LSI bëhet 'Partia e Lirisë'! Meta në krye si nacionalist: Ia vlen të vdesësh për Shqipërinë, na rrezikohet sovraniteti dhe Kosova, do përballemi me tradhtarët

Monika Kryemadhi ka zbuluar lëvizjen e radhës pas lënies së partisë. Ajo komunikoi se do rikthehej te të rinjtë.

‘Rikthimi i partisë në atë aspiratë që ajo ka pasur për ato që ka pasur.

Meta? Përveçse është një ndër shtetarët mund të them që është një ndër politikanët, di të them që është politikani më i përgjegjshëm që asnjëherë nuk bën lëvizje të gabuar.

Nuk do ta mendoja bashkëshorti i Monikës por themeluesi i partisë. Rikthimi i tij është shpresë për opozitarizmin. Për të krijuar një hapësirë lirie të menduarit dhe të votuarit. Njerëzit nuk ndjejnë liri. Unë si Monikë ndihem shumë mirë për të punuar me të rinjtë, që më rinon edhe më shumë sepse Monika dikur ishte në një kafaz që mund të ishte i bukur por shumë i vështirë. Rikthimi i Monikës do ta kthejë atë në të lirë. Pengu i vetëm i imi ishte se nuk dëgjova Metën për mandatet.’- tha Kryemadhi

Në përfundim të Konventës Kombëtare ku u vendos ndryshimi i emrit të LSI në “Partia e Lirisë” dhe solli rikthimin e Ilir Metës në krye të partisë, vetë Meta tha se puna nis që sot dhe duhet të përmbyllet për 2 muaj.

“Sovraniteti i qytetarëve dhe interesave më të larta të vendit dhe shtetit. Mbizotëron liria dhe sovraniteti mbi çdo gjë tjetër. LSI e krye misionin e saj. Tani është liria dhe referendumi që do qëndrojë si shpata mbi këtë klasë politike për të çuar para procesin e integrimit.

Nga sot nis puna. Çdo ditë pa ndërprerje. Në dy muaj duhet të jetë përmbyllur konventa e ardhshme që do të jetë një mesazh i shpërthimit të energjive më vitale të të rinjve dhe intelektualëve në mbrojtje të atdheut të tyre”, u shpreh Meta.

Monika Kryemadhi ka dhënë dorëheqjen nga LSI. Komiteti Organizator i ka dhënë drejtimin Ilir Metës.

Drejtuesi i Komitetit Organizator të jetë zoti Ilir Meta dhe zëvendës Kryetar të jetë zoti Agim Nesho.

Komiteti Organizativ LISTA e plote

Një ditë pasi la Presidencën, Ilir Meta merr drejtimin e “Partisë së Lirisë” dhe zëvendës kryetar është Agim Nesho. Nga dita e sotme, LSI ndryshoi emrin në “Partia e Lirisë”.

LSI do të quhet Partia e Lirise. Miratohet edhe në Konventën Kombëtare. 

“Tani ka vetëm një rrugë, referendumi! Vetëm referendumi është garancia se Shqipëria do të jetë e shqiptarëve. Nuk ka forcë në botë që t’i blejë 3 milionë shqiptarë. Mos harroni Atdheun, fëmijët tuaj. Fëmijët tanë mund të gjejnë ccdo gjë jashtë, por Atdheu është vetëm këtu. Prandaj ju ftoj në partinë e lirisë, sovranitetit, partinë e referendumit. Partia e Lirisë dhe e të gjithë shqiptarëve. Rroftë Shqipëria e lirë dhe demokratike. Rroftë Kosova shtet i pavarur”, tha sot Meta.

Meta nga Konventa e LSI-së ka deklaruar që të shpallin non grata rilindjen dhe se do ishte gati të vdiste për Shqipërinë.

