Një lajm qarkulloi ditën e sotme se sistemi TIMS nuk është rikthye ende në punë pas sulmit kibernetik, por kryeministri Edi Rama ka sqaruar se kjo nuk është e vërtetë. Referuar lajmit të Top Channel, Rama thotë se qeveria nuk po gënjen në këtë mes, por sistemi TIMS është rikthyer tashmë në funksion të plotë. Rama e cilëson këtë lajm si një festë tallavaje, për disa portale që s’duan t’ia dinë për infomimin e publikut.

“Kjo s'është ‘Festë për kriminelët’ po një festë tallavaje për ekrane e portale që s'duan t'ia dinë për publikun që i sheh e lexon, se për më shumë si psh për dinjitetin kombëtar është edhe gjynah t'iu kërkosh! Jo që s'po gënjen qeveria, po vetëm qeveria s'po gënjen në këtë mexhelis”, shkruan Rama.

Pas sulmit kibernetik të Iranit ndaj sistemit TIMS, qeveria njoftoi dje se sistemi është rikthyer në të gjitha pikat kufitare të vendit tonë.

Rendit zhvillimet sipas orarit:
Ora 20:19
Ministri i Brendshëm shpërndan videon nga Rinasi: Sistemi TIMS është në funksion të plotë

Ministri i Brendshëm Bledi Çuçi ka publikuar një video nga aeroporti ndërkombëtar ‘Nënë Tereza’, nga sistemi i portave elektronike (e-gate), që përdoren për identifikimin elektronik të pasaportave. Çuçi shkruan se sistemi TIMS është në funksion të plotë, pasi E-gate nuk punon dot pa të. Ndërkohë, ai shton se lajmi që nuk punon është i pavërtetë.

"Live nga Rinasi. Ky është sistemi i portave elektronike (e-gate). E-gate nuk ka si punon pa TIMS dhe TIMS është 100% në punë qysh prej kur njoftuam publikisht. Të tjerat janë dizinformim i qëllimshëm ose nga përtacia po njësoj i dëmshëm për publikun", shkruan Çuçi.

SI.E./Shqiptarja.com