Bloomberg ka publikuar dy transkriptime private të negociatave SHBA-Rusi për planin e paqes në Ukrainë. Në të parin, i dërguari presidencial i SHBA-së, Steve Witkoff, thuhet se e këshilloi këshilltarin diplomatik të Kremlinit, Yury Ushakov, se si Vladimir Putin duhet ta lajkatojë Donald Trump me një propozim paqeje për Ukrainën. Biseda telefonike e mesit të tetorit duket se tregon origjinën e propozimit me 28 pika, të mbështetur nga Trump, i cili u konsiderua gjerësisht i favorshëm për Moskën sepse kërkonte lëshime të konsiderueshme territoriale nga Ukraina dhe një angazhim për të mos u bashkuar me NATO-n. Ky propozim u kundërshtua më vonë nga kundërpropozimi i Evropës, i paraqitur ditët e fundit.

Në transkriptimin e dytë, i dërguari rus Ushakov flet me të dërguarin e çështjeve ekonomike, Kirill Dimitriev, rreth planit që do të paraqitet. Pas publikimit të transkripteve, Moska theksoi se nuk ishte përgjegjëse për rrjedhjen e informacionit, duke shpjeguar se ishte një tjetër përpjekje për të minuar "marrëdhëniet tashmë të vështira midis SHBA-së dhe Rusisë".

Transkriptimi i parë i publikuar

Sipas transkriptimit të parë të publikuar nga faqja e internetit e lajmeve amerikane, gjatë telefonatës midis Witkoff dhe Ushakov, i dërguari i SHBA-së deklaroi se besonte se Rusia "gjithmonë ka dashur një marrëveshje paqeje" dhe se kishte "respektin më të madh për Presidentin Putin". I dërguari i SHBA-së i sugjeroi Ushakovit se Putini duhet ta lavdëronte Trump gjatë një telefonate të ardhshme në lidhje me armëpushimin e vendosur së fundmi në Gaza, duke i thënë se "respekton faktin që ai është një njeri i paqes dhe se është vërtet i lumtur që e ke parë të gjithë këtë të ndodhë".

Witkoff thuhet gjithashtu se rekomandoi krijimin e një plani paqeje me 20 pika për Ukrainën, "ashtu siç bëmë në Gaza", duke e ftuar Putinin t'ia paraqiste atë Trump. "Mendoj... presidenti do të më japë shumë liri veprimi dhe diskrecion për të arritur një marrëveshje", thuhet se i tha ai Ushakovit. Telefonata midis Trump dhe Putin u zhvillua më 16 tetor, me presidentin amerikan që e quajti atë "shumë produktive", duke vënë më vonë në pikëpyetje kërkesën e Kievit për raketa Tomahawk vetëm një ditë para se të priste Presidentin ukrainas Volodymyr Zelensky në Shtëpinë e Bardhë.

Transkriptimi i dytë

Këtë here biseda zhvillohet midis Yuri Ushakovit dhe Kirill Dmitrievit, të dërguarit ekonomik të Kremlinit, i cili ishte shumë i përfshirë në diskutime me zyrtarët amerikanë, përfshirë Steve Witkoff, mbi planin e paqes për të zgjidhur konfliktin ukrainas. Biseda mes të dyve u zhvillua më 29 tetor, sipas agjencisë amerikane, e cila publikoi transkriptin në anglisht dhe versionin e tij origjinal rus. "Mendoj se do ta shkruajmë këtë dokument mbi qëndrimin tonë dhe do ta qarkullojmë atë në mënyrë joformale", tha Kirill Dmitriev. "Nuk mendoj se ata do ta marrin versionin tonë fjalë për fjalë, por të paktën do të jetë sa më besnik të jetë e mundur", vazhdoi ai, në atë që duket të jetë një referencë për zyrtarët amerikanë. Faqja e lajmeve Axios raportoi se Kirill Dmitriev kaloi tre ditë me Steve Witkoff dhe zyrtarë të tjerë amerikanë në Miami, nga 24 deri më 26 tetor.

Reagimet

Shtëpia e Bardhë tha se nuk gjente "asgjë të çuditshme. Witkoff flet çdo ditë me rusë dhe ukrainas." Duke reaguar ndaj publikimit të transkriptit, drejtori i komunikimit të Shtëpisë së Bardhë, Steven Cheung, tha se kjo vetëm vërteton se Witkoff "bisedon pothuajse çdo ditë me zyrtarë rusë dhe ukrainas për të arritur paqen, dhe pikërisht për këtë e emëroi Presidenti Trump."

Donald Trump mbrojti veprimet e Steve Witkoff pas publikimit të transkriptit të telefonatës midis të dërguarit të tij të posaçëm dhe këshilltarit diplomatik të Putinit, Yuri Ushakov. "Nuk dëgjova asgjë, por është një formë shumë standarde negociimi sepse ai duhet t'ua shesë këtë marrëveshje" të dyja palëve, tha presidenti. "Sepse secila palë duhet të japë dhe të marrë", përfundoi ai.

Rendit zhvillimet sipas orarit:
Ora 13:13
Negociatat për Ukrainën, disa republikanë kundër Witkoff: Të shkarkohet!

1763634998_stevewitkoff.webp

Zbulimi ekskluziv i Bloomberg mbi telefonatën mes të dërguarit amerikan Steve Witkoff dhe këshilltarit të Kremlinit, Yuri Ushakov, ka shkaktuar irritim te disa deputetë republikanë, të cilët tashmë janë në polemikë me Donald Trump për një linjë ndaj Ukrainës që konsiderohet tepër filo-ruse.

Witkoff “duhet të shkarkohet”, deklaroi pa asnjë hezitim Don Bacon. “Për të gjithë ata që kundërshtojnë pushtimin rus dhe duan ta shohin Ukrainën të triumfojë si një vend sovran dhe demokratik, është e qartë se Witkoff është plotësisht pro rusëve. Nuk mund t’i besohet për të udhëhequr këto negociata. A do të bënte më pak një agjent rus i paguar?”, pyeti ai në X.

Të njëjtin ton pati edhe kritika e Brian Fitzpatrick. “Ky është një problem serioz. Dhe një nga arsyet pse këto shfaqje qesharake paralele dhe këto takime sekrete duhet të marrin fund”, shpjegoi ai po në X. “Lejojeni sekretarin e Shtetit Marco Rubio të bëjë punën e tij në mënyrë të paanshme dhe objektive”, kërkoi ai.

Pjesë e telefonatës mes Witkoff dhe Ushakov, më poshtë fjalët e emisarit amerikan: 

"E di se çfarë duhet për të arritur paqen: Donetsku (për Rusinë) dhe ndoshta një shkëmbim territori në një vend tjetër. Por në vend që ta themi kështu, po flasim për planin me më shumë shpresë, sepse mendoj se mund të arrijmë një marrëveshje."

 

A.I/Shqiptarja.com