‘Mos shisni votën, mos tradhtoni Kushtetutën. Thonë pse po i hynë kësaj lufte, çfarë do fitosh ti? Tregtarët hyjnë në luftë vetëm për të fituar, atdhetarët hyjnë në çdo betejë që i kërkon vendi dhe historia. Ka beteja që ja vlen edhe të vdesësh. Sot me besa besë. Me popullin e 2 marsit të shpallim “non grata” kleptokraacinë, të dshpallim “non grata” rilindjen mavi edhe taë pjesë të rilindjes blu të pazareve të 7 majit.’- tha Meta

Ilir Meta foli para mbështetësve të tij në Konventën Kombëtare të LSI duke përsëritur fjalën e tij të mëngjesit se kanë vetëm rrugën e Referendumit. Ndër të tjera i bëri thirrje që të mos shesin votën, të mos e tradhtojnë atë (Ilir Metën) dhe Kushtetutën.

“Mos shisni votën. Mos tradhtoni Ilir Metën, mos tradhtoni Kushtetutën. Po pse po i hyn kësaj lufte, çfarë të duhet ty, tregtarët hyjnë vetëm për të fituar, atdhetarët hyjnë me të gjitha betejat që i kërkon vendi e historia. Ka beteja për të cilat ia vlen edhe të vdesësh.

Sot me besa besë, me të gjithë shqiptarët e ndershëm të shpallim non grata kleptokracinë. Të shpallim non grata rilindjen mavi dhe atë pjesë të rilindjes blu. Prandaj nuk jam këtu për asgjë tjetër veçse për tju kërkuar që tju tregojmë të gjithë atyre shqipfolësve gjakprishur që nuk kanë lidhje me ne por edhe gjithë botës se jemi popull me dinjitet, jemi popull europian që padrejtësisht kjo mafie për interesat e saj por edhe të asaj mafies ndërkombëtare që e kërkon Shqipërinë si një vend për pastrimin e parave dhe si një bazë logjistike për krimin e organizuar, tu themi që ky është vendi ynë dhe askush nuk mund të luajë. Kemi vetëm një rrugë, kjo rrugë është Referendumi”, tha Meta.

Ilir Meta u ka bërë thirrje qytetarëve  të mos besojnë asnjë politikan as atë vetë,

‘Unë jam këtu sepse nga lufta veç ai largohet që ka lindur tradhtar. Jam këtu për qytetarët ndershëm. Duke parë eksperiencën e politikanët këtu ti them shqiptarëve që të besojnë këta. Jo mor jo as Ilir Metën mos e besoni, besoni veten tuaj. Besoni për të ardhmen, fëmijët tuaj.’- tha Meta. 

Ilir Meta ka renditur dështimet e qeverisë së Edi Ramës. Në Konventën Kombëtare të LSI përmendi se Shqipëria ka pagën më të ulët në rajon por mban kampion për kërkim azili.

“Shqipëria ka nivelin më të ulët të shpenzimeve publike në rajon të prodhimeve të brendshme bruto. Shqipëria ka barrën më të lartë të biznesit në rajon.  Jemi vendi me ekonominë më pak prodhuese. Kemi pagën më të ulët në të gjithë rajonin. Shqipëria me nivelin më të lartë të çmimeve sipas Eurostat.

Rritje shpenzimesh të investimeve publike në mënyrë marramendëse. Janë rreth 64 mijë familje në 2021 në ndihmë ekonomike me një varfëri ekstreme, me ndihmë mesatare mujore 9200 lekë. Është rritur tej çdo fantazie kosto e jetesës prej rritjes galopante të çmimeve dhe mos rritjes së pagave, përveç rastit të arsimtarëve dhe mjekëve. Për azilant jemi kampion. Sipas të dhënave, për periudhën janar 2019-gusht 2021, në raport me popullsinë nga Shqipëria kërkojnë 10 herë më shumë azil se nga Bosnja, 4 herë më shumë se nga Kosova, 12 herë më shumë se nga Mali i Zi dhe 9 herë më shumë krahasuar me Serbinë”, tha Meta.

Ilir Meta ka sulmuar edhe kryeministrin Edi Rama duke thënë se nuk është patriot. Për këtë përmend deklaratën e tij që Shqipëria dhe Kosova të kenë një president, për të cilën Meta thotë se dha mesazhin për llogari të tjetër kujt në mënyrë që të ç'bëhen njohjet e Kosovës.

