Nishani pret Nuland: Reforma në 
drejtësi jo në politike dhe teknike

TIRANË - Ndihmës Sekretarja amerikane e Shtetit për Çështjet Evropiane dhe Euro-aziatike Victoria Nuland, ka vizituar sot Tiranën në kuadër të një turi 3 ditor në Ballkan. Vizitën zyrtare në Tiranë Nuland e ka nisur duke takuar kreun e shtetit Bujar Nishani në Presidencë. Pas këtij takimi ajo do të takojë edhe kryeministrin Rama.

 Në takimin me presidentin, Nuland, shoqërohej nga Zëvendës Ndihmës Sekretarja amerikane për Mbrojtjen, Evelyn Farkas dhe biseda e tyre u përqendrua në çështjet e bashkëpunimit dypalësh dhe ato të sigurisë, zgjedhjet vendore, zhvillimet në rajonin e Ballkanit Perëndimor si dhe marrëdhëniet e Shqipërisë me fqinjët.

Kreu i Shtetit shqiptar në takimin me zyrtaret amerikane theksoi se, “prania dhe vëmendja e Shteteve të Bashkuara në rajonin e Ballkanit Perëndimor mbetet jetike, pasi tentativat për destabilizimin e këtij rajoni mbetet një sfidë shumë serioze”.

Nishani shprehu një vlerësimin për kontributin e Shteteve të Bashkuara dhe misioneve amerikane si ICITAP dhe OPDAT, për ekspertizën që kanë sjellë në Shqipëri, por edhe të Ambasadës së SHBA-së në Tiranë, për angazhimin e drejtpërdrejtë dhe inkurajimit që i kanë bërë reformës në drejtësi.

“Reforma në drejtësi mbetet prioritet i prioriteteve tona dhe ajo duhet të jetë cilësore dhe premtuese. Ajo nuk mund të ndahet në politike dhe teknike, pasi sfida kryesore ka qenë gjithmonë e lidhur me procesin e implementimit të ligjeve e reformave, që është përgjegjësi dhe vullnet politik”, tha Nishani.

Gjatë takimit u bisedua edhe mbi zgjedhjet vendore në Shqipëri, ku Presidenti Nishani theksoi nevojën e leximit me përgjegjësi nga të gjithë aktorët politik të raportit të OSBE/ODIHR-it, për të evidentuar dhe adresuar problematikat reale.

Me interes u trajtuan edhe nevoja e bashkëpunimit me komunitetet lokale për parandalimin e shtrirjes së influencës nga ekstremizmi i dhunshëm dhe elementet terroristë. Presidenti Nishani evidentoi iniciativat e ndërmarra për të inkurajuar klerikët e lartë të vendit për të dhënë ndihmesën e tyre në këtë drejtim dhe forcuar bashkëjetesën dhe respektin e ndërsjellë mes njerëzve.

Redaksia Online
(a.h/f.s/shqiptarja.com)

TAG:
• OSBE