër të veçantë që justifikon faljen.
Për të gjitha këto arsye vendosa që në mbështetje të nenit 92 gërma “b” dhe 93 të Kushtetutës, si dhe të neneve 11 dhe 12, të ligjit nr. 10295, datë 01.07.2010 “Për  Faljen”, me propozim të Ministrit të Drejtësisë, të dekretoj faljen e pjesës së dënimit të mbetur, të të dënuarës Nazime Beqir Visha.

PRESIDENTI I REPUBLIKËS
BUJAR NISHANI


Redaksia Online
(u.s/shqiptarja.com)

/Shqiptarja.com
  • Sondazhi i ditës: 13 Janar, 10:25

    Nisi regjistrimi, a do të marrë pjesë masivisht në zgjedhje diaspora?

Lajme të tjera



×

Lajmi i fundit

Afera Partizani/ Iu refuzua shfuqizimi i masës së sigurisë, Kushtetuesja zbardh vendimin për Jamarbër Malltezin

Afera Partizani/ Iu refuzua shfuqizimi i masës së sigurisë, Kushtetuesja zbardh vendimin për Jamarbër Malltezin

15 Janar, 18:50