Ngjitet në skenën korçare
komedia e De Filippo-s

KORÇE - Është vënë në skenën e teatrit “Andon Zako Cajupi” komedia e Eduardo de Filippo “Magjia e Madhe”. Nën regjinë e regjisorit Hervin Çuli dhe me skenografi të Noset Shijakut. Pjesa e vënë në skenë është një copëz jete, ku gjithsecili në një moment të caktuar apo në pjesën më të madhe të jetës gjen vetveten. Komedia” Magjia e madhe ngjiti në skenën e teatrit të Korçës 20 aktorë, nga më të njohurit e skenës, si Marko Bitrakun, Zamira Kitën, Ligoraq Rizën, Natasha Andonin, Naum Tarovën, Kiço Kerrin, Shkëlqim Jaupin, Guri Koçon, Albano Prodani, por edhe emra të rinj të talentuarish.

Për rreth 2 orë, artëdashësit korçarë kanë mundur të ndjekin lojën e shkëlqyer të aktorëve, batuta të ndryshme për jetën dhe iluzionin e saj të veshur me petkun e komedisë. Komedia e Eduardo de Filippos e vënë për herë të parë në skenën korçare ka ngritur para artëdashësve pyetjen e madhe: Jetojmë me të vërtetë një gjë reale apo gjithçka është një iluzion dhe kujtojmë se e jetojmë atë që nuk është e vërtetë?

Për regjisorin Ervin Çuli kjo ka qenë eksperienca e parë pranë teatrit “Andon Zako Çajupi” ku ndryshe nga të gjithë regjisorët e tjerë ai i ka besuar totalisht trupës të aktorëve korçarë. Edhe pse e përqendruar në realitet në qytetin e Napolit”Magjia e Madhe” përfshin në thelb kronikën e jetes së çdo qyteti.

(di/im/shqiptarja.com)