“Këta nuk kanë asnjë besim veçse sëmundjen e kleptokracisë, të atij që vjedh edhe kur nuk ka nevojë për dicka. Refuzimi i platformave të presidentit për pakte për integrimin, për reformën në drejtësi refuzohej se duhej konfrontim. Shqipëria duhet të paraqitej si vend anormal. Kosova duhej të copëtohej. Kosova duhet ti falte pjesën e saj më të pasur dikujt tjetër. Artisti ka marrë detyra të mëdha përsipër.

Mos mendoni se është vërtet kaq patriot ai sa ditën në parlamentin e Kosovës festohet 10-vjetori i pavarësisë, kryeministri i Shqipërisë deklaron se kishte përfytyrimin se Shqipëria e Kosova do kishte një president. Pra dha mesazhin që kishte marrë për llogari të tjetër kujt. E paskan planin që të kenë një shtet që të ç'bëhen njohjet e tjera të Kosovës? Mori porosi që të bëjë lajm ndërkombëtar. Kaq mjafton për të treguar nivelin dhe standardin. Pastaj u tërhoq. Jo tha se u nxitova. Po të shkonin në gjyq, aty ishin dhe dëshmitarët”, tha Meta.

Ilir Meta nuk ka hezituar të sulmojë Lulzim Bashën për djegien e mandateve duke e cilësuar si mashtrues ordiner. Në fjalën e tij në Konventën Kombëtare tha se ka qenë kundër bastit të opozitës për të lënë parlamentin në shkurt të vitit 2019.

“Secili duhet të marrë përgjegjësitë e tij dhe duhet të nisemi në përfundimin e këtij eventi të rëndësishëm me vendimin e madh për të takuar çdo qytetar që ti themi se ka vetëm një zgjidhje. Kemi provuar çdo gjë por zgjidhja është të zbatohet Kushtetuta, instrumenti që me referendum populli e vendosi në 1998 për ta ushtruar sa herë të deleguarit abuzonin.

E dimë që është bërë çdo gjë për ta bllokuar referendumin nga një grup politikanësh që shpesh bëjnë teatër nëpër media, nuk bëjnë gjë veçse plaçkitin çdo ditë popullin e Shqipërisë. Viktima është populli. Edhe ju ishit target i tyre gjatë 5 viteve që kaluan dhe më duhet që të mos kthehem në analizë, ti bëj të qartë çdo anëtari e simpatizanti të LSI por edhe çdo qytetari të Shqipërisë që Ilir Meta ka qenë kategorikisht kundër bastit të çmendur për ti besuar një mashtruesi ordiner që të gënjen pa kuptim duke djegur mandatet, duke lënë parlamentin, duke bojkotuar pushtetin vendor.

Djegia e mandateve ishte planifikuar nga mafia që drejton Shqipërinë, nga oligarkët se duhej braktisur dhe pushteti lokal”, tha Meta.

Ilir Meta tha sot se ka një plan për të zhbërë sovranitetin e Shqipërisë dhe pavarësinë e Kosovës

“Na duhet shumë punë që Shqipëria të ketë një qeverisje normale dhe të gumëzhijë nga zërat e gëzuar e fëmijëve dhe të rinjtë. Situata kërkon ndërhyrje urgjente të të gjithë qytetarëve, të cilët duhet të marrin përgjegjësi pasi nuk mund më t’ia delegojnë përgjegjësitë e tyre kësaj klase politike. Në këto 5 vite kam qenë në një lartësi ku kam parë çdo gjë dhe fitova një këndvështrim të ri që më mungonte. Kam parë një rrezik kanosës për sovranitetin e këtij vendi, për pavarësinë dhe shtetësinë e Kosovës. Kam parë një plan të mirëllogaritur për të ekzekutuar pluralizmin politik në Shqipërisë”, tha Meta.

