Nga 'zhdukja' e avionit te zemërimi i Putin, si e organizoi Rusia arratisjen e Assad nga Siria?

Me ndihmën e Moskës, Bashar al-Assad arriti të arratisej nga Siria, pak para se rebelët të sulmonin Damaskun, duke i dhënë fund sundimit të tij.

Bloomberg raporton në artikullin e tij sfondin e arratisjes së presidentit të rrëzuar nga Siria. Rusia, sipas burimeve të Kremlinit, organizoi që Assad të largohej nëpërmjet një baze ajrore ruse, ndërsa opozita siriane bëri një avancim të shpejtë në Damask.

Duke parë zhvillimet, Rusia u frikësua për fatin e aleatit të saj të vjetër dhe e bindi Asadin se do të humbiste nga forcat e organizatës islamike Hayat Tahrir al-Sham. Kështu, nga Kremlini i ofruan atij dhe familjes së tij një kalim të sigurt nëse largohej menjëherë, gjë që e bëri përfundimisht.

Largimi i Assad ndodhi përmes bazës ajrore Khmeimim. Burimet thanë se inteligjenca ruse koordinoi nisjen. Fillimisht presidenti i rrëzuar u largua nga Damasku me një avion privat. Ai nuk i kishte treguar asnjë këshilltari të tij, nga frika e një skenari tradhtie, ndërsa ka çaktivizuar transponderin e avionit.

Avioni ishte nisur për në bazën ajrore ruse Khmeimim në bregdetin sirian dhe nga atje ai fluturoi me një avion ushtarak rus për në Moskë.

Zhdukja e avionit nga radarët

Bashar al-Assad, i këshilluar nga agjentët rusë, u ngrit në orët e para të së dielës nga Damasku, duke çaktivizuar radarin e avionit të tij personal.

Rreth asaj kohe, të dhënat e Fligthradar24 treguan se një avion që besohet se mbante Assad-in u nis për në Mesdhe përpara se të bënte një kthesë dhe të zhdukej nga radarët, duke çuar në skenarë për rrëzimin e tij të mundshëm.

Zëvendësministri i Jashtëm i Rusisë, Sergei Ryabkov, megjithatë, i tha NBC News se Assad u largua nga Siria "në mënyrën më të sigurt të mundshme" gjatë fundjavës. "Ai është i sigurt dhe kjo tregon se Rusia po vepron siç kërkohet në një situatë kaq kritike”, tha ai.

Rënia e Asadit zemëroi Putinin

Zëdhënësi i Kremlinit Dmitry Peskov refuzoi të zbulojë vendndodhjen e presidentit të rrëzuar të Sirisë.

Megjithatë, ai sqaroi se Vladimir Putin nuk ka ndërmend të takohet me Assad në Moskë. “Nuk ka një takim të tillë në agjendën zyrtare të presidentit dhe nuk kemi çfarë të themi për vendndodhjen e tij”, deklaroi ai për mediat ruse.

Deri më tani, Moska nuk ka bërë asnjë koment zyrtar për rënien e regjimit të Asad. Por zhvillimet tronditëse në Siri kanë zemëruar Putinin, i cili po kërkon të dijë pse inteligjenca ruse nuk zbuloi kërcënimin në rritje të grupit islamik Hayat Tahrir al-Sham për regjimin e Asadit derisa ishte tepër vonë që Moska të ofronte mbështetjen e saj për presidentin.

Rënia e regjimit sirian vjen pas viteve të mbështetjes masive financiare dhe ushtarake ruse për luftën siriane. Sipas personelit ushtarak rus, Moska e ndihmoi Asadin sepse "bazohej në shqetësimet për bazat e saj ushtarake në rajon - një bazë detare në Tartus dhe një bazë ajrore në Khmeimim - të cilat janë bazat e vetme të vendit jashtë territorit të republikave ish-sovjetike".

Një raport i Business Insider të hënën tha se Moska tërhoqi anijet e saj luftarake nga baza detare ruse në Tartus në bregdetin sirian pasi Assad u arratis, ndërsa ushtria ruse ende nuk i ka tërhequr plotësisht forcat e saj nga Siria.

K.M/Shqiptarja.com

TAG:
• Siri
• Bashar al-Assad
• Rusi
• vladimir putin
• Hayat Tahrir al-Sham