Netanyahu kërkon dëbimin e emigrantëve të Eritresë! Përleshje në rrugët e Tel Avivit, dhjetëra të plagosur

Kryeministri i Izraelit, Benjamin Netanyahu thirri këtë të dielë një mbledhje urgjente të qeverisë duke kërkuar dëbimin e menjëhershëm të emigrantëve që morën pjesë në trazirat në rrugët e Tel Avivit.

Të shtunën, qindra mbështetës dhe kundërshtarë të qeverisë së Eritresë u përplasën me njëri-tjetrin dhe policinë izraelite, duke lënë pas dhjetëra të plagosur në rrugët e kryeqytetit izraelit.

“Ajo që ndodhi kaloi vijën e kuqe, ndodhën trazira, e gjakderdhje, kjo situatë është e papranueshme. Kërkojmë masa të forta ndaj pjesëmarrësve në trazira, përfshirë dëbimin e tyre të menjëhershëm”, tha Kryeministri Netanyahu.

Përplasjet ndodhën pasi mbështetës të qeverisë eritrease, u mblodhën pranë ambasadës së Eritresë në Tel Aviv për të festuar 30-vjetorin e ardhjes në pushtet të drejtuesit aktual të vendit, ndërkohë që kundërshtarët ishin autorizuar të mbanin një tjetër tubim të veçantë.

Eritreasit u përleshën nëpër rrugë duke përdorur mjete të forta, mes tyre shufra metali, gurë, madje edhe sopata. Ata thyen dritaret e dyqaneve dhe shkatërruan makina të policisë. Eritreasit përbëjnë shumicën e mbi 30 mijë azilkërkuesve afrikanë që ndodhen në Izrael. Eritrea është ndër vendet me gjendjen më të rëndë të të drejtave të njeriut. Azilkërkuesit në Izrael dhe gjetiu thonë se mund të vriten nëse rikthehen në Eritre.

M.Q./E.H/Shqiptarja.com

TAG:
• Benjamin Netanyahu
• Izrael