Nënshkruhet memorandumi mes shtetit-bankave dhe sipërmarrjes për të vënë në zbatim programin “Dyfisho sipërmarrjen tënde”. Programi është i bazuar në kredi të buta me fokus tek sektori i bujqësisë dhe tek ndërmarrjet e vogla dhe të mesme.

Në fjalën e tij, guvernatori Gent Sejko u bëri thirrje bankave të rrisin vëmendjen ndaj këtyre ndërmarrjeve sidomos në fushën e Bujqësisë ndërsa bizneseve u kërkoi t’u afrohen më shumë bankave.

“Prej më shumë se një viti, Banka e Shqipërisë ka miratuar dhe ka vënë në zbatim një Program Financimi për Biznesin e Vogël dhe të Mesëm, i cili synon reduktimin e kostove të kredisë për këtë segment esencial të ekonomisë shqiptare. Progresi i bërë gjatë dy viteve të fundit është padyshim një premisë inkurajuese. Megjithatë, duke përfituar nga rasti, dëshiroj t’i bëj thirrje industrisë bankare për të pasur një vëmendje më të madhe ndaj financimit të sektorit të SME-ve, e veçanërisht atij agro”, tha Sejko.

Ministri i Financave Petrit Malaj tha se SME-të zënë peshën kryesore në ekonomi, ndaj shteti ofron rreth 250 mln euro kredi me normal të ulëta interesi, garanci sovrane 30 milionë euro dhe grante financimi për planet e biznesit.

“Kjo nismë që po ndërmerr qeveria lidhet me SME, përbën shtyllën kryesore të ekonomisë shqiptare. 99% e ndërmarrjeve në ekonominë shqiptare kategorizohen si ndërmarrje të vogla dhe të mesme. Rreth 75 e investimeve të kryera në ekonomi vijnë nga këto ndërmarrje.78% e vlerës së shtuar në ekonomi vjen nga ndërmarrjet e vogla dhe të mesme. Janë sektorët që kanë peshën kryesore në ekonomi, si në prodhim, shërbim dhe të gjitha aktivitetet e tjera ekonomike. Pesha e SME është më e lartë se sa pesha që zë në vendet e BE. 82% të fuqisë punëtore, ndërkohë në BE punësojnë rreth 65% të fuqisë punëtore. Qeveria përmes nismës do synojë rritjen e aksesit në financim për SME në sektorë që janë të nënfinancuar. Do ti mbështesim jo vetëm në rritjen e kapaciteteve tek, dixhitalizim eficencës së energjisë dhe fusha të tjera. Mbështetja që do të japim do sjellë edhe rritje të konkorrueshmërisë dhe produktivitetit të tyre dhe do sjellë edhe përafrim më të shpejtë me standardet e BE. Do mbështetet fillimisht me kredi 250 mln euro, që do ofrohet me norma të ulëta interesi, kredi të buta. Edhe me garanci sovrane 30 mln euro, që do shtrihet nga sektori bujqësor për të mbështetur edhe SME. Garancia sovrane do të rritet bazuar nga kërkesat që do vijnë nga SME”, tha Malaj.

Kurse Ministrja e Ekonomisë Delina Ibrahimaj tha se shteti do të dalë garant për 70% të vlerës së kredisë.

“Qëllimi i memorandumit është të krijojmë një instrument, prej 250 milionë euro me kredi me interesa të ulta që do të mbështetet me një garanci sovrane nga ministra e Financave dhe do të mbulojë 70% të kolateralit. U mendua fillimisht për bujqësinë por vlerësuam që të shtrihet edhe tek SME-të. Ky program synon të nxisë investimet në digjitalizim, në linja prodhimi, në standarde etj”, tha Ibrahimaj.

Kryeministri Rama tha se interesi i kredisë për sipërmarrësit do të jetë minimumi 2% dhe maksimumi 3%. Ai shtoi se në 5 vitet e fundit kredia në Shqipëri është dyfishuar, duke kaluar nga 5 miliardë euro në 10 miliardë euro, çka sipas tij tregon rritjen e kapaciteteve financuese të bankave të nivelit të dytë.

“Kam mundur të shoh një sërë ndërmarrjes të vogla që bazuar në eksperiencën e shqiptarëve dhe shqiptareve të kthyer nga emigracioni, bazuar në shpirtin inovativ, vullnetin për të bërë diçka domethënëse në komunitet dhe për të punësuar familjen dhe njerëzit përreth kanë qenë eksperienca të jashtëzakonshme, prekëse dhe ndërkohë eksperienca që më kanë treguar se me një mbështetje financiare të arsyeshme, ato realitete mund të rriten dhe sjellin të reja kuptimplota për ekonominë tonë. Në fund të çdo bisede ka qenë problem financimi i arsyeshëm në pamundësi për të marrë kredi normale komerciale të cilat nuk mund t’i përballojnë për të hedhur hapin tjetër.

Ishte një projekt i dedikuar për bujqësinë, nga i cili ne nxorëm mësimet tona dhe sot është një projekt që është kthyer në një program mbështetje të qeverisë për të gjitha ndërmarrjet e vogla dhe të mesme. Ata që kanë ndërmarrje, pas firmosjes futet në zbatim një program që i hapet derë për të dyfishuar sipërmarrjen e tyre. 5 vjet më parë kredia në Shqipëri ka qenë rreth 5 mld euro, sot pas 5 vjetësh kredia në Shqipëri është 10 mld euro, jemi në një dyfishim të kapacitete financues nga banka të nivelit të dytë. Do vihet në dispozicion linjë kredi me interes minimal 2% dhe maksimal 3%. Kërkojmë bashkëpunim të plotë nga ana juaj, e shoqëruar me garanci sovrane për të ulur riskun e kredisë për bankat. Garanci sovrane që varion nga 30-70% sipas nivelit të riskut", theksoi Rama. 

Kreu i qeverisë u ndal edhe tek sektori agro, duke kërkuar nga bankat të tregohen më kurajoze në financimin e bujqësisë dhe agrobiznesit.

Bankat duhet të jenë pak më kurajoze edhe në raport me sektorin e bujqësisë. Niveli i riskut është i lartë dhe kemi mësuar se projektet nga ky sektor duhet të jenë projekte që kanë një risk më të ulët dhe që lidhen me agrobiznesin, inovacionin”, tha Rama.

Lajmi në përditësim....