Ilir Meta ka mbajtur fjalën e tij në Konventën Kombëtare të LSI duke thënë se nga 3 pozicionet më të larta që ka mbajtur, është ndjerë më mirë në atë të Presidentit. Për këtë arsye thotë se mezi pret të rikthehet pas 25 vitesh për mandatin e dytë.

“Mos harxhoni energji të panevojshme se dhe vapa është si e padurueshme por na duhet dhe shumë punë duke nisur nga sot e gjatë gjithë gushtit që të kemi një vjeshtë për të rinjtë e saj. Dje sic kisha bërë premtimin publik dorëzova sipas Kushtetutës dhe afatit kushtetues detyrën më të lartë në këtë shtet, atë të Presidentit. Përfundova mandatin e parë si president dhe në këtë mënyrë pata eksperiencën e të provuarit të 3 pozicioneve më të larta në këtë shtet, të kryeministrit, kryetarit të parlamentit dhe presidentit. Dikush më pyeti, nga këto të 3, ku je ndjerë më mirë? Pa diskutim, në detyrën e presidentit dhe mezi pres të rikthehem pas 25 vitesh për të përmbushur mandatin e dytë", tha Meta.

Tedi Blushi, i cili ka qenë këshilltar i Ilir Metës në Presidencë ka mbajtur fjalën në Konventën Kombëtare të LSI duke thënë se të gjithë kanë nevojë për një lidership të fortë që rikthehet në betejë. Ndër të tjera tregoi se gjatë kohës kur ishte në Presidencë, çdo ditë ka qenë 2 mars pasi Meta ishte në betejë për mbrojtjen e interesit kombëtar.

“Unë i përkas vetëm popullit të 2 marsit dhe vij para jush si njeri i lirë. Populli i 2 Marsit është i etur per Lirine dhe Referendumin. Ju sot po merrni një vendim historik për të ardhmen e fëmijëve tuaj. Kauza juaj më e madhe do të përshpejtojë edhe integrimin europian. Koha për të shporrur këtë të keqe është sot, liri dhe demokraci. Siç na la amanet Avzi Nela, o liri o vdekje. Askush më mirë se nuk e di se Presidenca ka qenë 2 mars çdo ditë. Jam thellësisht falënderues që kam qenë bashkëpunëtor i tij.

Në këto 5 vite, Meta ka qenë në çdo betejë për mbrojtjen e interesit kombëtar. Sot kemi të gjithë nevojë për një lidership të fortë që rikthehet në betejë për Shqipëri më të drejtë, më njerëzore, më të dashur dhe më të dhembshur. Fuqia e popullit të 2 marsit qëndron te bashkimi drejt lirisë. Koha është tani, boll duruam, mjaft indiferencës”, tha Blushi.

Ndryshimi i emrit të Lëvizjes Socialiste për Integrim i hapet rrugë me ndryshimet në statut. Konventa ndryshoi 2 nene në statut ku i dha të drejtë vetës që të ndryshojë emrin, vulën dhe simbolet e partisë.
Silva Caka lexoi para të pranishmëve ndryshimet statutore ku një prej tyre është ndryshimi i emrit të partisë.

“Jam këtu për tu njohur me disa ndryshime në statutin e LSI. Konventa Kombëtare e LSI bazuar në nenin 11.7 të statutit të saj propozon: Konventa ka të drejtën e ndryshmit të emrit dhe vulës së parisë. Ka të drejtën e ndryshimit të strukturave të përkohshme", tha ajo. 

Ilir Meta ka hyrë me 2 gishta lart në ambientet e Pallatit të Kongreseve ku po mbahet Konventa Kombëtare e LSI. Mbështetësit e pritën me brohoritje dhe përqafime.

LSI duket se nuk do të mbajë më këtë emër pasi Ilir Meta me rikthimin e tij ka vendosur që të sjellë ndryshime. Ende nuk dihet se cili do të jetë 'pagëzimi' i ri i partisë por Ilir Meta paraditen e sotme dha një sinjal se mund të quhet 'Partia e Referendumit' dhe shtoi se rikthimi i tij nuk është për të drejtuar LSI por për të sjellë frymë tjetër për aksionin opozitar.