Ish-kryeministri i Francës, Lionel Jospin ka ndërruar jetë në moshën 88-vjeçare. Lajmi u bë i ditur mëngjesin e kësaj të hëne nga familjarët e tij.

Jospin kishte një karrierë të gjatë politike në Francë, duke shërbyer si Ministër i Arsimit në fund të viteve 1980 dhe fillim të viteve 1990. Ai u bë Sekretar i Parë i Partia Socialiste dhe pas shpërbërjes së Asamblesë Kombëtare të Francës nga Jacques Chirac në vitin 1997, udhëhoqi qeverinë për pesë vjet.

Më pas ai drejtoi qeverinë për pesë vite, duke udhëhequr koalicionin e “Së Majtës Pluraliste”, i cili bashkoi forca të ndryshme politike përtej socialistëve.

Si kryeministër, Jospin zbatoi reforma të rëndësishme, si java 35-orëshe e punës, Mbulimi Universal Shëndetësor (CMU) dhe Pakti i Solidaritetit Civil (PACS), që u mundëson çifteve heteroseksuale dhe homoseksuale të lidhin një marrëveshje bashkëjetese pa martesë.

Në vitin 2002 ai kandidoi për herë të dytë për president. Përballë një numri të madh kandidatësh nga e majta, nuk arriti të kalojë në raundin e dytë të zgjedhjeve.

Rendit zhvillimet sipas orarit:
Ora 12:54
'Ndryshoi perceptimin që kisha për Francën' Majko reagon për vdekjen e ish-kryeministrit francez Lionel Jospin: Ishte përkrahës i shqiptarëve në Luftën e Kosovës

Ish-kryeministri Pandeli Majko ka reaguar për ndarjen nga jeta të ish-kryeministrit francez Lionel Jospin, duke e cilësuar atë si një figurë të madhe politike dhe një mik të shqiptarëve.

Në një mesazh në rrjetet sociale, Majko ndau kujtimet e tij personale për Jospin, duke e përshkruar si një figurë stabiliteti në një sistem me ekuilibra të brishtë.

Por ajo që Majko veçon më shumë është roli i ish-kryeministrit francez gjatë Luftës së Kosovës.

"Ish kryeministri i Francës, Lionel Jospin (1997 - 2002), ka ndëruar jetë! Kam kujtim të veçantë për këtë njeri i cili të impononte respekt! Ai ishte produkt i karizmës personale sa edhe i institucioneve franceze! Lionel Jospin ishte socialist! Ai bashkëqeverisi Francën me një politikan të djathtë dhe me “kockë të rëndë” siç ishte Zhak Shirak! Lionel Jospin ishte një francez atipik! Ai nuk qëndronte i fshehur pas versionit “publik”! Në një sistem të ndërtuar mbi ekuilibra të brishtë, ai ishte njeri i stabilitetit. Lionel Jospin ishte përkrahës i shqiptarëve në Luftën e Kosovës! Ai ndryshoi, edhe tek unë, perceptimin që kisha për francezët! Ishte njeri, dhe pastaj titullar! I qoftë dheu i lehtë!" shkruan ai. 

 

U.D/Shqiptarja.com